4 “An thu i rèlpèk di’m a ni? Mihriem naupa, an thu i rèlpèk naw ding maw? An pahai thil chìng tirdakum leh anni chu hmason la, 5 Lalpa PATHIEN chun hieng hin a tih tiin hril rawh: Israelhai ka thlang ni khan, Jakob sungkuo le an thlahai hmaah kut phar meuin, ‘Kei hi LALPA in Pathien chu ka nih’ tiin, Aigupta rama khan keima chu anni kuomah ka’n puong a. 6 Chu ni chun inkhâm meuin, Aigupta rama inthoka thruoi suok a, an ta dinga ka ram huol, nenetui le khuoizu luongna ram, ram po po laia mawi taka ka thruoi lut ding thu ka hril a. 7 An kuomah, ‘Mi tinin in mit latu milim tirdakumhai chu sie hmang vong unla, Aigupta milimhaiin insukporche ta naw ro, kei hi LALPA in Pathien chu ka ni si a’ tiin ka hril tawl a.

8 “Amiruokchu, ka chungah an hel a, ka thu an ngaithlak nuom naw a, an mit latu milim tirdakumhai chu an pei hmang naw a, Aigupta milemhai chu an nghatsan bok nawh. Chuongchun, an chunga ka lungsenna ka hrik thlak ding thu le Aigupta ram sunga ngei ka lungsenna ka bun thlak ding thu ka hril a. 9 Nisienlakhom, an chengna rama hnam danghai mithmua ka hming hril sieta a um ding chu ka veng leiin chuong ang chun an chungah ka thaw ta êm naw a, Aiguptahai mithmua ngei Israelhai kuomah keima chu inpuongin, a rama inthok chun ka thruoi suok tawl ta lem a. 10 Aigupta rama inthoka thruoi suokin thlalerah ka thruoi lut tawl a. 11 Ka thu suokhai le ka danhai ka pêk a, chuonghai chu mi tu khomin zawm a, an hringpui theina dingin. 12 Keima le anni inkara inchikna dingin ka chawlni Sabat ka pêk bok a, kei LALPA hi anni ser hrangtu ka nizie an hriet theina dingin.

13 “Sienkhom Israel sungkuohai chu thlalĕra khan ka chungah an hel a. An hringpui ding ni si ka thu suokhai chu zawm nuom loin, ka danhai an hnăwl a, ka chawlnihai nasa takin an bawsiet a. Chuleiin, thlalera chun ka lungsenna an chungah bun thla a, sukse vong di’m a nih ka ti a. 14 Amiruokchu, ka hung thruoi suok lai hmutu hnamhai laia ka hming inpawi ding ka vĕng leiin chuong ang chun ka thaw ta naw a. 15 Chu bâkah, thlalĕra khan ka ram pek, nenetui le khuoizu luongna ram, ram po po laia mawi taka chun thruoi lut lo dingin kut phar meuin thu ka’n khàm a. 16 A san chu ka danhai hnawlin ka thu ruothai an zawm nuom naw a, ka chawlni an bawsiet bok a; an lungril chu an milimhai tieng a ngha tlat si lei a nih. 17 Nisienlakhom, hang sukbohmang èm dingin ka lunginsiet tawl si a, thlalĕra khom khan ka sukbohmang vong ta naw a nih. 18 Thlalĕra khan an nauhai kuomah, ‘In pahai dan siem kha zawm naw unla, an danhai vong naw unla, an milimhaiin insukporche naw ro. 19 Kei hi LALPA in Pathien chu ka na, ka thu ruothai zawm unla, ka danhai fimkhur takin vong ro. 20 Ka chawlni inser ro, kei le nangni inkara inchikna a ni theina dingin. Chuongchun, LALPA in Pathien ka nizie hung hrieng in tih’ ka ti a.

21 “Nisienlakhom, an nauhai chu ka lakah an hel a, an hringpui ding ni si ka thu ruothai chu an zawm naw a, ka danhai an vong fimkhur naw a, ka chawlnihai an bawsiet a. Chuleiin, thlalĕra khan ka lungsenna hrik thla a, an chungah bur khum dingin ka ti a. 22 Amiruokchu, ka hung thruoi suok lai hmutu hnamhai laia ka hming inpawi ding ka veng leiin kut ka kei a. 23 Chun, hnamhai lai sukdar a, ram tinah thè dar vong dingin kut phar meuin thlalĕra khan thu ka’n khàm a, 24 a san chu ka danhai an zawm naw a, ka thu ruothai an hnawl a, ka chawlni an bawsiet a, an pahai milim tieng an lungril a ngha tlat leiin. 25 Chun, dan le dun hmangna bo, an nunpui thei ding khom ni lo, ka pêk bok a, 26 ka thilpekhai ngei chun an insukporche a, an nau lutirhai chu meiah an inhlàn a; LALPA chu ka nih ti an hriet theina dingin, anni chu pangzatnain ka suksip a nih. 27 “Chuleiin, nang mihriem naupa, Israel mipuihai chu inbiekpui la, an kuomah hieng hin hril rawh: Lalpa PATHIEN chun hieng hin a tih: Hieng thila hin in pahai chun mi nghatsanin an mi hrilsiet zui pei a.

28 Ram pek ding ka tiemah ka thruoi lut hnungin, tlâng insang le thing zăr buk thra an hmuna taphotah inthawina an inhlàn a, rimtui rawin, dawn ding thilhlanhai an bun suok a, lungsen dingin an mi cho phăwk a. 29 Kei chun, ‘Hmun sanga in fe hlak hi iem in tina a na?’ ka ta. (Chuleiin tu chen hin a hmingah ‘Bamah’^b ti a hung ni tah a nih.)

30 “Chuleiin, Israel sungkuohai kuomah hieng hin hril rawh: ‘Lalpa PATHIEN chun hieng hin a tih: In pahai ang bokin nangni khom insukporchein, milim tirdakum chu hnotin in hur hmang ve ding am a ni? 31 In thilpekhai inhlànin, in nauhai meiah peiin, voisun chen hin in insukporche zing a ni naw am a ni? Aw Israelhai sungkuohai, nangni rawn ding am ka ni? Nangni rawnin um naw ning ti hi kei Lalpa PATHIEN hring zing hin ka hril a nih.

32 “In lungrilin ‘Khawvela hnam danghai ang boka thing bul le lung bul betu ni kan nuom ve’ ti inla khom, in ti angin tlung naw nih. 33 Ka kut tha hratin, kut phar meu le ka lungsenna phu suokin, in chungah ro rel ka tih ti hi kei Lalpa PATHIEN hring zing hin ka hril. 34 Ka kut tha hratin, kut phar meu le lungsenna phu suokin, hnamhai laia inthokin thruoi suok ka ti cheu a, sukdara in umnaa inthokin thruoi khawm nawk ka ti cheu. 35 Hnam danghai ram thlalĕrah thruoi ka ti cheu a, chu taka chun inhmasonin, in chunga ka rorelna chu hlen ka tih. 36 Aigupta thlalĕra in thlatuhai chunga ro ka rel ang bok khan nangni chunga khom ro rêl veng ka tih ti hi Lalpa PATHIEN thu suok a nih. 37 Ka hmol hnuoiah inkuntir ka ti cheu a, ka thuthlung khuokhirna hnuoiah thruoi lut ka ti cheu. 38 Nangni laia ka thu awi lo le ka laka helhai chu inthiel fai ka ta, an umna rama inthokin hung thruoi suok ka ta, sienkhom Israel ram chu lut naw top an tih. Chu pha chun LALPA chu ka nih ti hung hre tang in tih.

39 “Aw Israel sungkuohai, in chungthua Lalpa PATHIEN hril chu hi hi a nih: Ka thu in ngaithlak naw law law si chun in rêngin fe hmang unla, tuta le a hnung chenin in milim pathien rong chu va bawl ro; in thilpekhai le in milimhaiin ka hming thienghlim sukporchè ta naw ro. 40 Ka ram, ka tlâng thienghlim, Israel tlâng sanga chun Israel sungkuo po poin ka rong an bawl ding a nih; chu taka chun anni chu lo pom ka tih. Chu taka chun in thilhlanhai, in thilpek hlu tak takhai le inhlanbiekna thil ser po pohai khom chu lo dit tang ka tih. 41 Hnamhai laia inthoka la suok a, in indarna ram tina inthoka ka thruoi khawm pha cheu chun rim inhnikah pom tang ka ti cheu a, hnamhai mithmuah ka thienghlimna chu nangniah tar lang tang ka tih. 42 In thlatuhai kuoma kut phar meua pek ka tiem Israel ramah ka hung thruoi lut pha cheu chun kei hi LALPA chu ka nih ti hung hre tang in tih. 43 Chu pha chun in um danhai le in thilthaw hlak haia in insukporche danhai hung hrieng in ta, thil thra lo in lo thaw tahai leiin nangni chen khom intirdak pha’ng in tih. 44 Aw Israel sungkuohai, in um dan thra naw ang ni lo le thil porche thaw in chìng hlak ang kha ni bok loa, ka hming sika ka dawr pha cheu, kei hi LALPA chu ka nih ti hung hre tang in tih, ti hi Lalpa PATHIEN thu suok a nih” tiin.

45 Chun, LALPA thu chu ka kuomah a hung tlung a. 46 “Mihriem naupa, sim tieng ngha la, sim tieng chungthu hrilin, sim tieng ram ngirhmun ding hril lawk rawh. 47 Sim tienga rampui kuomah hieng hin hril rawh: ‘LALPA thu hi ngaithla rawh, Lalpa PATHIEN chun hieng hin a tih: ‘Nang hi meiin ka raw trèp ta che a, chu mei chun, i thing hring le trawl po po hi lem zo vong a tih. Mei chok puot puot chu sukrêm ni naw ni a, sim tieng le hmar tieng inkara um po pohai chu kàng ût vong a tih. 48 Chun, mi po poin kei LALPA hi mei insuotu chu ka nih ti hmung an ta, mei chu sukmit ni naw nih a tih’ ti rawh” a ta. 49 Kei chun, “A khai, Lalpa PATHIEN! ‘Tekhinthu mei mei an naw maw a hril hi?’ an mi ti hman dĕr tah a nih” tiin ka hril a.