4 Chun, mipui tam tak, khaw hrang hranga inthoka ama pana hung fuon khawmhai kuoma chun tekhinthu a hril a. 5 “Bu chi thĕtu chu bu chi thein a fe a; chuonga bu chi a hang thè chun a thren lamah a tla a, miin an sir hmăt a, chunglĕng vatehaiin an tlàn zo tah a. 6 A thren pielthlengah a tla a, a mawnga chu a hnâwng naw leiin a rop nawk el a. 7 A thren chu hling buk lai a tla a, hlo hung inthrang chun a dîp ral a. 8 A thren ruok chu hnuoi thraah a tla a, a hung inthrang lien a, a lêt zain a ra tah a” a ta. Chu chu a hril zo chun rawl inring taka khêkin, “Ngaithlakna dinga na nei chun ngaithla ngun raw se” a ta.

9 A zirtirhai chun a tekhinthu hril umzie chu an indon a. 10 Ama chun, “Pathien ram thurûk chu nangni hriet dinga phal a na, mi dang kuoma ruok chu tekhinthu hmangin ka hril a nih, chuongchun, hmu zing sia an hmu fie thei nawna ding le ngaithla zing sia an hriet thiem nawna dingin.

11 “Tekhinthu umzie chu hi hi a nih: Bu chi chu Pathien thu a nih. 12 Lampuia tla chu thu ngaithlatu an na, an awi nawna ding le sandam an ni thei nawna dingin Setan a hung a, an lungrila inthokin thu chu a lâk hmangpek hlak. 13 Pielthlĕng chunga tla chu, thu an hriet chara lawm taka pomhai hi an nih; nisienlakhom zung hrim an thlăk naw a, sawtnawte an hang awi dea chu, fiena an tuok pha an tlŭksan nawk el hlak. 14 Hlingbuk laia tla chu thu an hriet a, sienkhom damsung khawsak lungkhamna hai, hausakna hai le inhoitirna hai chun a dîp a, ra puitling an insuo thei ta naw a. 15 Hnuoi thraa tla chu thu hre a, lungril indik le thra put a, vong tlat a, tuorsel taka beia ra insuohai hi an nih.

16 “Tu khom khawnvar sitin bêlin an khup khum ngai naw a, khum hnuoiah an sie ngai bok nawh, a lut taphotin a var an hmu theina dingin a sienaah an sie lem hlak. 17 Ieng khom puong lo dinga thup le mi hriet lo ding le suklang lo dinga thuprûk a um nawh. 18 Chuleiin, in thu ngaithlak danah fimkhur hle ro. Tu khom a nei chu pe belsang an ta, a nei naw chu neia an ngai sun khom lăkpêk an tih” a ta.

19 A nu le a unauhai khom a kuomah an hung a, nisienlakhom mipui leiin an paw thei naw a. 20 “I nu le i unauhaiin hmu tum chein tuolah an nghak che” tiin an hril a. 21 Ama chun, “Pathien thu hrea zawmtuhai hi ka nu le ka unauhai an nih” tiin a lo don a.

22 Ni khat chu a zirtirhai leh longah an chuong a, an kuomah “Dil râl khing tieng son kai ei tiu” a ta, an suok tah a. 23 Chuonga an fe lai chun a lo in a. Dila chun thlipui a hung hrâng phut a, an long chu tuiin a chîm el ding an tah leiin an ngirhmun chu a derthawng hle a. 24 Isu kuomah an fe a, an kei tho a, “Hotupa, Hotupa, ei pil el ding a ni hi!” an ta. Isu chu a tho a, thlipui le tuifawn hlup hlup chu a hal a, an chawl a, a rè ta thruop el a. 25 An kuomah, “Inringna khawlai am a um?” a ta. Tri bok, makti bok chun, “Hi pa hi tu’m an leh? Thli le tui fawn chen khom thu a pêk a, an rè el hi!” an inti tawl a.

26 Galili ram zawna Gerasin^a mihai ramah chun an va kai a. 27 Khawmuol an kai chun chu khuoa mi ramhuoi zawl chun a hung pan a. Ama chu hun sawt tak puon khom sil ta loin, ina khom riek ta loin thlanah a khawsa hlak a. 28 Isu a hang hmu chun rawl inring takin a khêk a, a hmaah a bokkhup a, “Isu, Pathien chunghnungtak Naupa, iem a na ka chungah thaw i tum rêng rèng? Mi soisa lul lo dingin ka ngên che” a ta. 29 Chu pa sŭnga inthoka suok dingin thlarau tirdakum chu Isun thu a lo pêk ta si a. Chu pa chu ramhuoi chun voi tam a man ta hlak a, a kut le ke khaidieta khitin, kol dam inbuntirin an vĕng hlak a, sienkhom khaidiethai chu a suktan a, ramhuoi chun thlalĕr hmun rèah a fen hmang hlak a. 30 Chun, Isun, “Tu’m i hming?” a ta. Ama chun “Sangruk”^b a ta, a sunga ramhuoi lut chu an tam ĕm lei a nih. 31 Khuorkhurûma pei thla lo dingin Isu an ngên chùl a. 32 Chu tlânga chun vok ruol tam tak an tla khawm a. Chuong vok ruol sunga lut phalna pe dingin an ngên a, ama chun a phalpĕk a. 33 Ramhuoihai chun chu pa chu an suoksan a, vok sunga chun an lŭt a, vok ruol chu rawla chun an tlan liem a, dilah an tla hlum ta vong a.

34 Vok enkoltuhaiin thil hung tlung an hmuin an tlàn a, khuoa mi le a se vêla mihai chu an hril a. 35 Chuongchun, ieng thil am a tlung tah ti en dingin mihai chu an hung inthok suok a. Isu kuom an hung tlung chun ramhuoi suoksan kha puon sil a, lungril ngai puta Isu ke bula inthrung an hung hmu chun an tri hle a. 36 Thil chinchang hretuhai chun ramhuoi man a hung dam dan chu an lo hril tawl a.. 37 Gerasin rama mi po po chu an thlabâr a, ama chu an kuoma inthoka fe hmang dingin an ngĕn a, chuongchun longah a chuong a, a kîr nawk tah a.

38 Ramhuoi suoksan ruok khan chu Isu kuoma um zing a ngĕn a. 39 Nisienlakhom Isun, “I in tieng inlawi la, Pathienin i ta dinga thil a thawpĕk che ropuizie hi va hril rawh” a ta, a’n fetir tah a. Chuongchun a fe a, khawpui sung po poa chun Isun thil a thawpĕk chu a tlanginsampui tah a.

40 Beisei taka lo nghaktu mipui chun Isu hung tlung nawk chu an lo lawm hle a. 41 Ngai ta, mi pakhat a hming Jaira, sunagoga hotu chu a hung a, Isu ke bulah a bokkhup a, 42 a naunu nei sun kum sawm le pahni vêl mi chu thi hmun suola a nat leiin a ina hung dingin a ngĕn a. Jaira in pana a fe lai chun a zuitu mipui chun an bawr luoi luoi a.

43 Chun, nuhmei pakhat, kum sawm le kum hni thi pût tah, a sum nei po po khom daktor ruoinaa seng zo tah, tu khomin an sukdam thei naw chu a hnungah a hung a, a puon hmawr chu a hung them a, 44 a thi pût chu a rè ta nghal a. 45 Isun, “A mi themtu kha tum a na?” a ta. “Kei chu kan nawh” an ti seng a. Peter chun, “Hotupa, mipui an tam a, an hneng sup sup che annawm” a ta. 46 Isu chun, “Tuin amanih a mi them a, ka sunga inthokin thilthawtheina a suok ti ka hriet” a ta. 47 Nuhmei chun inthup thei ruol an ta nawh ti a hrietin, a hmaa chun inthin dor dorin a hung a, a bokkhup a, a them san le chop le chila a dam el thu chu mi po po hmaa chun a hrilh a. 48 Ama chun, “Ka naunu, i ringna i dam pha a nih, thlamuong takin fe ta rawh” a ta.

49 A la trong lai zingin Jaira ina inthokin mi pakhat a hung a, “I naunu a thi tah, zirtirtu hi sukbuoi ta da’l rawh” a hung ta. 50 Isun a lo hriet a, Jaira kuomah, “Tri naw la, ring el rawh, dam nawk a tih” a ta. 51 In an tlung chun Peter hai, Johan hai, Jakob hai le naupang nu le pa chauh naw chu tu khom ina lut ve a phal naw a. 52 An rêng chun awm inchumin an lo trap rak rak a. Nisienlakhom, ama chun, “Trap naw ro, a thi nawh, a in a ni lem” a ta. 53 A thi tah ti an hriet leiin an nuisan a. 54 Isun a kut a chel a, “Bawinu, tho rawh” a ta, a ko a. 55 A thlarau chu a hung kǐr nawk a, a tho ta nghal a. “Făk ding iemani pe ro” a ta. 56 A nu le pa chun mak an ti êm êm a, nisienlakhom thil um dan chu mi dang tu khom hril lo ding a ti tlat a.