4 Thu a hril zo chun Simon kuomah, “Li inthukna tieng pan unla, nga man dingin lên dêng ro” a ta. 5 Simon chun, “Hotupa, zankhawvar inrim takin kan dènga chu kan hlawsam dèr a nih. Amiruokchu, i thuin lèn chu hang dêng nawk kan tih” a ta. 6 An hang dêng chun nga an inkhum treu a, an lênhai chun dier loin an tan trêp a. 7 Chuongchun, long danga an pawlhai chun hung san dingin an hei hŭi a, an hung a, long pahni chu pil vâng vâng khopin an sung sip ve ve a.

8 Simon Peterin chuong chu a hmu chun Isu ke bulah a bokkhup a, “Lalpa, mi fesan rawh, misuol ka ni hi” a ta. 9 Ama le a ruolhai chun chuong zozai nga an man el chu mak an ti seng a 10 Simon pawla mi Zebedai naupa Jakob le Johan khom chun mak an ti ve hle a. Isu chun Simon kuomah, “Tri naw rawh, tuta inthok chu mihriem man ta’ng i tih” a ta. 11 Chuongchun, an longhai chu va kamah an hnûk kai a, iengkim maksanin ama chu an zui tah a.

12 Khaw pakhata Isu a um laiin pa pakhat, a puma inphâr hi a hung a, Isu a hmu phing leh a ke bula bokkhupin, “Lalpa, i nuom chun i mi sukthieng thei” tiin sukdam a ngĕn a. 13 Isun a hei ban a, phâr chu a them a, “Nuom e, lo inthieng ta rawh” a ta, a dam ta nghal a. 14 A kuoma chun, “Tu khom hril naw rawh; amiruokchu, thiempu va’n entir la, i dam ngei ti mihaiin an hriet theina dingin Mosie thupek angin inthienna thil va’n hlân rawh” a ta. 15 Nisienlakhom, a chanchin chu a’n thang zuol ta sau a; mi tam tak a thu hre châk le an natnahai a sukdampek nuomin an hung hut hut a. 16 Isu ruok chu hmun reah trongtraiin a fienriel rop hlak.

17 Chuong lai chun ni khat chu a zirtir laiin, Galili ram le Judai ram khaw tina inthok le Jerusalema inthoka hung Farisaihai le Dan zirtirtuhai chu a bulah an inthrung a; chun, mi sukdamna dinga Lalpa thilthawtheina chu amaa chun a thok a. 18 Chuong lai chun mi tuhaiin amani zeng pakhat, a zàlna khum leh Isu hma bula sie dingin zawn lût an tum a, 19 sienkhom mipui an tam lei chun zawn lut ngaina a um naw a. Chuongchun, in chungah an lawn a, inchung chu an hăwk a, a awnga chun a khum pumin Isu hmá takah zeng chu hruiin an khai thlâk a. 20 An ringzie a hmuin a kuomah “Ruolpa, i suolhai ngaidam a ni tah” a ta.

21 Farisaihai le Dan zirtirtuhai chun, “Hi mihriem, Pathien hrilsetu hi tu rêng am a na? Pathien chau naw chu tu am suol ngaidam thei an um a?” an ta. 22 An ngaituo Isun a hriet a, “In lungrilah iem in ngaituo a? 23 ‘I suolhai ngaidam a ni tah’ ti am a olsam, ‘Tho la, lawn ta rawh’ ti lem? 24 Khawvela hin Mihriem Naupa hin suol a ngaidam thei ti in hrietna dingin” a ta, zeng kuoma chun, “Tho la, i puonthuo la la, i inah fe rawh ka ti che” a ta. 25 An hmu ngeia chun a tho a, a puonthuo chu a lâk a, Pathien inpâk pei pumin a in tieng an lawi tah a. 26 An rêng chun mak an ti êm êm a, Pathien an inpâk a, “Voisun chu thilmak danglam tak ei hmu a nih” an ta, maktinain an sip a.

27 Chu zo chun a suok a, sienkhontu pakhat a hming Levi, siechawina hmuna inthrung a hmu a, a kuomah, “Mi zui rawh” a ta. 28 Ama chu a tho a, a iengkim maksanin a zui ta nghal a. 29 Levi chun a inah Isu ta dingin ruoi ropui tak a buotsai a, siekhontu le mi dang tam takin ruoi chu an hung kǐl a. 30 Nisienlakhom, Farisaihai le Dan zirtirtuhai chu a zirtirhai chungah an lo chier a, “Ieng dinga siekhontuhai le mi suolhai leh thlaithleng an kîl hmunkhat am a na?” an ta. 31 Isun anni chu donin, “Mi hriselhaiin daktor an ngai naw a, hrivoi sehaiin a nih an ngai lem. 32 Mi felhai lam dinga hung ka ni naw a, mi suolhai insimtir dinga hung ka ni lem” a ta.

33 Anni chun Isu kuomah, “Johan zirtirhai chu bu ngheiin an trongtrai rop a, chuong ang bokin Farisaihai khomin an thaw ve a, i zirtirhai hlak hin an fakin an dawn bor bor el si a” an ta. 34 Isun an kuomah, “Anni lai moneitu a um sung chun mo thruoituhai chu bu in ingheitir hlak am a ni? 35 Moneitu chu an kuoma inthoka thruoi hmang ni la um a ta, chu huna ruok chu la nghei an tih” a ta. 36 An kuomah tekhinthu khom a hril a. “Tu khomin puon thar kei thlêrin puon hlui phâwknain an hmang ngai nawh. Chuonga thaw a ni chun puon thar chu kei thlêr ngai a ta, puon thar hlek le puon hlui chu inmil bok naw nih. 37 Tu khomin uoiin thar savun uoiin peng hluiah an thun ngai nawh, thun ta ang sien, uoiin thar chun savun peng hlui chu mor koi a ta, pût hmang vong a ta, uoiin peng khom chu se bok a tih. 38 Uoiin thar chu uoiin peng thara thun ding a nih. 39 Tu khom uoiin upa an dawn hnungin uoiin thar an lam ngai nawh, ‘A upa po leh a’n hnik ngé ngè’ an ti hlak” a ta.