2 In lungrilah hmun mi’n kien ro. Tu poi khom kan tawk naw a, tu khom kan thruoi suol naw a, mani chan thratna dingin tu khom kan hmang ngai bok nawh. 3 Thiem naw inchangtir ding chêuin chu chu ka hril naw a, ka hril tah ang chêu khan kan lungrilah in um tlat a, nangni le chuh thi leh thi tlâng, dam leh dam tlâng kan inhuom a nih. 4 Ka ring zo ĕm êm chêu a, ka uongpui bok chêu a nih. Nasa takin in mi sukphŭr a, rinum tinrêng kan tuornaah khom lawmin ka sip liem hlak.

5 Makedonia kan hung tlung khom khan kan săwl a la dam chuong nawh, sîr tinah mi beiin, puo tienga inthoka mi do pawl le a sung tienga inthoka mi’n thri pawl an um bok a. 6 Sienkhom, mi chanhai-hai thlamuongtu Pathien chun Tita a hung khan a mi thlamuong tah a nih. 7 A hung tlung lei chauh khom ni loin, nangni leia a thlamuongna lei khomin a mi sukthlamuong bok a; in mi ngaizie dam, nasa taka in insǐrzie dam, kan ta dinga thrahnem in ngaizie dam a mi hril a, chu chun a mi suklawm zuol a nih.

8 Ka lekha khan in lung a sukna ti ka lo hrietin ka’n sǐr hman văng a, sienkhom ka lekha khan sawt naw te chauh a sukna chêu ti ka lo hriet nawk nghal leiin ka’n sǐr nawk ta nawh. 9 Tu hin chu ka lawm tah, in lung ka suknat lei ni loin, poitia in sim ta leiin. Pathien ditzawnga lungngai in ni leiin keini suknat in ni nawh. 10 Pathien tienga lungngaina chun sandamna dinga simna insîrum lo a’n tlungtir a; khawvel thila lungngaina ruok chun thǐna a’n tlungtir hlak. 11 Ngai ta u, Pathien ditzawnga in lungngai hin thrahnem a va’n ngaitir nasa chêu de aw! In indikzie suklang nuomna hai, mi suol theidăna le suol thaw inlaunahai in hung nei a; mi ngainat nachang dam, mi invoi nachang dam, mi suol hrem nuomna dam in hung nei thar ta hi! Hieng thil po poa hin in lo inkei zap ve dêr nawh ti nangni ngeiin in suklang chieng tah a. 12 In kuoma ka lekhathon kha thil suol thawtu amani le a thaw suolna tuortu lei amania ka ziek a ni naw a, Pathien mithmua kan ta dinga thrahnem in ngaizie nangni ngeiin in hmu suok theina dinga ka hung ziek a ni lem.

13 Hi lei hin kan thla a muong tah a, chu el bakah, in rênga Tita lungril in sukhar leia a lawm hmêl kan hmuin kan hlim nawkzuol a nih. 14 Tita kuoma hin ka uongpui hlè hlak chêu a, in mi sukhmâimawk naw hrim a. In kuoma thu kan lo hrilhai po po kha a’n dik ang bokin, Tita bula kan lo uongpuina cheu khom chu a’n dik ngeizie a hung inlang chieng tah a ni hih. 15 Chun, in rênga a thu in awizie dam, tri le inthin puma in lo lawmzie dam hre zingin a ngaina nawkzuol chêu a nih. 16 Kong tinrêngah ka ring ngam chêu leiin ka lawm a nih.