Bu chi thètu tekhinthu
4
1 Trum khat chu Galili dil kamah a zirtir nawk a. Mipui pung khawm chu an tam êm leiin dila longa chun a chuong a, a thrung a, mipui chu dil kam hrûl khawmuola chun an um a. 2 Tekhinthu hmangin thil tam tak a zirtir tawl a. 3 An kuoma chun, “Ngai ro, loneitu hi bu chi thè dingin a fe a; 4 a hang thè chun a thren lampuiah a tla a, vatehaiin an hung tlàn zo el tah a. 5 A thren pielthleng, pil inphânnaah a tla a, a hung mawng nghal a, 6 sienkhom hnuoi a sà naw leiin nisa a hung insăng a, a em vuoi a, zung a kei naw leiin a rop el tah a. 7 A thren hling buk lai a tla a, hling chu a hung inthrang a, ra nei thei loin a dîp hmang a. 8 A thren ruok chu pil thratna hmunah a tla a, a hung mawng a, a hung inthrang a, a let sawmthum dam, a let sawmruk dam le a let za damin ra a hung insuo a” a ta.9 Isun an kuomah, “Ngaithlâkna dinga na nei chun ngaithla ngun raw se” a ti bok a.
Tekhinthu hrilfiena
10 A fâla an um hnungin Sawmpahni le a zirtir danghai chun tekhinthu umzie chu an indon chieng a. 11 Ama chun an kuomah, “Pathien ram thuruk chu in kuoma pĕk a ni a, puo tieng mi ta ding ruok chun tekhinthu vonga hril a nih.
12 ‘En en siin hmu si nawng an ta,
Ngaithla ngaithla siin hre si nawng an ta;
Chuong chu ni naw sien ngha kîr an ta,
Ngaidam an ni ta ding bah’
ti ang ang khan” a ta.
13 Ama bokin, “Hi tekhinthu hi in hriet thiem naw chun ieng tin am tekhinthu dang lem chu hre thiem phâk hrim in ta? 14 Loneitu chi thè chu thû a nih. 15 Lampuia tlahai chu hieng ang hi an nih: thû an ngaithlak zoin Setan a hung nghăl a, annia thû tua um chu a lâkpek nawk hlak. 16 Chuong ang bokin pielthleng chunga tla chu hieng ang hi a nih: thu chu an hriet a, lawm takin an pom nghal a, 17 sienkhom anniah zung a kei naw a, sawt naw te chauh a dai a, chu hnung chun thu leia rinumna amanih suknomnatna amanih a hung um pha an tlu nghal hlak a nih. 18 Hling buk laia tla khom hieng mihai ang hi an nih: thu chu an hriet a, 19 sienkhom damsung thil lungkhamna hai, hausak thlàkhlàna hai le thil dang châknahai chu an hung lŭt a, thû chu an dîp hmang a, rà loin a um hlak a nih. 20 Hnuoi thraa tla ruok chu, thû chu hre a, pom a, a let sawmthum dam, a let sawmruk dam le a let za dama rahai hi an nih” a ta.
Khawnvar tekhinthu
21 Ama bokin an kuomah, “Khawnvar chu leikhawra khup khum dingin amanih, khum hnuoia sie dingin amanih in sit hlak am a ni? A sienaa sie ding a ni lem naw maw? 22 Puong lo dinga ip ieng khom a um naw a, inlang lo dinga thup ieng khom a um bok nawh. 23 Ngaithlâkna dinga na nei chun ngaithla ngun raw se” a ta.
24 Chun, ama bokin, “In thil ngaithlăk chu ngun takin ngaituo ro; in inkhǐna hmang ngei chun inkhǐpêk an ti chêu a, bel sa lem hman an tih. 25 A nei chu pĕk belsa ni’ng an ta, a nei naw chu an nei sun khom lăkpĕk an tih” a ta.
Thlai chi inthrang tekhinthu
26 A hril pei a. “Pathien ram chu miin a loa thlai chi a thè ang hi a nih. 27 Zanah a in a, sŭnah a tho a, a hriet naw karin chi chu troin sŭn le zănin a’n thrang zing a nih. 28 Hnuoi chun amain ra a hung insuotir hlak a, a hmasa takin a kûng, a dotah a vŭi, chu zoah a vŭia bu mal kim chuh. 29 A rà chu a hung hmin a, bu sîk a hun tak leiin kawite’n a ât hlak a nih” a ta.
Antram chi tekhinthu
30 Chuongchun, a hril pei a. “Pathien ram chu ieng le’m hrilkhiin, ieng tekhinthu am hmangin hrilfie tang ei ta? 31 Antram mu, chi ei thè hlak po po laia chîn tak ang hi a nih. 32 An hang thè chun thlai dang po po nêka lienin a hung inthrang a, lien takin a hung inzăr a, chungleng vatehaiin a buk chu riebûkah an hmang hlak” a ta.
33 Chuong ang tekhinthu hmang chun an hriet thiem thei zawng dingin thû chu an kuomah a hril hlak a; 34 tekhinthu naw chun an kuomah thu a hril ngai nawh. Ama zirtirhai kuoma ruok chu fienrielah iengkim a hrilfie hlak.
Thlipui a hal dei
35 Chu ni zantieng chun a zirtirhai kuomah, “Ral khing tieng son va feng ei tiu” a ta. 36 Mipuihai chu an maksan a, a chuongna long ma chun ama chu an fepui a, long dang khom an thrang ve a. 37 Chun, thlipui na takin a hung hrâng a, tuifawn chu longah a hung invor lut a, long chu a pil vâng vâng el tah a. 38 Ama chu long mei tieng lukham khamin a lo in a. A zirtirhai chun an kei thoa, “Zirtirtu, kan bohmang el ding hi poi i ti naw maw?” an ta. 39 Ama chu a hung tho a, thli chu a hal a; tuifawn kuoma khom chun, “To la, um trok trok rawh” a ta. Thli chu a ma a, a hung rè ta thrup el a. 40 A zirtirhai kuoma chun, “Ieng dinga chuong lawma in tri am a na? Ringna hrim in nei naw maw?” a ta. 41 Tri êm ĕmin, “Hi pa hi tu’m an ta le, thli le tuifawn chenin a thu an awi el hi?” an inti tuo a.