Van chatuon in hlun
5
1 Ei chengna hnuoi in hi triek sien khom, kuta bawl lo chatuon in hlun, Pathien buotsai chu vanah ei nei ti ei hriet. 2 Tuhin chu van thuom ei inbel hun ding nghakhlain ei inrŭm takzet a, 3 ei inbel pha chun saruokin lêng ta naw mei nih. 4 Hi taksa ina ei la chĕng sung hin rikphurin ei inrŭm a, ei sil lai hlip thlâk ei nuom lei ni loin, van thuom sil thuo vat vat ei chăk lei a nih; chuongchun thi thei hi hringnain lem zo ta’ng a tih. 5 Chu dinga mi buotsaitu chu Pathien a na, thil la hung tlung ngei dinga a tiem zakhamna dingin Thlarau a mi pĕk a. 6 Chuongchun, taksa ina chêng ei la ni lei chaua Lalpa kuoma la um hri lo ei nih ti hrein ngai muong takin ei um rop hlak. 7 Hmu thei hin a mi thruoi naw a, ringnain a mi thruoi lem a nih. 8 A nih, ei ngai a muong a, hi taksa hi maksana Lalpa kuoma um chu ei thlang lem hrim a nih. 9 Chuleiin, taksa ina chêng ei la ni amanih ei ni ta naw amanih khomin ama chu suklawm ei tum tlat a nih. 10 Hi dam sunga ei thil thaw man a sie a thra hmu dingin, ei rêngin Krista rorêlna hmaah ei la ngir ding a ni si a.
Inrem nawkna rongbawlna
11 Chuongchun, Lalpa triumzie hrein, tri nachâng hre dingin mihai hnĕ kan tum hlak a. Pathienin a mi hriet fai vong a, nangni khomin in lungril tak chun in mi hriet chieng ka ring. 12 In kuomah inhril mawi kan tum naw a, lungril tieng ni loa puo tieng inlang dan uongpuituhai chu in don lêt theina dingin, keinia uongpui ding thra le remchang chu kan hril chêu a ni lem. 13 Kan invèt a lo ni khomin Pathien ta ding a na, kan var a ni chun nangni ta ding a nih. 14 Mi po po ta dingin mi pakhat a thi a, chuleiin mi po po khom an thi a nih ti hin a mi hnê ĕm leiin, chu Krista hmangaina chun thaw dingin a mi tur a nih. 15 A hringhai chu anni ta dinga hring ni ta loa, an ta dinga thia thonawk ta dinga hring an ni theina dingin, mi po po ta dingin a thi a nih. 16 Chuleiin, tuta inthok hin chu mihriem thlîr danin tu khom kan en ta nawh. Chuong ang chun kha hma khan Krista chu lo hre hlak inlang khom, tu hin chu chuong ang chun kan ngai ta nawh. 17 Chuleiin, mi tu khom Kristaa um chu thilsiem thar a hung ni ta a, a mihriem hlui chu a bo a, ngai ta, mi thar a hung ni tah!
18 Hieng po po hi Pathiena inthok vong a nih; ama chun Isu Krista zarah ama leh a mi’n remtir a, inremna rongbawl sin a mi pêk a. 19 Chuongchun, Pathienin Kristaah khawvel hi ama leh a’n remtir a, an bawsietnahai chu bawsietnaah a tiem ta naw a, chu inrem nawkna thucha chu a mi’n koltir a nih. 20 Chuleiin, Krista ta dinga palai kan na, Pathienin keini hmanga a ngèn cheu angin, “Pathien leh inrem ro” tiin Krista aiawin kan ngĕn chêu a nih. 21 Ama zara Pathien felna ei lo chang ve theina dingin, suol hrim hrim nei lo chu, eini leiin Pathienin suol phurtuah a siem tah a nih.