2 “‘Ka chawlni Sabat inser unla, ka Hmun Thienghlim inzà ro. Kei hi LALPA chu ka nih. 3 Ka thusuokhai in zui a, ka thupêkhai fimkhur taka in zawm chun, 4 a hunbi takah ruo hung insŭrtir ka ta, hnuoiin thlai insuong a ta, rama thinghaiin ra insuo bok an tih. 5 In bu vuok hunin grep lo hun chen awng a ta, grep in lo hunin thlai chi thlak hun chen aw nawk a ta, in dû dŭ hnienghnâr takin chĕn in ta, in ramah him takin khawsa’ng in tih.

6 “‘Hi ram hi ralmuong takin siem ka ta, tu khom tri ding nei loin imu intuong in ta, ram sa triumhai hnot zâm vong ka ta, a ramah kawlhnâm inlêng naw nih. 7 In hmĕlmahai chu hnot thlûr in ta, kawlhnâmin sât hlum in tih. 8 Mi pangain za ruol hnot lêng in ta, za ruolin sîng ruol hnot lêng bok in ta, kawlhnâmin in ke bulah sât thal rem rum in tih.

9 “‘Ditsak ka ti chêu a, chi tam tak inthlatirin sukpung ka ti chêu a, in laka ka thuthlung chu vong zing ka tih. 10 Bu thar huna khom kum hmasaa bu la nei zing in ta, a thar hlu lûtna dingin bu hlui chu thak suok in tih. 11 Nangni lai ka biekbuk innghat ka ta, lungten nawng ka ti chêu. 12 Intlonpui ka ti chêu a, in Pathien ni’ng ka ta, ka mihai ni’ng in tih. 13 Kei hi LALPA in Pathien, Aiguptahai bawia in um zing nawna dinga Aigupta rama inthoka thruoi suoktu chêu chu ka nih. In rǐngkol bun ka suktliekpek chêu a, inzaum takin ka’n lawn martir ta chêu a ni hi.

14 “‘Amiruokchu, ka thu ngaithla lo a, ka thupêkhai zawm nuom lo a, 15 ka thuruothai hnăwl a, um dan ding ka tihai theida a, thaw ding ka tihai thaw nuom loa ka thuthlung in bawsiet chun, 16 in chungah hi hi keiin thawng ka tih: thlaphângnain innang chîngtir thut ka ti chêu a, ngor hri le khawsik inlĕngtir ka ta, chu chun in mit sukthimin in hringna fa châu a tih. Thlai chî a thlawnin thlâk in ta, in hmĕlmahaiin fa zo pei an tih. 17 Hmêl tlâi inhmutir naw’ng ka ti chêu a, in hmĕlmahaiin hnĕng an ti chêu a, a theidătuhai chêu chun in chungah ro rêl an ta, tu hnot lo khomin tlan sieng in tih.

18 “‘Hieng po po in chunga a tlung hnung khoma in mi la ngaithlak naw rop chun, in suolna leiin a let sariin hrem ka ti chêu. 19 In uongthuongna le lululna chu suksieng ka ta, van khi kapathir angin inchangtir ka ta, hnuoi hi dâr thîr angin inchangtir bok ka tih. 20 Thâ a thlăwnin sêng in ta, hnuoiin thlăi insuopêk naw ni chêu a, a rama thinghaiin ra insuopêk bok naw ni chêu.

21 “‘Ka thû ngaithla nuom loa ka lakah in hel zing chun, in suolna le inphûin, hremna chu a let sariin sukpung ka tih. 22 Ram sa kolhai hung tir ka ta, in nautehai inchŭ hmangpèk an ti chêu a, in ranhai fa tlaran an ta, nasa taka in kiem leiin in lampuihai chu hrawtu um loin thring bor bor a tih.

23 “‘Chuong sà khoma ka thununna chĕu chu pom loa ka lakah in hel zui pei chun, 24 kei khom nangni lakah truong ka ta, in suolna leiin a let sariin hrem ka ti chêu. 25 Thuthlung in bawsietna phuba la dingin in chungah kawlhnâm hung tir ka ta, in khuo senga in intom khawm pha leh nangni lai hripui hung tir ka ta, hmêlma kuta pèk ni tho in tih. 26 Fak ding in làkna lampui ka hrukpĕk pha chĕu chu, thuk sawm hmanga bei ur hlak nuhai khan thuk khat chauh hmangin fakrong bawl tang in tih. Insem diet diet in ta, in chan seng in fak zo hnung khomin la trâm zing in tih.

27 “‘Hieng sà khoma in mi la ngaithlak naw rop a, ka lakah in hel zing chun, 28 in chungah ka lungsen truong a ta, in suolna leiin kei ngeiin a let sariin hrem ka ti chêu. 29 In naupahai le naunuhai sà fa’ng in tih. 30 In pathien biekna hmunsanghai suksieng ka ta, in rimtui rawna maichàm sukchim ka ta, hringna nei lo milim in biekhai chungah in mithi ruonghai chu vùm thûrin pei khawm ka ta, tirdak bok ka ti chêu. 31 In khawpuihai sukram ka ta, in hmun thienghlim tlu sop a ta, rim inhnik in inhlàn chunga khom lawmna hrim nei naw ning. 32 In ram suktlaran ka ta, chu taka um in hmĕlmahai chun pangzat hiel an tih. 33 Hnam tin lai sukdar ka ti chêu a, ka kawlhnâm vilik ka ta, hnot thlùr ka ti chêu. In ram tlaran vong a ta, in khawpuihai tlu ram a tih. 34 In hmĕlmahai rama in um sung po in ram chu hluo loin tlaran a ta, hàdam takin chawl trok trok a tih. 35 Hluotu nei loa a tlàkran sung chun in hluo laia chawlni khom chawl thei loa um ram khan chawlni hmang ve ta’ng a tih.

36 “‘Chun, nangni laia mi la dam sunhai khom an hmĕlmahai ramah thlaphâng dor dorin siem ka ta, thliin thing hna a mŭt lĕng ri ringot khom tlănsietpui an ta, indonaa mi hnot thlŭr ang elin hnottu um si loin tlan sieng an ta, inpal thlu pheng phung an tih. 37 Hnottu um si loin anni le anni inpal thlu rem rum an ta, hmèlmahai lo dang dingin hràtna hrim nei naw ti niu. 38 Hnam dang mihai lai bohmang in ta, in hmĕlmahai ram chun dol hmang a ti chêu. 39 A dam sun la umhai chu hmêlmahai ramah an suolna leiin ral tiel tiel an ta, an pahai suolna leiin la hmon hmang an tih.

40 “‘Sienkhom, an thlahaiin an suolna le an pahai suolna, ka lakah hela an mi’n phatsanna laka an suolna chu, la hung inpuong an tih. 41 Chuong anga an suolna lei chun kei ngei khom anni lakah ka lungril a hel a, an hmèlmahai ramah ka’n tàngtir pha hiel a nih. A tawpah, an lungril ser tan lo chu hung inphàhnuoi a, an suolna leia hrem tuor an nih ti an pom pha chun, 42 Jakob kuoma ka thuthlung, Isak kuoma ka thuthlung le Abraham kuoma ka thuthlung chu hre zing ka ta, ka mihai kuoma ram pêk ka tiem khom chu sukthar nawk ka tih. 43 Chu hmâ chun a rama inthokin anni chu inthiel fai phot a ngai, an rausan sùnga a ram chu hàdam taka a chawl theina dingin. Ka dànhai hnawla ka thuruothai an theida leiin an suol man chu a kimin an hmu phot ding a ni hrim a nih. 44 Sienkhom, an siet phâ dèr khopin hmêlma ramah intăngtir nawng ka ta, an kuoma ka thuthlung chu sût pha hiel khopin anni chu hnawlin theida nawng ka tih. Kei hi LALPA, an Pathien chu ka ni si a. 45 An Pathien ka ni theina dinga hnam danghai mithmua ngei Aigupta rama inthoka anni thruoi suoktu chu ka ni leiin, anni zârin an pi le puhai kuoma ka thuthlung chu hre zing ka tih. Kei hi LALPA chu ka ni si a’ tiin hril rawh” a ta.

46 Hienghai hi Sinai tlanga Mosie hmanga LALPAN ama le Israel thlahai inkara a siem thuruothai, danhai le thupêkhai chu an nih.