7 Chuongchun, thu a mi pĕk ang chun ka hril a. Ka hang hril chun ri a hung um a, a hung inri rok rok a, ruhai chu mani inzompui senga chun an inchuktuo khawm a. 8 Ka hei en chun, ngai ta, anni thahrui seng an hung put a, taksain a hung tuom a, vunin a hung inkhum a, thuok ruok chu annia chun a um nawh. 9 Chuongchun, ama chun ka kuomah, “Mihriem naupa, thli kuomah thu hril la, hril ngei ngei la, hieng hin ti rawh: ‘LALPA Pathien chun hieng hin a tih: Aw Thuok,^a kawl kil lia inthokin hung la, hieng thata um tahai hi an hring theina dingin hung mût rawh’ ti rawh” a mi ti a.

10 Chuongchun, a thupêk ang chun ka hril a, thuok chu anniah a hung lŭt a, an hung hring a, mani ke sengin an ngir a, sipai ruol ropui tak an hung ni ta a. 11 Ama chun ka kuomah, “Mihriem naupa, hieng ruhai hi Israel sungkuo pumpui an nih. Ngai ta, anni chun, ‘Kan ruhai a trăwl zo a, kan beisei a bo zo ta a, săt thlâkin kan um tah’ an lo ti hlak a. 12 Chuleiin, an kuomah thu hril la, Lalpa PATHIEN chun hieng hin a ti a nih: ‘Ka mihai ngai ro, in thlănhai hong ka ta, in thlăna inthokin insuoktir ka ti cheu a, Israel ramah thruoi lût nawk ka ti chêu. 13 In thlănhai honga ka’n suoktir phâ cheu chun, aw ka mihai, LALPA chu ka nih ti hre ta’ng in tih. 14 Nangniah ka thlarau sieng ka ta, hring in ta, in ram ngĕiah sie nawk ka ti chêu’ tiin kei LALPA hin ka hril ta a, thaw ngei bok ka tih ti hrieng in tih, ti hi LALPA thu suok a nih” a ti a.

15 LALPA thu chu ka kuomah a hung tlung a. 16 “Mihriem naupa, hmol pakhat la la, hmola chun ‘Juda le a zompui Israel nauhai ta’ tiin ziek rawh. Hmol dang la bok la, chu hmola chun, ‘Efraim hmol, Josefa le a zompui Israel sungkuo po po ta’ tiin ziek rawh. 17 Chu hmol pahnihai chu kei kop rawh, hmol pakhata i hmang theina dingin.

18 “Chun, i hnam chanpuihaiin, ‘Hieng hi ieng tina am a nih ti mi hril thei i tim?’ tia an indon che chun, 19 an kuomah ‘Lalpa PATHIEN chun hieng hin a tih: Efraim kuta um Josefa hmol chu lang ka ta, a zompui Israel suongkuohai hmol chu la bok ka ta, Juda hmol leh inzom ka ta, thing hmol pakhatah siem ka ta, ka kutah hmol pakhat hung ni tang an tih’ i ti ding a nih. 20 An mithmua ngei thu i ziekna hmol kha chawi la, 21 an kuomah hieng ang hin hril rawh: Lalpa PATHIEN chun hieng hin a tih: Israelhai chu an fèna hnamhaia inthok chun la suok ka ta, hmun tina inthokin thruoi khawm ka ta, an ramah hung thruoi kîr ka tih. 22 Chu ram, Israel tlângahai chun hnam pakhatah indin ka ta, an rênga chungah lal pakhat chauh um a ta, hnam hniin inthre ta naw ni hai a, ram pahniin inthrè dar ta bok naw ni hai. 23 An limbiekhai, mi lim suol chi hrang hrang le thil poi an tawk hlakhai chun insukporchè ta naw ni hai a, an hnungtol ding vêng ka ta, tlĕng fai tawl ka tih. Ka mihai ni’ng an ta, kei hi an Pathien ni’ng ka tih.

24 “Ka siehlaw Davida chu an chunga lal ni’ng a ta, an rêngin berampu pakhat nei tang an ta, ka danhai zui an ta, ka thu ruothai fimkhur takin vong tang an tih. 25 Ka siehlaw Jakob kuoma ka pek, in pi le puhai chĕngna rama chun chêng an ta, anni le an nauhai, an nauhai nauhai khom kumkhuoin chêng tang an ta, ka siehlaw Davida chu kumkhuoin an hotu ning a tih. 26 Inremna thuthlung siempui ka ta, chu chu an ta dingin kumkhaw thuthlung ning a tih. Anni chu suknghet ka ta, sukpung bok ka ta, anni lai ka biekbuk kumkhuoin indin ka tih. 27 Ka chĕngna hmun chu anni lai um a ta, an Pathien ning ka ta, ka mihai ning an tih. 28 Kumkhuoa anni lai ka biekbuk a um pha chun kei, LALPA hi Israelhai sukthienghlimtu chu ka nizie hnamhaiin hre tang an tih’ ti rawh” tiin.