Phâr sukdam
8
1 Tlânga inthoka a hung thlak chun mipui tam takin an zui a. 2 Phâr pakhat a kuomah a hung a, kûnin a chawibiek, “Lalpa, i nuom chun i mi sukthieng thei” a ta. 3 Isu chun a hei ban a, a them a, “Nuom e, lo inthieng ta rawh” a ta, phâr chu a’n thieng ta nghal a. 4 Isun a kuomah, “Tu kuoma khom hril naw rawh, amiruokchu thiempu kuomah fe la, i dam ngei ti mihaiin an hrietna dingin Mosien thil inhlàn dinga a ti chu va’n hlăn rawh” a ta.Sipai zahotu siehlaw a sukdam
5 Kapernaum khuo a hung lut chun a kuomah sipai zahotu a hung a, 6 “Lalpa, ka siehlawpa a zeng a, inah a zâl zing a, a na inrim hle a nih” tiin thrangpuina a hni a. 7 Isun a kuomah, “Hung ka ta, hung sukdam ka tih” a ta. 8 Sipai zahotu ruok chun, “Lalpa, ka in sunga ko lut tlâk che ka ni nawh, thu chauh hril la, ka siehlaw chu dam el a tih. 9 Kei khom mi thu hnuoia um ka na, ka hnuoiah sipai an um nawk sawng a, ‘Fe rawh’ ka ti chu a fe a, ‘Hung rawh’ ka ti chu a hung el a. Ka siehlaw khomin ‘Hi hi thaw rawh’ ka ti chu a thaw el hlak” a ta.
10 Isun chu chu a hrietin mak a ti hle a, a zuituhai kuoma chun, “Thu dik ka hril chêu hi, Israel lai khom hieng lawma ringna nasa hi tu khom ka hmu nawh. 11 Ka hril chêu hi, sak le thlanga inthokin mi tam tak hung an ta, van rama chun Abraham hai, Isak hai, Jakob hai leh ruoi la kîl tlâng an tih. 12 Sienkhom, van ram khuo le tuia pieng ni sihaia ruok chu tuol inthimah hnot suok ning an ta, chu taka chun trapin ha râwt an tih” a ta.
13 Sipai zahotu kuoma chun Isun, “Fe la, i hni ang chun hung tlung a tih” a ta. Chuongchun, chu darkar ngei chun a siehlaw chu a dam ta a.
Mi tam tak a sukdam
14 Peter ina Isu a hung lut chun Peter tarpi, khawsika lo zăl chu a hmu a, 15 a kut a thempek a, a khawsik chu a rè ta nghal a; a tho a, fak ding a buotsaipek a. 16 Zan tieng chun ramhuoi zawl tam tak an hung thruoi a, thu pein ramhuoihai chu a lo hnot suok a, damnaw hung po po chu a sukdam bok a. 17 Zawlnei Isaiin,
“Ama chun ei hrat nawnahai a lâk a,
Ei hrivoihai a phur”
tia a ziek kha a hung tlung kimna ding a nih.
Isu zui tumtuhai
18 A kawl vela um mipui tam tak a hmuin Isu chun a zirtirhai chu ràl khing tieng kai dingin thu a pêk a. 19 Dan zirtirtu pakhat hi a kuomah a hung a, “Zirtirtu, i fèna taphotah zui ka ti che” a ta. 20 Isun a kuomah, “Sihalha’n kuo an nei a, chungleng vatehai khomin riebûk an nei a, Mihriem Naupa ruok hin chu lu nghatna a nei nawh” a ta. 21 Mi dang, a zirtirhai laia pakhat chun Isu kuomah, “Lalpa, ka pa la va vûi zet ka ti aw” a ta. 22 Isu ruok chun, “Mi zui rawh, mithihai chun anni mithihai chu lo vui el raw se” a ta.
Isu’n tuifawn a hal rè
23 Chuongchun, longah a chuong a, a zirtirhaiin an zui a. 24 Thawk-le-khatah dila chun thlipui na tak a hung hrâng thut a, tuifawn chu longah a’n vawr lut hlup hlup a, Isu ruok chu a in a. 25 Zirtirhai chun an va kei tho a, “Lalpa, mi sanhim rawh, kan pil hmang el ding an ta hi” an ta. 26 Isu chun an kuomah, “Ringna tlawmhai, ieng dinga chuong lawma in tri?” a ta. Chuongchun a tho a, thli le tuifawn chu a hal a, a rè ta thrup a. 27 Mihai chun mak an ti hle a, “Hi pa hi mi ieng ang am an ta le? Thli le tuifawn chenin a thu an awi a ni hih!” an ta.
Ramhuoi zawl pahni sukdam thu
28 Ràl khing tieng Gadarinb mihai ram an va tlung chun, thlânmuola inthoka hung ramhuoi man pasal pahniin an hung pan a, an kol êm leiin chu lampui chu tu khomin an hraw ngam nawh. 29 Anni chun, “Pathien Naupa, kan chungah iem thaw i tum hrim hrim? Hun tiem a tlung hmaa mi soisa dingin i hung a ni maw?” tiin an lo khĕk khum a. 30 Chu taka inthoka hla nawtea chun vok ruol an tla sup sup a. 31 Ramhuoihai chun, “I mi hnot suok chun vok ruol sunga son mi’n luttir rawh” tiin Isu an ngên a. 32 Isu chun an kuomah, “Va lût ro” a ta. Chuongchun, an hung suok a, vok ruol sunga chun an lut a, vok ruol chu dil pang trênbarama chun an tlàn liem a, tuiah an tla hlum ta vong a. 33 Vok vêngtuhai chu khuo tieng an tlàn a, thil um dan po po le ramhuoi manhai chunga thil tlung chu an va hril a. 34 Chuongchun, a khaw nâwtin Isu hmu dingin an hung inthok suok a, ama an hmu chun an biel suoksan dingin an ngèn a.