6 Chun, hi tekhinthu hi a hril a. “Mi pakhatin a grep huonah theichang kûng khat a’n phuntir a, a ra a zong hlak a, pakhat khom a hmu ngai naw a. 7 Grep huon enkoltu kuoma chun, ‘En ta, kum thum zet hi theichang hi a ra ka zong tah a, ka hmu ngai naw a. Phûr el rawh. Hnuoi thra a fâk hek mei mei an naw maw?’ a ta. 8 Ama chun, ‘Pu, tu kum bèk hi chu la um sien, a bul vĕl hi cho ka ta, hnuoi thrain la hang vur phot ka tih. 9 Kum nawk ra a’n suo leh a thra ning a ta, a’n suo naw ruok chun phûr chauh lem rawh’ tiin” a ta.

10 Sabat ni voi khat chu Sunagog pakhatah Isun a’n chuktir a. 11 Nuhmei pakhat, kum sawmpariet zet thlarau suolin a kei kon tah a um a. A ruongzâng chu a sukmar thei naw leiin a kûl zing hlak a. 12 Isun a hmu chun a ko a, “Nuhmei, i natna chun a’n thlà ta che” a ta. 13 A chunga chun kut a’n nghat a, a hung ngîr tlûn ta nghal a, Pathien a’n pâk a.

14 Isun Sabat nia mi a sukdam lei chun Sunagog hotu chu a lung a sen hle a, mipuihai kuoma chun, “Sin thawna ding ni ruk sung a um a, chu sung chun hung inla, insukdam ta unla, Sabat ni kher kher ni loin” tiin a vìn thŭr thûr tawl a. 15 Lalpa ruok chun an kuomah, “Nangni lêmderhai, Sabat ni khomin mani bawngchal amanih sabengtung amanih chu sûtin, a thlungna hmuna inthokin tui indawntir dingin in thruoi suok seng hlak an naw maw?” 16 Chuong a ni si chun hi nuhmei, Abraham naunu, kum sawmpariet zet Setanin a lo khuopna hi Sabat khom ni sien sûtpek a ni naw ding am a ni?” a ta. 17 Chuong thu a hang hril chun a khingtuhai hmai chu a mâwk hle a, mipui ruok chu a thilthaw ropui takhai lei chun an lawm hle thung a.

18 Chu zoa chun Isun, “Pathien ram chu ieng ang am a na? Ieng le’m hrilkhîng ka ta? 19 Antram mu khat mi pakhatin a lâk a, a huonah a thè a, a hung inthrang a, thing a hung ni a, a zârah chungleng vatehai an riek hlak ang hi a nih” a ta.

20 Ama bok chun, “Pathien ram chu ieng le’m hrilkhîng ka ta? 21 Nuhmeiin chol a lâk a, beia hmet ding beiphit fong^a thum chie tho vong dinga a phul ang chu a nih” a ti nawk a.

22 Jerusalem pana an fe lai chun khaw lien le khaw te hai sirin Isun a’n chuktir malam pei a. 23 Mi pakhat hin, “Lalpa, mi tlawmte chauh an ni sandama um ding chu?” tiin a’n don a. 24 Ama chun, “Kotkhar chîna chun lŭt tum hrâm ro; ka hril chêu hi, mi tam takin lut tum an ta, lut thei naw ni hai. 25 Inneitupa chu tho a, kot a kal ta hnung chun nangni tuola ngirin, ‘Pu, kot mi hung hongpĕk rawh’ tiin kik inla khom ama chun, ‘Khaw lai mi am in nih ka hriet ngai naw chêu’ tiin lo don a ti chêu. 26 Nangnin, ‘I rawiin fain ei dawn hlak kha, kan kotthlĕra hai khom i’n chuktir hlak kha’ la ting in ta, 27 ama ruok chun, ‘Ka hril chêu hi, khaw lai mi am in nih ka hriet naw chêu; nangni thilsuol thawtu po pohai, ka kuoma inthokin fe hmang ro’ la tîng a ti chêu. 28 Abraham hai, Isak hai, Jakob hai le zawlneihai po po Pathien ramah an um ti hmu a, nangni ruok chu tuola hnot suok in nih ti in hriet suok pha chun trapin hâ la râwt in tih. 29 Sak le thlang, sim le hmara inthokin mi hung an ta, an hmun ruot seng hluoin Pathien rama ruoi chu hung kǐl an tih. 30 Ngai ta u, a nuhnung takhai khom a hmasa tak ni ding an um a, a hmasa tak khom a nuhnung tak ni ding an um” a ta.

31 Chuong lai tak chun Farisai threnkhat Isu kuomah an hung a, “Hi taka inthok hin suok la, fe hmang rawh. Herodan sukhlum a tum che a nih” tiin an hung hril a. 32 Ama chun an kuomah, “Fe unla, chu sihal chu hieng ang hin va hril ro, ‘Ngai rawh, voisun le zinga hin ramhuoihai hnot suokin damnawhai sukdam ka ta, ni thum niah zo ka tih’ a tih tiin. 33 Ieng khom ni sien, voisun le zinga le a zing nawk chenin ka thaw pei ding a nih; a’n dik tak chun, Jerusalem puo tieng zawlnei an thi ngai nawh. 34 Aw Jerusalem, Jerusalem, zawlneihai thattu, i kuoma an hung tirhai lunga lo dĕng hlumtu! Arpuiin a tehai a thla hnuoia a op khawm angin i nauhai voi ieng zat am op khâwm ka tum a? Sienkhom i nuom si naw kha. 35 En ta, i in le ram chu rausanin a um ta hi! ‘Lalpa hminga hung chu a hamthra’ i ti hmâ khat chu mi hmu nawk ta naw ti nih ti ka hril che hi” a ta.