Jerusalem sansuokna
52
1 Aw Zion har rawh, har rawh,Hratna thuomin inbel la,
Ropui takin inchei rawh.
Jerusalem, khawpui thienghlim,
I sungah sertan nawhai lûtin,
Sukporchè ta nawng an ti che.
2 I pilvut kai chu thin thla la,
Aw, Jerusalem, tho suok la,
Lalthrungphaah inthrung rawh.
Aw nang saltang, Zion naunu,
I rînga hrengkol kha sût ta rawh.
3 LALPA chun hieng hin a hril:
“Ieng khom loa zor hmang in na,
Tangka loa intlan ning in tih” tiin.
4 LALPA ka Pathien ngei chun,
Hieng ang hin a hril a nih:
“A hmasain ka mihai chu,
Aiguptaa chêng din an fe a;
Tu hin Asuria nĕksawrin an um.
5 “Tu hin iem ka nei ta a?
Ieng khom loin ka mihai chu,
Thruoi hmangin an um zo a,
An chunga rorêltuhai chun,
Nuizatbûrah an siem a,
Sŭnnithlâkin ka hming hi,
Chawl loin an hril siet zing.
6 Chuleiin, ka mihaiin,
Ka hming hi la hung hrieng an ta,
Chu ni chun keima ngei hi,
Hieng thil hril lawktu ka nizie
La hung hrieng an tih,
Keima ngei hi ka ni si a” tiin.
7 “I Pathien chun ro a rèl ie!”
Tia Zion kuomah hung hril a,
Inremna thu tlâng insampuia,
Thu thra lawmum hung hawn a,
Sandamna thu puongtuhai chu,
An pheikhai a va mawi de aw!
8 I ralvêngtuhai ri chu ngai rawh,
Hlima khĕk ruol an ni chu!
Zion-a LALPA hung kǐr chu,
Mit ngêia an hmu leiin.
9 Jerusalem tlu rama chênghai,
Hlim zai vâwrin khêk suok ro,
LALPAN a mihai thlamuongin,
Jerusalem a’n tlan ta si a.
10 LALPAN hnam tin mithmuah,
A bân thienghlim a phar suok a,
Ei Pathien sandamna chu,
Kawlkila umhai chen khomin,
An hmu ding a ni si a.
11 Suok ta ro, suok ta ro khai!
Chu taka inthok chun suok ro.
Thil thieng lo hrim tawk naw ro!
LALPA bùr le bèl chawituhai,
Thienghlim takin hung suok ro.
12 Hmawsarumin suok naw ro,
Râltlân angin suok bok naw ro;
LALPAN in hma thruoi a ta,
Israelhai Pathien ngei chu,
In hnung dâltu ni bok a tih.
LALPA siehlaw tuorna le ropuina
13 En ta u, ka siehlaw chun,
Var takin hung thawng a ta,
Dom sang le hlàng kai ning a ta,
Chawimawiin ngaisang an tih.
14 Tam takin pangzat an tih-
Hmêl pangngai put lo khopa
A hmêl an sukhempek a na,
Mihriem ruongam ang lo khopa,
A pienhmang an sukhem a nih.
15 Hnam tam tak thè fai a ta,
Maktiin lalhai kahâk an ta,
An la hmu ngai lo hmung an ta,
An la hriet ngai lo thil khom,
Hung hre thiem thei tang an tih.