3 Intangtirtu Juda lal Zedekia chun Jeremia kuomah, “Ieng leia thil hril lawk i chîng am a na? Hieng hin i hril a, ‘Hieng hin LALPA chun a tih: Hi khawpui hi Babulon lal kutah ka pêk trèp a, ama chun a lak ding a nih. 4 Juda lal Zedekia chu Babulon lal kuta inthokin tlân suok naw ni a, a kutah pĕkin um a ta, hmai intonin, a mit ngeiin hmung a tih. 5 Zedekia chu Babulon ramah thruoi a ta, ama ka kan hmâ khat chu chutaka chun um zing a tih. Kaldai mihai chu do inla khom hlawtling chuong naw ti niu. Chu chu LALPA thu suok a nih’ ti damin ieng leia i hril am a na?” a ta.

6 Jeremia chun, “LALPA thu chu ka kuomah a hung tlung a: 7 Ngai rawh, i papui Salum naupa Hanamel chu Anathot khuoa inthokin i kuomah hung a ta, ‘Ka lo mi’n chawpek rawh, nang chu laichin hnai le an ro khom khawm thei, a’n chawtu ding tak i nih’ tiin a hung ngèn ding che a nih” tiin.

8 LALPA hril ang ngei chun ka papui naupa Hanamel chu lal vêngtuhai inkulna sunga chun a hung a, ka kuomah, ‘Benjamin rama Anathot khuoa ka lo inchaw ta la, ka ro inkhawm theitu i ni leiin a’n tlantu ding tak i na, i ta dingin inchaw el rawh’ a ta. Chuongchun, hi hi LALPA thu ngei kha a nih ti ka hriet ta a. 9 Ka papui naupa Hanamel, Anathot khaw mi lo chu ka’n chawk ta a, tangka chu kan hang bûk a, tangkaruo sekel sawm le pasari a nih. 10 Inchawkna lekhaa chun ka hming ka ziek a, suoi ka nam a, hrepuituhai hming kan inziektir bok a, phahlaa chun tangkaruo chu kan bùk a. 11 Inchawkna lekha, inchawk a ni dan le a umzie ziekna le suoi namna kawpi le suoi nam lo kawpi chu ka lâk a, 12 chuong lekhahai chu ka papui naupa Hanamel le hrepuitua hming chuonghai mithmua le vengtuhai inkulna huong sunga Juda inthrunghai po po mithmua chun Maseia naupa Neria naupa Baruk chu ka pêk a.

13 Chuonghai hmaa chun Baruk chu hieng ang hin thu ka pêk a: 14 ‘Hi hi Iengkim LALPA, Israel Pathien hril chu a nih: Hieng lekhahai, inchawkna lekha, suoi nam le nam nawhai hi sawt tak a um theina dingin pil bêlah sie rawh. 15 Israel Pathien, Iengkim LALPA chun, ‘Hi rama hin in hai, lo hai le grep huon hai mihaiin an la’n chawk ding a nih, a tih’ tiin.

16 Neria naupa Baruk kuoma inchawkna lekha ka pek zo chun LALPA kuomah ka trongtrai a: 17 “Aw Lalpa Pathien, i thilthawtheina nasa tak hmanga bân meu pharin hnuoi le vanhai i siem a. Ieng khom i ta ding chun thaw harsa a um nawh. 18 Sang tam tak chungah i hmangaina i’n langtir a, an pahai suolna leiin an nauhai i hrem bok a. Aw Pathien ropui le thilthawthei, i hming chu Iengkim LALPA a na, 19 i thiltumhai a lien a, i thilthawhai a ropui a. Mihriem nauhai um dan po po i hmu vong a, mi tin an um dan le thilthaw phu ang peiin lawmman i pek hlak. 20 Aiguptaa khan inchikna le thil mak tam tak i thaw a, tu chen khom hin Israelhai le mihriemhai po po chungah i la thaw zom zing a, chu chu i nina hrim, i hming sukthangtu a nih. 21 I mi Israelhai chu Aigupta rama inthokin inchikna le thil mak leh, i kut thilthawtheina chu pharin, thil rapthlak tak tak thawin i thruoi suok a. 22 Hi ram, nenetui le khuoizu luongna ram, an pi le puhai kuoma pek i lo tiem tah chu, i pêk a. 23 An hung lŭt a, an hluo a, sienkhom i thu an awi naw a, i dàn an zawm naw a, i thupêk angin an thaw bok nawh. Chuleiin, hieng sietnahai hi an chungah i hung intlungtir a nih.

24 “En ta, khawpui inhuolna le lakna dinga hnuoi an sung pawng kuol po po hi? Kawlhnâm le trăm le hripui leiin khawpui chu a hung beitu Babulon mihai kutah pĕkin a um ding a ni si a. I hril tahai po po kha i hmu ang hin a hung tlung mek tah a ni hi. 25 Aw Lalpa Pathien, khawpui chu Babulon mihai kutah pek ding ni sien khom, nang ngeiin ‘Lo chu tangkain inchaw la, hrepuitu ko rawh’ i mi ti bok si a” tiin.

26 Chu zoah LALPA thu chu Jeremia kuomah a hung tlung a: 27 “Kei hi LALPA, mi po po Pathien chu ka nih. Ka ta dingin thaw harsa taluo a um am a ni? 28 Chuleiin, LALPA chun hieng hin a tih: Hi khawpui hi Babulon mihai le Babulon lal Nebukadnezzar kutah ka’n hlàn trêp a, ama chun lang a tih. 29 Hi khawpui rûntu ding Babulon mihai chu hung lut an ta, raw’ng an ta, kàng dur dur a ta, ka lungsenna cho phawk dinga Baal kuoma rimtui inhlàn a, pathien danghai kuomah inthawia dawn ding an bun thlakna in chung po po khom raw chim vong an tih.

30 “Israelhai le Judahai chun an tleirawla inthokin ka mithmuah thil suol naw chu ieng khom thaw an nei nawh. A nih, Israelhai chun kuta an siem fawm milima mi cho phawk naw chu ieng dang khom thaw an nei nawh” ti hi LALPA thu suok a nih. 31 Hi khawpui hi an rela inthoka tu chen hin, ka mithmua inthoka sukbohmang dai awm hrimin, ka lung suksenna ding ngot an thaw ngat ngat a nih. 32 Israel le Juda mipuihai, an lal hai, hotu hai, thiempu hai, zawlnei hai le Juda mi le Jerusalema mihai chun ka lungsenna dingin thil thra lo ngot an thaw a. 33 Ka tieng ngha loin tukhnungkhur an mi’n nghat a, zirtir ngat ngat tawl lang khom an ngaithlak nuom naw a, insiem thrat an tum bok nawh. 34 Ka hming chuongna in chu sukporche dingin milim tirdakum an lak lut a. 35 Ben Hinom ruomah Baal ta dingin hmun sânghai an bawl a, an naunuhai le naupahai chu Molek kuoma meia inhlàn dingin an pèk a; chuong thil chu thaw dingin thu ka pêk ngai naw a, hieng thil theidaum hi thawin Judahai chu suol inthawtir an tih ti khom ka ngaituonaah a lût ngai hrim hrim nawh.

36 Hi khawpui chungthua ‘kawlhnâm le tràm le hripui hmangin Babulon lal kutah pĕk ning a tih’ tia i hril hlak thua khan LALPA, Israel Pathien chun hieng hin a tih: 37 ‘Ka lungsen inling laia ka hnot hmangna ram po poa inthok chun anni chu hi hmuna hin hung thruoi khawm nawk ka ta, him takin inumtir ka tih. 38 Ka mihai ning an ta, kei an Pathien ning ka tih. 39 Anni thratna ding le an thlahai thratna ding le kumkhuoa an mi trì song theina dingin, anni chu lungril hmunkhat inputtirin zai khatin inluongtir ka tih. 40 An kuomah kumkhaw thuthlung siem ka ta, an thratna ding thaw ma ngai nawng ka ta, an mi nghatsan nawna dingin, mi tri nachang an lungrilah sieng ka tih. 41 An thratna ding thaw chu ka lawmzawng ning a ta, ka lungril po poin hi rama hin phun nghet tawl ka tih.”

42 LALPA chun hieng hin a tih: “Hi mihai chunga thil thra naw ka’n tlungtir ang bok khan an kuoma thil thra ka tiem po pohai kha intlungtir ka tih. 43 ‘Hi rausan ram, sa le mihriem an cheng ta nawna ram, Babulonhai kuoma pĕk suok ta hnung ram’ in ti ngeia hin mihaiin in le lo an la’n chawk nawk ding a nih. 44 Benjamin rama hai, Jerusalem le a se vel khuoa hai, Judai ram khawpuia le tlangram khuoa hai, thlang tieng phai thruta hai le sim tieng khawpuia hai chun mihaiin tangkain lo inchawng an ta, inchawkna lekha ziek an ta, suoi nam an ta, hrepuituhai ko an tih; an vangneina chu ka sukhmuingil nawk ding a ni si a’ ti hi LALPA thu suok a nih.