4 Chu zan chun LALPA thu chu Nathan kuomah a hung tlung a, hieng hin a hril a: 5 “Fe la, ka siehlaw Davida kuomah LALPAN hieng hin a hril ti rawh: ‘Nangin ka umna ding in i mi bawlpek ding am a ni? 6 Aigupta rama inthoka Israel thlahai ka thruoi suoka inthoka tu chen hin inah ka um naw a, puon in le biekbŭkah ka um pei lem hlak. 7 Israel thlahai laia ka fèna po po le ka mi Israelhai enkoltu dinga ka ruot rorêltuhai kuoma khom, ‘Iengti dana sidar thingin in in mi bawlpek naw am a na?’ tiin ka hril hlak amanih?

8 “Chuleiin, ka siehlaw Davida kuomah, ‘Iengkim LALPA chun hieng hin a hril: Beram tlatna hmuna beram i veng lai ka mi Israelhai chunga hotu dingin ka lâk suok che a. 9 I fèna taphotah i kuomah ka um zing a, i hmaah i hmêlmahai ka sukbo pei a. Tuhin hnuoia mi ropui takhai angin i hming ropui takin ka siem ding a nih. 10 Ka mi Israelhai ta dingin hmun pe’ng ka ta, tu sukbuoi ta lo dingin anni hmuna ngei chun anni chu phun ka tih. Tuta hma ang khan mi rilohaiin sukrimsi ta naw ni hai a, 11 ka mi Israelhai chunga rorêltu ka ruot hlim lai ang kha ni ta bok naw ni a, i hmêlmahai po po lakah inchawldamtir ka ti che. LALPAN sungkuo indinpêk a ti che ti chu LALPA ngeiin a puong si a. 12 I nihai a kin phaa i thlatuhai kuoma i’n lawi ve pha chun nangma hung thlăktu ding chê i rîla ra ngei chu indin ka ta, a ram chu suknghet ka tih. 13 Ama chun ka hminga dingin in bawl a ta, a ram lalthrungpha chu kumkhuoa dingin suknghet ka tih. 14 A pa ni’ng ka ta, ama chu ka naupa ni’ng a ta, thil suol a thaw chun mihriem hmol le mihriemin an vuok angin thunun ka tih. 15 Amiruokchu i hmaa ka hnawl hmang, Saula kuta inthoka ka lak hmang ang khan, ka hmangaina chu a lakah la kîr ta ngai naw ning. 16 I sungkuo le i ram chu chatuona suknghet tlat ning a ta, i lalthrungpha khom chatuona suknghet ni bok a tih’ a tih tiin hril rawh” a ta.

17 Nathan chun inlarna thu po po chu a kip a kawiin Davida a hril a.

18 Lal Davida chu LALPA puon ina chun a lût a, LALPA hmaah a thrung a, a trongtrai a: “Aw LALPA Pathien, kei hi tu am ka ni a, ka sunghai khom ieng am an ni a, hieng chen rau i mi thruoi el hi? 19 Aw LALPA Pathien, chu khom chu huntawk la ti loin, i siehlaw sungkuo la hung um dan ding pei chen khom i hril a. Aw LALPA Pathien, hieng hi mihriem i thaw dan hlak hrim am a ni? 20 Chu bâk băk chu Davida hin ieng am hril sap ding ka nei a? Aw LALPA Pathien, i siehlaw hi i hriet vong si a. 21 I thu zăr le i ditzawng angin hi thil ropui tak hi i thaw a, i siehlaw kuomah i’n hriettir. 22 Aw LALPA Pathien, i va hang ropui ngei de aw! Kan nâ ngeia kan hriet angin, nang ang hrim tu khom an um naw a, nang naw chu Pathien dang hrim an um nawh. 23 Aigupta rama inthoka i mihai ni dinga hnam tin le an pathienhai laka inthoka i’n tlan suok Israelhai ang hi hnam dang tu khom hnuoia hin an um nawh. Thil mak le râpum tak tak i thawpek lei chun khawvel pumpuiah i hming a sukthang a. I ta ni dinga Aigupta rama inthoka i hung thruoi suok lai khan an hmaa hnam danghai le an pathienhai chu i hnot suokpek pei a. 24 Israelhai chu chatuona i mihai ni dingin i siem a, aw LALPA, nang chu an Pathien i hung ni tah.

25 “Aw LALPA Pathien, i siehlaw chungchang thu le a sungkuohai chungchang thu chu i tiem tah ang khan chatuona dingin suknghet la, i hril tah ang khan thaw rawh. 26 Chuongchun, mihaiin, ‘Iengkim LALPA chu Israelhai Pathien a nih’ ti’ng an ta, i hming chu chatuonin ropui a ta, i siehlaw Davida sungkuohai chu i hmaah suknghetin um an tih.

27 “Aw Iengkim LALPA, Israelhai Pathien, i siehlaw kuomah ‘Sungkuo indinpek ka ti che’ tiin i puong ta si leiin i siehlaw chun hi trongtraina hi i kuomah a hung intlun ngam a nih. 28 Aw LALPA Pathien, nang chu Pathien i ni a, i thu chu innghatna tlâk a ni a, i siehlaw kuomah thil thrâ i tiem ta a. 29 Chuleiin, i siehlaw sungkuohai chu i hmaa chatuona an um zing theina dingin malsawm rawh. Aw LALPA Pathien, i malsawmna zarin i siehlaw sungkuohai chu chatuonin malsawmin um an tih ti i tiem ta sa a ni kha” tiin.