Lalpa lungawi hun
6
1 Ama rong kan bawlpuihai in ni leiin, Pathien lunginsietna chu trangkaipui loa in dong nawna dingin kan ngên chêu a nih. 2 Ama chun, ‘Ka lungawi hunah ka ngaithlak che a,
Sandamna niah ka thrangpui che’ Isa 49:8a a ti si a. Ngai ta u, tu hi Pathien lungawi hun chu a na, ngai ta u, tu hi sandamna ni chu a nih.
Paula harsatna tuokhai
3 Kan rongbawlna hi mihaiin an hril siet nawna dingin tu lampuia khom dâlna kan siem ngai nawh. 4 Siem nêk hmanin, kan thaw taphotah Pathien rongbawltu kan nizie suklangin, sukdŭdăna hai, rinumna hai le hnawchêpna hai sel takin kan tuor a. 5 Vuok kan tuor a, lung inah kan intăng a, tlâng chîl kan tuok a, imu khom hmu loin sin kan inrim a, phingtrâm kan tuor a; 6 thienghlimnaa dam, hriet thiemnaa dam, dawtheinaa dam, ngilneinaa dam, Thlarau Thienghlima dam, hmangaina tak taka dam, 7 thudik hril konga dâm, Pathien thilthawtheina hmang konga dam Pathien rongbawltuhai ni awm hrimin kan um a; voi le changah felna râlthuom kan chawi hlak. 8 Chawimawi kan hlaw a, ngainêp kan hlaw bok a; inpâk kan hlaw a, dem kan kâi bok a; thudik kan hril a, hlĕmtuah an mi ngai a; 9 mi hriet hlaw vieu sia tu hriet hlaw loa ngai; thi vâng vâng, sienkhom hring bok si; vuok hrep tuok, sienkhom thi si lo; 10 lungngaina tuok hlak, sienkhom lawm rop si; rethei hlê sia mi tam tak sukhausatu le ieng khom nei loa iengkim hau bok si kan nih.
11 Aw Korinth khuoa mihai, lungril inhong takin in kuomah thu tlang takin kan hril hi. 12 Keini chun kan ngaina zing chêu a, nangni ruok chu keini lakah in inhong si nawh. 13 Mani nauhai angin ka hril chêu hi, keini ang bokin lungrilah inhong ve ro.
Pathien hring tempul
14 Ringnawtuhai leh inkhan lo takin ringkol bât hmunkhat naw ro. Felna le rîtlonain iem inzăwlna an nei a? Var le inthim an inkop thei am a ni? 15 Krista le Belialb khom an inrem thei am a nih? Ringtu le ringnawtu khomin iem inthuhmunna an nei a? 16 Pathien tempul le milimhai khomin iem inthuhmunna an nei? Eini ruok chu Pathien hring tempul ei ni si a. Pathienin,
“Anni leh chêngin intlon kan ta,
An Pathien ning ka ta,
17 Chuleiin, LALPAN hieng hin a tih:
“Anni laia inthokin hung suok unla,
A tumin um ro;
Thil thieng lo tawk naw ro.
18 In ta dingin Pa ni’ng ka ta,
Nangni khom ka ta dingin,
Naunu le naupa ni’ng in tih’