MARKA
Thuhma
Marka ziek hi Baibul pumpuia bu 41-na, bung 16 le chang 678 a sei, Rom khuoa Peter thuhrila inthoka Jentel mihai hriet thiem thei zawnga Grik tronga A.D 63 lai vel an naw leh Jerusalem siet hnung A.D 72 vela Marka ziek niin an hril. A ziektu Marka hi Johan Marka an ti, Jerusalem khaw mi, a nu Mari, Paula inzin voi khatnaa thrang ve kha nia ngai a nih.
Marka hin “Pathien Naupa Isu Chanchin Thra’ tiin a thu ziek chu a tran nghal a, Isu chu thilthawthei tak le thunei tak a nizie chu a zirtir dana hai, ramhuoi chunga thu a nei dana hai, mihai suol ngaidam theina a nei dana hai a tar lang a. Isu chu ‘Mihriem Naupa’ niin, a hringna ngei inhlăn a, suola inthoka mihriemhai san suoktu ding a nizie thu a hril uor.
Marka hin Isu rongbawl sunga a thu hril le a zirtirhai hril uor nêkin rongbawltu a nina, a thilthaw tieng a hril uor lem a. A pieng thua tran ve loin, Baptistu Johan chanchin tlawmte le Isun baptisma a chang thu le thlĕma a um thu a hril zoin sukdamna le zirtirna rongbawla an hmang thuah a lût nghăl a. Hun iemani chen hnung chun a zirtirhai khomin a nina an hung hriet tiel tiel a, ama dotuhai an hung pung tuol tuol bok thu a hril a. A tawpah Isu hemdea a um thu le a thonawknain a suktawp a. A châng tawpna 16: 9-19 hi a bu hlui threnkhata chu a um ve naw a, mi dangin a hnunga an hung belsa nia ring pawl an um.
A sûng thu tlangpui:
Chanchin Thra intran thu (1:1-13)
Galilia Isu rongbawlna (1:14-9:50)
Galilia inthoka Jerusalem a pan thu (10:1-52)
Jerusalem le a sevela Isu hun hnuhnung (11:1-15:47)
Isu thonawkna (16:1-8)
Isu inlârna le van lawn thu (16:9-20)