MARKA
Baptistu Johan thu hril
1
1 Pathien Naupaa Isu Krista Chanchin Thra intranna chu,2 Zawlnei Isai lekhabua,
“Ngai ta, ka tirko i hmaah tir ka ta,
Ama chun i lampui buotsai a tih.
3 Thlalĕra mi khêk rawl chun,
Lalpa lamlien ding siel unla,
Lampui tlŭn siempek ro”
tia a ziek ang khan,
4 Baptistu Johan chu a hung a, suol ngaidamna thu hrilin, simna baptisma a’n changtir a. 5 Judai ram kil tina mi le Jerusalema mi po po chu a kuomah an fe a, an suolhai an inpuong a, Jordan vadungah a lo baptis tawl a. 6 Johan chun sanghawngsei hmula siem zakuo a hâk a, savun kawngchŭn a chûn a, a bu chu khauthrikthri le ram khuoizu a nih. 7 Ama chun, ‘Keima nêka ropui lem ka hnungah a hung a, kei hi chu kûna a pheikhok hrui sût tlăk khom ka ni nawh. 8 Kei chun tuiin ka baptis chêu a, ama ruok chun Thlarau Thienghlimin a baptis ding chĕu a nih” tiin a hril a.
Isun baptisma a chang
9 Chuong hun lai chun Galili ram Nazareta inthokin Isu a hung a, Jordan vadungah Johanin ama chu a lo baptis a. 10 Tuia inthoka Isu a hung suok charin van inhonga inthokin vàthrû anga Thlarau hung trum a hmu a, vana inthok chun rawl a hung suok a, 11 “Nang hi ka Naupa Dittak chu i nih; i chungah ka lawm ĕm êm a nih” a hung ti a.
Thlĕmna a tuok
12 Thlarauin ama chu thlalĕrah a tir suok nghal a, 13 chu taka chun ni sawmli zet Setanin a thlêm a, ramsahai lai a khawsa a, vantirkohaiin a rong an bawlpĕk a.
Zirtir pali a ko
14 Lung inah Johan an khum hnungin Isu chu Galili ramah a fe a, Pathien Chanchin Thra hrilin, 15 “Hun chu a hung tlung tah. Pathien ram khom a hnâi tah. Sim unla, Chanchin Thra hi ring ro” a ta.
16 Galili dil kama Isu a fe lai chun dîla Simon le a unaupa Andri lèn dĕng lai chu a va hmu a, nga mantu an ni hrim a. 17 Isun an kuomah, “Hung unla mi zui ro, mihriem mantuah siem ka ti chêu” a ta. 18 Chuongchun, an lènhai maksanin an zui ta nghăl a.
19 Chu taka inthoka hnâi tea chun Zebedai naupa Jakob le a unau Johan a hmu a, an longah chuongin an lènhai an siem thra a. 20 Anni khom chu a ko nghal a, an pa Zebedai le inhlawfa an mi sorhai chu longah maksanin an zui ve tah a.
Ramhuoi man a sukdam
21 Kapernaumah an fe a, Sabat ni chun Sunagogah Isu a lut a, a zirtir tran nghal a. 22 Dan zirtirtuhai ang ni loa thu nei taka a zirtir lei chun mak an ti hle a.
23 Sunagoga chun thlarau tirdakum pai mi pakhat a lo um ve a, 24 “Nazaret Isu, iem a na kan chunga thaw i tum? Mi sukse dinga hung i ni? Tu am i nih ti ka hriet-Pathien Mi thienghlim chu i nih” tiin a khêk suok ta phut a. 25 Isun, “To la, a sunga inthok khan hung suok rawh” tiin a hal a. 26 Ramhuoi tirdakum chun a soisak hrep a, inring taka hrângin a sûnga inthokin a hung suok a. 27 An rêngin, “Hi hi ieng thil am an ta leh? Zirtirna thar, thuneina le inkop a ni hi tie! Thlarau tirdakumhai khom thu a pêk a, an awi el hi” tiin mak an ti thu an inhril tuo a. 28 Galili ram hmun tinah a chanchin chu a’n thang ta nghal a.
Mi tam tak a sukdam
29 Sunagoga inthoka an suok chun Jakob le Johan hai leh Simon le Andri hai in tieng an pan nghal a. 30 Simon tarpi chu khawsikin a lo zâl a, a damnaw thu chu Isu an hril a. 31 Ama chun a va pan a, a kut a chel a, a kei tho a, a khawsik chu a rĕ tah nghal a, an rong a bawlpĕk a.
32 Chu zan tieng, nisa tlak hnungin damnaw tinrêng, ramhuoi man dâm chenin, a kuomah an hung thruoi a. 33 A khaw nâwtin kotkhar bula chun an hung khawm a. 34 Chuongchun, natna chi hrang hranga na mi tam tak chu Isun a sukdam a, ramhuoi tam tak a hnot suok a, an trong ding ruok chu a khappĕk a, ama chu tu am a nih ti an hriet si leiin.
Thu hrilin an văk vĕl
35 Isu chu zîng khaw var hmain a tho a, a suok a, hmun fienrielah a fe a, chu taka chun a va trongtrai a. 36 Simon le a ruolhai chun an zong a. 37 An va hmu chun, “Mi po poin an zong che” an ta. 38 Isu chun, “Hmun dang, a khaw sê vĕla khom feng ei tiu, chu hmuna hai khom chun thu ka hril theina dingin, chu chu ka hung san a ni si a” a ta. 39 Chuongchun, Galili ram po poa an Sunagoga hai chun lûtin thu a hril pei a, ramhuoihai a hnot suok a.
Phâr sukdam
40 Chun, a kuomah phâr a hung a, a hmaah dingthrathruonin, “I nuom chun i mi sukthieng thei” tiin sukdam a ngĕn a. 41 Isun ama chu a lunginsiet ĕm êm a, a hei ban a, a them a, “Nuom e, lo inthieng ta rawh” a ta. 42 A phâr chu a dam ta nghal a, a hung inthieng ta a. 43 Khauh taka thu pein, 44 “Tu kuoma khom ieng khom hril dêr naw rawh; amiruokchu thiempu va’n entir la, i dam ngei ti an hrietna dingin, Mosie thupĕk ang khan inthienna thil va’n hlàn rawh” tiin a’n fetir nghal a. 45 Ama chu a fe a, chu thu chu a hril a hril a, tlâng a’n sampui ta lem a. Chu lei chun Isu chu uolâu takin khuoah a lut thei ta naw a, hmun fienrielah a um ta lem a. Chuong sà khom chun hmun tina inthokin mihaiin an hung pan a.