Mi dang soisela
7
1 “Soisêl naw ro, soisêla in um nawna dingin. 2 In soisêlna ang charin soisêl ning in ta, in inkhìna ngeiin inkhìpêk an ti chêu. 3 Iengtiziea mani mita thingtum um chu ngaimaw si loa i unau mita thil hlek um chu i hmu am a na? 4 Mani mita thingtum um zing siin i unau kawlah ‘Khawm, i mita thil hlek kha mi’n lâk suoktir rawh’ iengtin am i ti thei ding? 5 Lêmdertu, nangma mit ngeia thingtum inkhang kha la suok hmasa zet la, i unau mita thil hlek lak suok ding chu hmu fie thei tang i tih.6 “Ui chu thil thienghlim pe naw ro; vok hmaa khom in tuikeplung vor bok naw ro. In thaw vaih chun chîl hrep an ta, chu zoah nangni tieng hung truongin phir chen neng an ti cheu.
Hni, zong le kik
7 “Hni ro, pèk ni’ng in tih; zong ro, hmu’ng in tih; kik ro, kot chu hongpêk ni’ng in tih. 8 A hni taphotin an dong hlak a, a zong taphotin an hmu bok hlak a, a kik taphot chu kot hongpek ni’ng an tih. 9 Anleh, nangni lai tu khom a naupain bei hni ta sien, tuin am lung a pêk ding? 10 Nga hni sien, tuin am rûl a pêk ding? 11 Nangni mi suolhai hmanin thil thra in nauhai pĕk nachang in hriet si chun, in Pa vana mi lem chun a hnituhai chu thil thra a va pêk rawn awm ngei de!
12 “Chuongchun, thil iengkimah miin in chunga an thaw dinga in dit dan ang takin mi chunga khom thaw ve ro; chu chun Dan le zawlneihai thu a fûn khawm vong a nih.
Kotkhar chîn
(Lk 13:24)
13 “Kotkhar chîna chun lut ro. Bohmangna kotkhar chu a lien a, a lampui khom a lien bok a, chu tienga lut chu an tam bok. 14 Hringna kotkhar ruok chu a chîn a, a lampui khom a’n chêp a, a hmutu khom tlâwmte an nih.
Thing thra a ra a thra
15 “Zawlnei tehlèmhai laka chun fimkhur ro, chuonghai chu beram vun silin in kuomah an hung a, sungril tieng ruok chu satene hnukrawl ang an nih. 16 Anni chu an raah hrieng in tih. Hling bukah grep an lo hlak am a ni? Intŭn bukah theichang an lo hlak maw? 17 Chuong ang bokin, thing thra chu a ra a thra hlak a, thing sie hlak a ra thra thei bok nawh. 18 Thing thra chun ra sie a’n suo thei naw a, thing thra naw chun ra thra a’n suo thei bok nawh. 19 Thing tin ra thraa ra naw taphot chu an phŭr a, meiah an pei hlak. 20 Chuongchun, anni chu an raah hrieng in tih.
21 “‘Lalpa, Lalpa’ mi ti nazong van ramah lut naw ni hai, ka Pa vana mi ditzawng thawtuhai chauh lut an tih. 22 Chu ni-a chun mi tam takin, ‘Lalpa, Lalpa, i hmingin thu kan hril a, i hmingin ramhuoihai kan hnot suok a, i hmingin thilmak tam tak kan thaw hlak an nawm a ni?” la ti’ng an tih. 23 Chu huna chun, ‘Nangni thil suol thawtuhai, ka hriet ngai naw cheu, ka kuoma inthokin fe hmang dai ro’ tiin anni chu la hril ka tih.
In bawltu chi hni
24 “Chuleiin, hieng ka thuhai hi hre a, a tak ngeia zawmtu taphot chu mi var, lungpui chunga in bawltu ang chu a nih. 25 Ruo a hung sŭr a, vadung tui a hung lien a, thli a hung hrăng a, in chu a hung nam sok sok a, sienkhom a tlu nawh, lungpui chunga rem a ni tlat leiin. 26 Sienkhom, hieng ka thuhai hi hre a, a taka zawm si lo chu mi invêt, phaiphin chunga in bawltu ang chu a nih. 27 Ruo a hung sŭr a, vadung tui a hung lien a, thli a hung hrăng a, chu in chu a hung nam sok sok a, a tlu sop ta ruop el a nih” a ta.