Israel Sandamtu
43
1 LALPA chun hieng hin a tih:“Jakob, nang ka siem che a,
Israel, keima indin suok i nih.
Tri naw, i tlantu ka nih;
I hming lamin ka ko che a,
Ka tä i nih.
2 Tui inthŭk i pal laiin,
I kuomah um zing ka ta,
Vadung i pal kăi laiin,
Tuiin chǐm pil naw ni che;
Meipui I hraw tlang laiin,
Meiin hlieu na naw ni che.
3 LALPA i Pathien ka na,
Israelhai Mi Thienghlim,
Nangma Sandamtu ka nih.
Nangma intlanna dingin,
Aigupta ram ka pêk a,
Nangma ka thlengna aiah,
Ethiopia le Seba ka pêk.
4 Ka ngaihlu èm ém che a,
Ngaisanga ka hmangai che leiin,
I aiin mi dang pe suok ka ta,
I hringna aiah mi dang tam tak.
5 Tri naw, i kuomah ka um,
I thlahai chu khawsak a’nthokin,
Keiin hung thruoi khawm ka ta,
Khawthlanga inthok khomin,
Ka hung thruoi khawm ding a nih.
6 Hmar tieng kuoma chun keiin,
‘Hung inthla rawh’ ting ka ta,
Sim tieng kuoma khom keiin,
Chel tâng lo din hril ka tih:
Ram hla taka inthokin
Ka naupahai hung thruoi la,
Kawl kil tawpa inthokin,
Ka naunuhai hung thruoi rawh.
7 Ka hming puttu taphot chu,
Ka ropuina inlangtirtu dinga,
Indina ka siem an nih” tiin.
Israel, Pathien hrepuituhai
8 Mit nei si, indel tlat si,
Na nei si, sêt tlat bok sihai chu,
Hung thruoi khawm tawl ro.
9 Hnam tinreng thruoi suok unla,
Mi tin um khawm raw hai se.
Thil tlung ding hril lawk thei,
Thil tlung ta sahai hril thei bok,
An milim lai an um am a ni?
An indikzie hrietna dingin,
Hrepuitu hung thruoi raw hai se.
Mihaiin chu chu hre a,
“A’n dik” an ti theina dingin.
10 LALPA chun hieng hin a tih:
“Aw nangni Israelhai,
Ka thu hretu, ka siehlaw in nih.
Kei chauh hi Pathien ka nizie
Hre a, ring a, hre thiem dingin,
Nangni ka thlang chêu a nih.
Ka um hmaa um Pathien,
Ka um hnunga um Pathien,
Tu khom an um ngai dĕr nawh.
11 Kei chauh hi LALPA chu ka nih,
Kei chauh hi Sandamtu ka nih.
12 Keima ngeiin ka hril chêu a,
Sandamtu chu kei ngei ka nizie,
Keiman ka’n hriettir cheu a,
Kei anga thaw hnam dang pathien,
Tu khom an um ngai dĕr nawh.
Kei chauh hi Pathien ka nih,
Ka thu hrepuitu in nih,
Tiin LALPA chun a puong.
13 Chatuona inthok chatuon chenin,
A nih, kei hi Pathien chu ka nih.
Ka kuta inthoka inchŭ thla thei,
Tu khom an um hrim hrim nawh.
Ka thaw tah tu am sût thei?” tiin.
Babulona inthoka suokna
14 I Tlantu, Israel Mi Thienghlim,
LALPA chun hieng hin a tih:
“Nangni leiin Babulon rûntu ding,
Sipai ruol ka tir ding a nih.
Kaldaihai chu râltlan angin,
An uongpui an long lienin,
Ka hung thruoi tawl ding a nih.
15 Kei hi in Mi Thienghlim,
LALPA ngei chu ka nih,
Israelhai Siemtu in lal chuh.
16 LALPA chun hieng hin a hril:
Tuipuia lampui relpêktu ka nih,
Tui fawn laia lampui sieltu chu;
17 Sipai ruol tam tak ko suok a,
An tawlailirhai le sakorhai leh,
Tho nawk ta lo dinga sukpiltu le
Khawnvar anga hmet mittu chu.
18 Kha hmaa thilhai theinghilin,
Tien lai thil ngaituo ta naw ro.
19 En ro, thil thar ka thaw mek a,
Chu chu a hung suok tran mek a,
In man fuk thei naw a ni maw?
Ka mihai hung kirna dingin,
Thlalĕrah lam ka siem mek a,
Ram trâwlah vadung luong a tih.
20 Ka mi thlanghai dawn dinga,
Thlalĕr chu tuihnăra chawm a,
Ram châra tui kan luongtir leiin,
Ram sahan mi chawimawi an tih,
Sihal le simbu hai chenin.
21 Ka ta dinga ka siem an na,
An mi la chawimawi ding a nih.
Israelhai suolna
22 Nisienlakhom aw Jakob,
Nangin i mi ko naw a,
Aw ka mi Israelhai,
In mi nghok ta lem a nih.
23 Pumraw thilhlân beramhai,
In mi hung chawipek ta naw a,
Hlànbieknahai inhlànin,
In mi chawimawi ta bok nawh.
Bu le bâl le rimtui chawi a,
Hlànbiekna hung inhlàn di’n,
Ka phût ta ngai bok naw cheu.
24 Ka ta dingin mafu rimtui,
In hung chawi ta ngai naw a,
Hlànbiekna ran thau inhlànin,
In mi suktlai ta bok nawh.
In suolna hin a mi ngei a,
In bawsietnahai ka nghok tah.
25 Keima hi, keima ngei hi,
Keima le keima zâr chaua
In bawsietnahai thai bo a,
In suolhai theinghiltu ka nih.
26 Hun liem tah suikir unla,
Poi in tawk le tawk naw hril unla,
Hang ngaituo tlâng ei tiu khai.
27 In pa bulin thil suol a thaw a,
In thruoituhai ka lakah an hel.
28 Chuleiin, Tempula mi lienhai chu,
Muolpho takin siem tawl ka ta,
Jakob thlahai chu sietin nel a ta,
Israel chu nuizatbûr inchang a tih.