Gerasin mi ramhuoi zawl a sukdam
5
1 Galili dil răla Gerasina mihai ram chu a tlung a. 2 Longa inthoka a hung suok chun thlarau tirdakumin a man mi pakhat, thlăn hmuna inthoka hung suok chun a’n tuokpui a. 3 Chu pa chu thlan hmunah a khawsa hlak a, tu khomin khaidiet khomin an khit thei ta nawh. 4 Khaidietin khit a, kol an inbuntir chăng khomin khaidiet chu a kei tan a, thir kolhai khom a suksiet pei hlak a, tu khomin an thunun zo nawh. 5 A sŭn a zănin thlăn hmun le tlânga hai a khêk tuor tuor a, lung dămin a’n ăt pop rop hlak a.6 Hla taka inthoka Isu hung a hei hmu chun a kuom tieng a tlân phei a, kûnin chibai a bûk a. 7 Rawl inring taka khêkin, “Isu, Pathien Chunghnungtak Naupa, ieng angin am mi law i tum a na? Mi soisa naw hrâm dingin Pathien hmingin ka ngĕn che” a ta. 8 Isun, “Nang ramhuoi porchê, mihriem sunga inthok khan suok rawh” tia thu a pêk tah leiin chuong chu a hril a nih. 9 Chun, Isun, “I hming iem a na?” tiin a’n don a. Ama chun, “Ka hming chu Sângrukb a nih, tam tak kan nih” a ta. 10 Chu rama inthoka anni chu hnot suok lo dingin a ngên trăl a.
11 Chu tlâng panga chun vok ruol tam tak an tla khawm a. 12 Ramhuoihai chun, “Vok ruol lai son mi’n fetir la, an sungah mi’n luttir rawh” tiin an ngĕn a. 13 Isun a phalpĕk a. Chuongchun, thlarau porchèhai chu an hung suok a, vok sunga chun an lŭt a. Vok ruol chu sanghni laia tam an na, dîl pang trênbarama chun an tlân thla a, dîla chun an tla hlum ta vong a. 14 Vok enkoltuhai chu an tlăn a, khuo le a sèvĕla mihai chu an va hril a, ieng thil am a tlung ti en dingin an hung tlăn khawm a. 15 Isu kuom an hung tlung chun ramhuoi zawl Sângruk kha puon sil a, lungril pangngai puta inthrung an hmu a, an tri ta ĕm êm a. 16 Ramhuoi zawl pa chunga thil hung tlung dan le vok ruol chanchin chu mit ngeia hmutuhai chun mihai chu an lo hril a. 17 Chuongchun, a ram mihai chun Isu chu an ram suoksan dingin an ngĕn a.
18 Longa Isu a chuong ding lai chun ramhuoiin a zawl pa khan a kuoma um zing a ngĕn a; 19 sienkhom Isun a phalpĕk naw a, “I inah i sunghai kuomah fe la, Lalpan i ta dinga thil a thawpĕk che le a lunginsietzie che hi va hril lem rawh” a ta. 20 Ama chu a fe a, Dekapolic biela khuoa hai chun Isun a ta dinga thil a thawpĕk ropuizie chu a tlâng insampui a, mi po poin mak an ti hle a.
Jaira naunu le nuhmei thi pût
21 Dil răl khing tieng longa Isu a hung kai nawk chun dil kamah mi tam tak an hung pung khawm a. 22 Chun, sunagoga hotu pakhat, a hming Jaira chu a hung a, Isu a hmu chun a ke bulah a bokkhup a, 23 “Ka naunu nghâklakte a thi vâng văng a. Hung hrăm la, a chungah kut innghat la, hung har a ta, dam nawk el a tih” tiin nasa takin a ngĕn a. 24 Chuongchun, Isun a fepui a, mi tam takin an zui a, an inhneng nuk nuk a.
25 Nuhmei pakhat, kum sawmpahni thi pûta damnaw a um a. 26 Daktor tam tak a pan tah a, a nei po po a seng hnung khomin thrat tieng nêkin zuol tieng a pan deu deu lem a. 27 Chu nu chun Isu chanchin a lo hriet a, a hnung tieng mipui kara chun a hung a, a puon chu a them a. 28 A lungril chun, “A puon chau khom tawk lang, dam ka tih” a ta. 29 Chuongchun a thi pût chu a hung chăt a, a natna chu a dam tah ti a taksa chun a hriet nghăl a.
30 Isu khomin amaa inthokin thilthawtheina a suok ti a hriet nghăl a, mipui lai chun a ngha vêl a, “Tu’m a na ka puon them kha?” a ta. 31 A zirtirhai chun, “Mipuiin an hneng sup sup che hi i hmu nghal a, iengtiziea a themtu che chu i’n don?” an ta. 32 Ama themtu chu hmu tumin a ngha vêl a. 33 Chuongchun, a chunga thil hung tlung chu hrein nuhmei chu tri le inthin pumin a hung a, a hmaah a bokkhup a, iengkim indik takin a hril ta vong a. 34 Isu chun a kuomah. “Ka naunu, i ringna i dampui a nih, thlamuong takin fe ta la, i natna chu hung dam song ta raw se” a ta.
35 Isu a la trong zing laiin Sunagog hotu Jaira ina inthoka hunghai chun, “I naunu a thi tah. Zirtirtu hi suksawl ta da’l rawh” an hung ta. 36 Isu ruok chun an thu hril chu ngaisak loin Sunagog hotupa kuoma chun, “Tri naw la, ring el rawh” a ta. 37 Peter hai, Jakob hai, Jakob unaupa Johan hai ti chau naw chun mi dangin an zui a phal naw a. 38 Sunagog hotupa in an va tlung a, buoi mur mur ri, trap khêk veng vung chu an hmu a. 39 A lut malam chun an kuomah, “Ieng dinga hienga buoia in trap khêk am a na? Naupang chu a thi nawh, a in a ni lem” a ta. 40 Anni chun an nuisan a. Chuongchun, an rêngin a hnot dok a, naupang nu le pa le ama zuituhai chau chu a thruoi a, naupang zălna pindana chun an lŭt a. 41 Naupang kut chu a chel a, a kuomah, “Talitha kum” a ta, chu chu “Bawinu, tho rawh” tina a nih. 42 Nuhmei naupang chu a hung tho a, a lawn ta nghal a, ama chu kum sawmpahni mi a nih. Chuongchun, mak an ti takmeu a. 43 Ama ruok chun an kuomah, “Tu khom hril naw ro” a ti tlat a; fak ding pe dingin a hril bok a.