6 Chuongchun, Isu chu anni ruolin a fe ve a. In an tlung văng tah ti chun sipai zahotu chun Isu kuoma thu hril dingin a rawihai a tir a: “Lalpa, harsa sakin ka ina chu hung da’l rawh, ka insŭnga ko lût tlăk ché khom ka ni naw a, 7 chuleiin i kuoma hung tlăka khom ka’n ngai naw a nih; thu pe la, ka siehlaw chu dam el a tih. 8 Kei khom mi thuhnuoia um dinga sie ka na, ka hnuoiah sipai an um nawk sawng a, ‘Fe rawh’ ka ti chu a fe a, ‘Hung rawh’ ka ti chu a hung a, ka siehlaw khom ‘Hi hi thaw rawh’ ka ti chu a thaw el hlak” tiin.

9 Isun chu thu a hriet chun chu pa chu mak a ti hle a, a hung zuitu mipui tieng chu nghain, “Ka hril chêu hi, hieng ang lawma ringna nasa hi Israelhai lai tu khom ka hmu nawh” a ta. 10 Mi a hung tirhai chu in tieng an kǐr a, an tlung chun siehlaw chu damin an hmu ta a.

11 Sawt naw te hnungah khaw pakhat Nain an ti-a chun Isu a fe a, a zirtirhai le mipui tam takin an zui a. 12 Khaw kul kotkhar an tlung tawm chun mithi pakhat, hmeithai naupa nei sun chu an hung zawn suok a, a khaw mi tam takin an zui a. 13 Chu hmeithai chu Lalpan a hang hmu chun a lunginsiet ta ĕm êm a, “Trap naw” a ta. 14 A va hnai a, hlâng chu a chel a, a zawntuhai chu an ngǐr a. “Tlangval, tho rawh ka ti che” a ta. 15 Mithi chu a tho a, a hung trong suok a, a nu kuoma chun a’n hlân a.

16 Mi po po a râp a, maktiin Pathien an inpâk a, “Eini lai zawlnei ropui tak a hung um tah a ni hi” an ta; chun, “Pathienin a mihai a hung kan tah a ni hi” an ti bok a. 17 Isu chanchin chu Judai ram le a sè vĕl ram tinah a’n thang suok tah a.

18 Chuong thu po po chu Johan zirtirhai chun an pu chu an hril a. 19 Johan chun a zirtirhai pahni a ko a, Lalpa kuoma chun, “A hung ding chu i ni am, annawleh mi dang kan la nghak ding?” tia indon dingin a tir a. 20 Chuonghai chun a kuom an hung tlung chun, “Baptistu Johanin, ‘A hung ding chu i ni am, annawleh mi dang kan la nghak ding?’ ti indon dingin i kuomah a mi hung tir a nih” an ta. 21 Chuong lai chun hri hrang hrang invoi dam, natna chi tum tuma na le thlarau tirdakum pai mi tam tak chu Isun a sukdam a, mitdel tam tak mit a sukvarpek bok a. 22 Chuongchun, anni chu a don a, “Kîr nawk ta unla, in thil hmu le hriethai hi Johan va hril ro; mitdelhai mit a var a, kebaihai kein an lawn a, pharhai an inthieng a, nasêthai na a hung var a, mithihai keithoin an um a, pasiehai kuomah Chanchin Thra hril a ni tah. 23 Tu khom keima leia beidong lo chu an hamthra”^a a ta.

24 Johan mi hung tirhai an liem hnung chun mipui kuomah Johan chungchang thu Isun a hril a. “Ieng en dingin am thlalĕra khan in hang fe? Thliin luong a mut hning maw? 25 An naw leh ieng en dingin am in fe? Puon nêm sila inchei mi maw? Ni lo e, silfen man tama incheihai le nun khawnuom tawlhai chu lal inah an son naw an um hlak. 26 Ieng tak am en dingin in fe rêng rĕng a? Zawlnei en dingin maw? A ni ngei tak kha; ka hril chêu hi, ama chu zawlnei nêka ropui lem a nih. Ama hi annawm,

28 Ka hril chêu hi, nuhmei sŭla insieng laiah Johan nĕka ropui lem tu khom an um nawh; amiruokchu, Pathien rama mi chîn tak khom ama nêk chun a ropui lem” a ta.

29 Vantlang mipui le siekhontuhai chu Johan baptisma lo chang tah an ni tawl leiin, Isu thu hrilhai an hriet chun Pathien lampui chu a’n dik ngei a nih ti an pom nghet tah a. 30 Farisaihai le Dan zirtirtuhai ruok chun Johan baptisma chu an chang nuom ve si nawh, anni ta dinga Pathien remruot chu an hnâwl tlat leiin.

31 Isun, “Tu lai ruoltharhai hi ieng le’m tekhin ka ta? Iem an ang tak aw? 32 Dawrpui hmuna naupang ruol inhnel, inkhêk tuo a,

33 Baptistu Johan chu a hung a, bei a fak naw a, uoiin a dawn bok naw a, nangnin “Ramhuoi zawl a nih” in ta. 34 Mihriem Naupa a hung a, fain a dawn a, nangnin “En ta u, mi vir, uoiin hĕ mi, siekhontuhai le mi suolhai ruolpa saw’ in mi ti nawk si a. 35 Nisienlakhom, Pathien varna indikzie chu a nauhaiah a’n lang chieng” a ta.

36 Farisaihai laia pakhatin zanbu fa dingin a fiel a, Farisai inah chun a fe a, dawkanah thlaithleng a kîl a. 37 Chu khuoa nuhmei pakhat, suola inhmang hlak chun Farisai inah Isun bu a fâk ti a hrietin alabasta bŭrah hriek rimtui chawiin a hung a, 38 a hnungah a ke bula chun trap pumin a ngîr a; a mitthli chun a ke chu a far hu a, a sam chun a zuk hrŭk a, a ke chu a fawp ngawi ngawi a, hriek rimtui chun a chûl a. 39 A fieltu Farisaiin a hmu chun, “Hi mi hi zawlnei ni tak tak sien chu a hung themtu nuhmei hi tu am a na, ieng ang mi am a na ti le nu suol a nih ti hre el ding a na” a ti lungril a.

40 Isun a kuomah, “Simon, i kuomah thu bau khat hril ding che ka nei” a ta. Ama chun, “Hril ta la, Zirtirtu” a ta. 41 Isun, “Mi pahniin tangka inpuktirtu lakah sum an bat a, pakhatin duli zanga, pakhatin duli sawmnga. A rulna ding an nei naw leiin a ngaidam ve ve a. 42 A tu lem chun am ama chu hmangai lem a ta?” a ta. 43 Simon chun, “A bat a ngaidam rawn lem chun a ni ka ring” a ta. Isun, “I ring indik chie” a ta. 44 Nuhmei tieng chu a ngha a, Simon kuomah, “Hi nu hi i hmu am? I inah ka hung lŭt a, nangin ka ke sawpna ding tui i mi pĕk nawh, ama ruok hin chu a mitthliin ka ke a far hu a, a samin a hrûk a. 45 Nangin i mi lo fawp nawh, ama ruok hin chu ka hung lŭta inthok khan ka ke fawp a ma nawh. 46 Nangin ka luah hriek i mi nâl nawh, ama ruok hin chu hriek rimtuiin ka ke a chûl a ni hi. 47 Chuleiin, ka hril che hi, a suol po po ngaidam a ni tah, hmangaina a hau êm a. 48 Ngaidamna dong tlawm chun a hmangai nêp hlak” a ta. Chun, nuhmei kuoma chun, “I suolhai ngaidam a ni tah” a ta. 49 Thlaithlĕng otpuituhai chun, “Suol chen khom ngaidam el ta hi, tu tak am an ta le?” an ta. 50 Ama chun nuhmei kuomah, “I ringnain a sandam che a nih, thlamuong takin fe ta rawh” a ta.