LALPA siehlaw
49
1 Thlierkarhai, ka thu ngaithla unla,Hla taka um hnam tinrênghai,
Ka thu hi lo ngaithla ro.
Ka pieng hma’n LALPAN a mi ko a,
Ka nu sŭla ka um lai khomin,
Ka hmingin a mi ko dĕr tah.
2 Kawlhnâm ang topa ngeiin,
Ka bau hi a’n changtir a,
A kut hrăta mi thupin,
Thal tle tak anga mi siemin,
A thal bawmah a mi khum.
3 “Ka ropuizie ka puongna ding,
Ka siehlaw Israel i nih’
Tiin ka kuomah a hril.
4 Kei ruok chun ama kuomah,
“Hmang loa thokrim mei mei,
A thlawna tha sêng ka nih.
Sienkhom keima chungthu chu,
LALPA kuta um a na,
Ka lawmman ding khom chu,
Pathien kuoma um a nih” ka ta.
5 Jakob thlahai thruoi kîr ding le,
Israelhai hûi khawm dinga,
Sŭla ka um laia inthok khoma,
A siehlaw dinga mi’n dintu,
A mitah inzauma mi siemtu,
Ka hrătna le ka Pathien,
LALPA chun hieng hin a hril:
6 “Jakob thlahai tungding a,
Israel thla ka hum sunhai,
Thruoi kir dinga ka siehlaw ruot,
I nina hi a huntawk nawh.
Jentelhai sukvartu ding khomin,
Ka ruot sa ding chè a nih,
Hnuoi kil tinah ka sandamna,
Intluntu hung ning i tih” tiin.
7 Israelhai intlantu LALPA,
Mi Thienghlimin hieng hin a tih:
“Nang, mi hmusit le endong,
Rorêltuhai siehlawa um,
Bawia inthoka i suok lai,
Lalhaiin an hmu pha chè chun,
A thlangtu che LALPA ringum,
Israelhai Mi Thienghlim leiin,
Inza taka thoin lo ngir an ta,
Milienha’n hmung an ti che a,
I hma bulah kûn an tih” tiin.
Israel tuoi thar nawkna
8 Hieng hin LALPA chun a hril:
Ka lungawi hunah ka ngaithlak che a,
Sandamna niah ka thrangpui che;
Ka thuthlung sukpuitlingna dingin,
Nangni hi ka humhim cheu a nih:
In rochan, rausan hnung ram,
Tungding le hluo nawk ding dam;
9 Tânghai kuomah “Suok ta ro” ti a,
Thima inthrunghai kuomah,
“Zalen ta ro” titu ding damin.
Lam sǐra hai tla khawm an ta,
Muol kol veng vunga hai khom,
Tlatna hmun hring hmung an tih.
10 Phingtrâm tuor ta naw ni hai a,
Dangchâr tuor ta bok naw ni hai;
Thlalĕr lum le ni intrĕngin,
Sukrinum ta ngai naw nih.
Anni lunginsiettu ngei chu,
An thruoitu hung ni tang a ta,
Tui luong del delna vakamah,
Anni chu thruoi lem tang a tih.
11 Ka tlâng tinhai chu lamlienin,
Insun păwtir vong ka ta,
Ka lamlienhai vur sang ka tih.
12 En ta u, an hung kǐr ta saw!
Hmar tienga inthok damin,
Thlang tienga inthok damin,
Aswan bielaa inthok damin.
13 Aw vanhai, hlimin khêk ro;
Aw leihnuoi, hlimin lawm rawh;
Aw tlânghai, zai hla vawr ro!
LALPAN a mihai a thlamuong a,
Tuorhai chu lunginsiet a tih.
14 Nisienlakhom Zion chun,
“LALPAN a mi hnawl an tah,
LALPAN a mi theinghil tah” a tih.
15 Nenea a chawm lai naute,
Nuin a theinghil hlaka maw?
A rîla ra naupang ngei chu,
A lunginsiet naw ding maw?
A theinghil a ni khomin,
Kei chun theinghil nawng ka cheu.
16 En ta, ka kutphaa hin,
I hming ka ker a ni hi!
I kul bang chim tahai chu,
Mitthlain ka hmu zing hlak.
17 I nauhai an hung kir inhmaw,
Nangma suksetuhai chun,
An suoksan ding chè a nih.
18 Dâk la, i mit inlĕn rawh,
I nauhai an inko khawm a,
I kuom tieng an hung pan saw!
Pathien hringin ka hril hi:
“Incheina thri ang elin,
I ring mawitu ning an ta,
Moin a hlì ang elin,
Nang khomin hlì tang i tih.
19 “Sukchim le rausana umin,
I ram chu tlaran sien khom,
Inleng loin hluo sip nawk an ta,
Sukramtu i hmêlmahai chu,
Hla takah um tang an tih.
20 I lusun laia nau pienghan,
‘Kan intar taluo ta a,
Hmun inthawl lem mi pe rawh’
Tiin i kuomah la hril an tih.
21 Chu pha chun i lungrilin,
‘Hienghai hi tu rêngin am,
A mi lo hringpek a na?
Nauhai sûnin ka ching a,
Saltăng, mi hnâwl ka ni a;
Tuin am hieng nauhai hi,
A lo chawm tlei ning a ta?
Keima chaua mal taka,
An mi maksan kha ka na,
A tuin am hienghai hi,
A lo hring ni tang a ta?’
Tiin la’n don ngei i tih.”
22 LALPA Pathienin a tih:
“Hnam tin hmu-ah bân vai ka ta,
Kutin Jentelhai hûi ka ta,
An hmaah ka puonzar khai ka ta,
I naupahai hung pom an ta,
I naunuhai hung puong an ta,
I kuomah hung thruoi an tih.
23 Lalhai chu i paah siem ka ta,
Lalnuhan enkol an ti che.
Bokkhupa hmaia hnuoi sikin,
I hmaah hung kûn an ta,
I kea pilvut chu liek an tih.
Chu phâ chun kei hi LALPA,
Ka nizie hung hrieng i tih.
Ka chunga beiseina neitu chu,
Muolpho ngai naw nih” tiin.
24 Mi huoi râllâk chu tuin am,
An inchu thlăk ngam hlak a?
Mi kolsen sal man chu tuin am,
An san suok ngam hlak a na?
25 LALPA chun hieng hin a hril:
“Mi râlhrat kuta inthokin,
Salhai chu lăkpêk ka ta,
Mi kolsen kuta inthokin,
A răllâkhai chu la kîr ka tih.
Nangma dotu chu do ka ta,
I nauhai chu san suok ka tih.
26 Nangma nêksawrtuhai chun,
Anni taksa la fa’ng an ta,
Uoiin dawn inrui ang elin,
An thisen dawn inrui an tih.
Chuongchun hringmi tinrêngin,
Kei hi LALPA, in Sandamtu,
In Tlantu le Israelhai Mi Hrat chu,
Ka nih ti hre tang an tih.”