GALATI
Thuhma
Galati mihai kuoma Tirko Paula lekhathon hi Baibul pumpuia bu 48-na, bung 6 le châng 149 a sei a nih. Hi lekha hi Thuthlung Thar bu laia ziek hmasa tak nia ngaitu an tam. Jerusalem Inkhawmpui hnung ela ziek ni dinga ring pawl le chu hnung deu A.D 54-58 inkâr vêla ziek ni dinga ring an um bok.
Chanchin Thra a hung indar pei a, Jentelhai khomin an ring ve tah a. Kristien indik tak ni ding chun Judahai anga Mosie Dan le an ser le sang zawm kher a trûl le trûl naw thuah ngaidan a khuongruol naw leiin an thu chu rêl fel dingin Jerusalemah A.D 49/50 khan inkhawmpui hmasa tak an ko a, sienkhom chieng faka sukfelna a um naw a. Krista ringtu ni lei chaua Pathien hmaa thiem chang thei a ni leiin Jentel kristienhai chun Judahai Dan le ser le sang an zawm a trûl nawh tiin Paula chu a thrang a. Nisienlakhom, Galati rama Jentel ringtharhai chu Judahai chun Mosie Dan zawm ngei dingin an phŭt a, chu zirtirna chun mi tam tak an inhmin a, Peter chen khomin a lo zawmpui a. Chuonga zirtirna indik loa thruoi pêta umhai chun ring dàn indik an hung man nawk theina dingin hi lekhathon hi a ziek a nih. A thu uor tak chu, Dan zawm lei ni loa lunginsietna zara ringna leia mihriemin thiem a chang thu a nih. Thlarau ra le tisa thilhai thlier thiem ding dam, an zalenna le mawphurna chu hmang thiem ding le phur rik insawk ton dingin a’n fui mol mol a nih.
A sung thu tlangpui
Thuhma (1:1-10)
Paula Apostol a ni thu (1:11-2:21)
Pathien lungsietna Chanchin Thra (3:1-4:31)
Kristien zalenna le mawphurna (5:1-6:10)
Tlangkawmna (6:11-18)