Zeng sukdam thu
9
1 Isu chu longah a chuong a, dîl ràl a kâi a, a chĕngna khuo a hung tlung chun, 2 mi threnkhatin zeng pakhat hi a zălna pumin a kuomah an hung zăwn a. An ringzie Isun a hmu chun zeng kuomah, “Ka naupa, lungmuong takin um rawh; i suolhai ngaidam a ni tah” a ta. 3 Chu phing leh Dan zirtirtu threnkhathai chun lungrilin, “Hi pa hin Pathien a hrilsiet a nih” an ta. 4 An ngaituona chu Isun a hriet a, “Ieng dinga in lungrilin thil suol in ngaituo am a na? 5 ‘I suolhai ngaidam a ni tah’ ti le ‘Tho la, lawn rawh’ ti hi a ieng am a olsam lem a? 6 Sienkhom, khawvela hin Mihriem Naupan suol a ngaidam thei ti in hriet theina dingin” a ta, zeng kuoma chun, “Tho la, i puonpha kha la la, inah fe ta rawh” a ta. 7 Chuongchun, chu pa chu a tho a, a inah a fe ta a. 8 Chu thil hmutu mipuihai chu maktinain an sip a, chuong ang thuneina mihriemhai kuoma petu Pathien chu an inpâk a.Mathai a ko
9 Chu taka inthoka Isu a suok chun siekhonna hmuna inthrung mi pakhat a hming Mathai a hmu a, “Mi zui rawh” a ta, ama chu a tho a, a zui ta nghal a. 10 Isu le a zirtirhaiin Mathai ina zanbu an kìl laiin sienkhontuhai le mi suola tam takin an hung kilpui ve a 11 Farisaihaiin chu chu an hmuin a zirtirhai kuomah, “Ieng leia in zirtirtu hin siekhontu le mi suolhai lai bu a fâk ve am a na?” an ta. 12 Chu chu a hrietin Isun, “Mi hriselhaiin daktor an mamaw naw a, mi borsawmhaiin a nih an mamaw lem. 13 Chuleiin, fe unla, ‘Hlànbiekna nêkin lunginsietna ka dit lem’b ti hi iem a umzie va’n chŭk ro. Mi felhai lam dinga hung ni loin mi suolhai lam dinga hung ka ni lem” a ta.
Bu nghei chungchang thu
14 Johan zirtirhai chu Isu kuomah an hung a, “Iem a ta, Farisaihai le keini rawi hin bu kan nghei a, i zirtirhai hin an nghei ve si nawh?” an ta. 15 Isun an kuomah, “Anni lai moneitu a um sung chun mo lawma fielhai chun an sŭnc ding am a ni? Moneitu chu an kuoma inthoka thruoi hmang ni la hung tlung a ta, chu pha chun bu la nghei veng an tih.
16 “Tu khomin puon thar la rin mar loin puon hlui an phăwk ngai nawh, a phăwkna chun puon chu kei trawm a ta, in-ek nasa zuol a tih. 17 Uoiin thar khom savun peng hluiah an thun ngai nawh; an thun chun chu savun chu mor koi a ta, trĕng a ta, savun peng chu se vong a tih. Uoiin thar chu savun peng tharah an thun lem hlak, chuongchun him takin a um rĕl hlak” a ta.
Nuhmei thi pût le Jaira naunu sukdam
18 Chuong thu chu an kuoma a hril laiin, rorêltu pakhat a hung a, bokkhupin chibai a bûk a, “Tu el khan ka naunu a thi a, sienkhom hung la, a chungah kut innghat la, dam nawk el a tih” a ta. 19 Isu chu a tho a, a zirtirhai le chun ama chu an zui ta a.
20 Nuhmei pakhat, kum sawm le kum hni thi pûta damnaw hi a hnungah a hung a, a korfuol hmor a hung them a. 21 Chu nu chun a lungrilin “A korfuol hmor chauh khom them lang dam ka tih”a ta. 22 Isu chu a ngha kîr a, ama chu a hmu a, “Ka naunu, thlamuong takin um rawh; i ringnan a sukdam chê a nih” a ta. Chuongchun, nuhmei chu chu taka inthok chun a dam ta nghal a.
23 Isun hotupa in a va tlung chun theihle mut pawl le mipui so mur mur chu a hmu a, 24 “Lo inkieng ro. Naupang hi a thi nawh, a in a ni lem” a ta. Anni ruok chun an nuisan a. 25 Mipui chu tuolah an hnot suok vong hnungin inah a lût a, naupang kut chu a chel a, a hung tho tah a. 26 Chu thu chu a biel sunga chun a’n thang suok a.
Mitdel pahni sukdam
27 Chu taka inthok chun Isu chu a fe pei a, mitdel pahniin an zui a. “Davida naupa, mi lunginsiet rawh” tiin an khĕk a. 28 In a lut chun mitdel pahnihai chu a kuomah an hung a, Isun an kuomah, “Hi hi ka thaw thei in ring am?” a ta. 29 Anni chun, “Ring e, Lalpa” an ta. Isun an mit chu a them a, “In ring angin in chungah hung tlung raw se” a ta. 30 Chuongchun, an mit chu a hung var tah a. Isun an kuomah, “Tu khom hril dêr naw ro” a ta. 31 Nisienlakhom anni chu an suok a, chu biel po poa chun a chanchin chu an hril dar tah a.
Trong thei naw a sukdam
32 Chun, an fe suok lai mekin, ramhuoi zawl, trong thei lo pakhat hi, Isu kuomah an hung thruoi a. 33 Ramhuoi chu a hnot suok phing leh trong thei lo chu a hung trong thei ta a. Mipui chun mak an ti hle a, “Hieng ang thil hrim hi Israelhai lai hmu a la ni ngai nawh” an ta. 34 Farisaihai ruok chun, “Ramhuoi lal a ni leiin ramhuoihai a hnot suok hlak a nih” an ta.
Isun mipui a lunginsiet
35 Isu chun khaw lien le khaw tehai fangin, sunagoga hai Pathien ram Chanchin Thra hrilin a’n chuktir a, hri le natna chi hrang hrang invoihai chu a sukdam pei a. 36 Mipuihai chu a hmuin, vengtu nei lo beram ruol anga santu bo le hnawtoma um an ni leiin a lunginsiet tawl êm êm a. 37 A zirtirhai kuomah, “Bu sîk ding tam tak a um a sinthawtu an tlawm si a. 38 Chuleiin, a loa bu sîktu ding sinthawtu hung tir dingin lo neitupa Lalpa chu hni ro” a ta.