Isu thlèma a um thu
4
1 Isu chu Thlarau Thienghlima sipin Jordan vadunga inthokin a kîr a, Thlarauin thlalêrah a thruoi a, chu taka chun ni sawmli sung Diebolin a thlêm a. 2 Chu hun sung po po chun ieng khom a fâk naw a, a tawpah a phǐng a hung trăm ta hle a.3 Chuongchun Diebolin a kuomah, “Pathien Naupa i ni takzet chun hi lung hi beia inchang dingin thu pe rawh” a ta. 4 Isu ruok chun, “‘Mihriem hi bei chauin a hring nawh’ ti ziek a nih” a ta.a
5 Chu zoa chun Diebolin hmun insâng takah a thruoi a, voi le khatah khawvela lalram po po a’n entir a. 6 Diebol chun a kuomah, “Hieng po po chunga thuneina le ropuina hi peng ka ti che; ka kuoma pek vong a ni tah a, ka nuom nuom ka pêk thei a nih. 7 Mi chawibiek la, i ta ni vong a tih” a ta. 8 Isu ruok chun, “‘Lalpa i Pathien chawibiek la, ama rong chauh bawl rawh’ ti ziek a nih” a ta.b 9 Diebol chun Jerusalemah a thruoi a, Tempul sîpzumah a’n ngǐrtir a. “Pathien Naupa i ni takzet chun hi taka inthok hin inchawm thla rawh:
10 ‘Vantirkohai thu pêng a ta,
I lam tinah vêng an ti che;
11 An kutin chawi an ti che a,
Lungah i ke sui naw ti nih’
ti ziek ang khan” a ta.
12 Isu chun, “‘Lalpa i Pathien fie naw rawh’ ti ziek a nih” tiin a don a.
13 Diebolin thlĕmna tinrênga a thlĕm hnung chun remchâng nawk huna dingin a fesan tah a.
Galili ramah Isun rong a bawl tran
14 Isu chu Thlarau thilthawtheina leh Galili ramah a kîr nawk tah a, a chanchin chu a ram phêkin a’n thang vĕl a. 15 Sunagogah hai mi a zirtir a, mi tin inpâk a hlaw a.
Nazaretah Isu a hnong
16 A seilienna Nazaret khuo chu a hung tlung a, a thaw dan pangngaiin Sabat ni chun Sunagog-ah a lut a, thu tiem dingin a ngir a.c 17 Zawlnei Isai lekhabu an pĕk a, lekhabu zuol chu a sût a, hi lai thu hi a hang phar a:
18 “Lalpa Thlarau chu ka chungah a um a,
Riengvaihai kuomah Chanchin Thra,
Hril dingin hriek a mi năl a;
Saltănghai zalĕnna ding thu dam,
Mitdelhai mit varna ding thu dam,
Nêksawra umhai sansuokna thu dam,
19 Lalpa lungawi kum thu dam
Puong dingin a mi tir a nih.”
20 Lekhabu chu a zuol a, rongbawltu chu a pêk nawk a, a thrung tah a. Sunagoga inkhawm po po mit chu a chunga a fu thrup a. 21 Ama chun an kuomah, “Hi Pathien Lekha thu hi voisun hin in hrietah a hung tlung tah” tiin a hril tran a. 22 An rêng chun an inpăk a, a bău thu suok ditum tak chu mak an ti hle a, “Hi mipa hi Josefa naupa kha a ni nawm a nih?” an ti tawl a.
23 Ama chun an kuomah, “‘Daktor, nang insukdam rawh’ an ti hlak ang hin nangni khomin ‘Kapernaum khuoa i thilthaw kan hriet ang kha i khuoa khom hin thaw ve ta la’ in mi la ti ngei awm hi” a ta. 24 A hril pei a “Thu dik tak ka hril chêu hi, zawlnei tu khom ama khuo tieng mihaiin an lawm ngai nawh. 25 Diktak chun, Elija dam laia kum thum le thla ruk khuo a’n thrăl a, khawvela trăm nasa tak a tlàk lai khan, Israel ramah hmeithai tam tak an uma chu an kuomah Elija kha tir a ni naw a, 26 Sidon biela Sarepta khuoa hmeithai pakhat kuoma chauh tir a ni lem kha. 27 Zawlnei Elisa dam lai khom khan, Israel ramah phâr tam tak an uma chu, anni lai Suria mi Naaman ti chauh naw chu tu khom sukthieng an ni naw kha” a ta. 28 Sunagoga inkhawmhaiin chuong thu an hriet chun an lung a khei ĕm êm a. 29 Chuongchun, an tho a, khuoa inthok chun an hnŭk suok a, răwla nam thla dingin an khaw bul rawl koa chun an thruoi a. 30 Nisienlakhom, mipui chu a tan tlang a, a fesan tawl tah a.
Ramhuoi zawl sukdam thu
31 Galili rama khaw pakhat Kapernaumah a zu fe a. Sabat ni chun mihai a zirtir a, 32 thu nei taka a’n chuktir lei chun a zirtirna chu mak an ti hle a. 33 Sunagoga chun ramhuoi zawl pakhat, thlarau tirdakum kol a um a, ama chun rawl inring taka khêkin, 34 “Eheu! Nazaret Isu, nangin ieng am mi law i tum a na? Mi sukse dingin i hung a ni? Tu’m i nih ti ka hriet- Pathien Mi Thienghlim chu i nih” a ta. 35 Isu chun a hal a, “To la, a sunga inthok khan hung suok rawh” a ta. Ramhuoi chun hnuoiah a sukthlŭk a, sukna loin a suoksan tah a. 36 An rêng chun mak an ti a, “Hi hi ieng thu am an ta leh? Thuneina le thilthawtheina hmangin thlarau tirdakumhai thu a pêk a, an suok el ta hi!” an ta. 37 Chuongchun, chu lai khaw se vêla chun a chanchin chu a’n thang tah a.
Mi tam tak a sukdam
38 Chun, a tho a, Sunagoga inthok chun Simon inah a lut a. Simon tarpi chu a khawsik a’n sang leiin Isu thrangpuina ama nu ta dingin an ngên a. 39 A khum bula chun a va ngîr a. khawsik chu a hal a, a rè tah a. Chuongchun, a tho thei ta nghal a, fak rong a bawlpĕk a.
40 Nisa tlâk vĕl lai chun damnaw, natna chi hrang hrang neihai chu Isu kuomah an hung thruoi a, an chungah kut a lo innghat a, a sukdam tawl a. 41 Ramhuoihai khomin, “Pathien Naupa i nih” tia khêkin mi tam tak sunga inthokin an hung suok bok a; anni chu Isun a hal a, Krista a nih ti an hriet leiin an trong a phal nawh.
42 A zing vartrien chun hmun fienrielah a fe a, mipuiin an zong a, a kuomah an hung a, anni fesan lo dingin an thlo a. 43 Nisienlakhom, ama chun, “Khaw danga khom Pathien Chanchin Thra ka hril a trûl, chu dinga tir ka ni si a” a ta. 44 Chuongchun, Judaid ram sunagoga hai a lût a, thu a hril zui ta pei a.