4 “Ruolhai, ka hril chêu hi, taksa sukhluma chu hnunga ieng khom tawk poi thei ta lo chu tri naw ro. 5 Tu am in tri ding ti hril ka ti cheu: taksa a sukhlum hnung khoma hremhmuna pei theitu chêu chu tri ro; a nih, ka hril chêu hi, ama mol chu tri ro. 6 Chongzong panga poisa^a hniin an zor hlak an naw maw? Pathien ruok chun anni laia pakhat tê khom hi a theinghil ngai nawh. 7 In sam zâi chen khom a tiem vong annawm! Chuleiin tri naw ro, chongzong tam tak nêkin in hlu lem si a.

8 “Ka hril chêu hi, mihai hmaa mi trantu taphot chu Pathien vantirkohai hmaah Mihriem Naupa hin tran ve’ng a tih. 9 Sienkhom, mihai hmaa mi’n phattu chu Pathien vantirkohai hmaah inphat ve’ng a tih. 10 Mihriem Naupa chu an soisel khomin an soiselna chu ngaidam ning a ta, Thlarau Thienghlim hrilsetu ruok chu ngaidam ni naw nih. 11 Chun, Sunagog hotuhai le rorêltuhai le thuneituhai hmaa an thruoi phâ cheu chun in thiemna thu ieng tin am in hril ding ti thuah lungkham naw ro; 12 in hril ding chu a hun takah Thlarau Thienghlimin a hril ding cheu a ni si a” a ta.

13 Mipui laia pakhat chun, “Zirtirtu, ka unaupa kuomah ka pa ro mi sem ve dingin mi hrilpêk rawh” a ta. 14 Ama chun, “Mihriem, nangni unau kara rorêltu le ro semtuah tuin am a mi ruot a?” a ta. 15 Chun, an kuoma bok chun, “Fimkhur unla, duâmna tinrêng laka inthok chun invêng thra ro; mihriem hringna hi neinungnaa innghat a ni nawh”^b a ta.

16 An kuomah tekhinthu a hril a: “Mi hausa pakhat lo tharsuok chu a hung hlawk ta ĕm êm a. 17 Chuongchun, “Iengtin am thaw tang ka ta? Ka lohma suokhai ka bu inah a’n leng naw ding a ni si a’ tiin a’n ngaituo a. 18 Ama bok chun, ‘Hieng hin thawng ka tih. Ka bu in thriek ka ta, a lien lem bawl ka ta, chu taka chun ka bu le bâl le ka thil neihai sêk khawm ka ta. 19 Ka thlarau kuomah, ‘Kum tam tak dai ding thil thra tam tak i khâwl khăwm ta hi. Tuhin chu chawl hadam la, fain dawn la, hlim takin chĕn ta rawh’ ting ka tih’ a ta. 20 Nisienlakhom Pathienin a kuomah, ‘Mi invêt! Voizan hin i hringna an lăkpĕk ding chĕ a nih. I ta dinga i thawsuokhai po po kha tuin am nei tang a ta?’a ta. 21 Mani ta dinga sum le pai inkhâwl hnŭr a, Pathien tienga pasie si chu, chuong ang chu a nih”^c a ta.

22 A zirtirhai kuomah, “Chuleiin ka hril chêu hi, in hringna ta dingin ieng am fain in bâr ding, in taksa ta dingin ieng am silin in bil ding ti lungkham naw ro. 23 Fak ding nĕkin hringna a poimaw lem a, silfen nêkin taksa a poimaw lem bok. 24 Vaâkhai hi ngaituo ro, bu an tu naw a, an sìk naw a, bupang an nei naw a, bu in an nei bok nawh; nisienlakhom Pathienin a chawm tawl si a. Nangni chu vatehai nêkin in hlu lem dai si a! 25 Nangni lai lungkham leia mani hringna darkar khat suksei thei tu am in um?^d 26 Chuong ang thil chauh khom chu thaw thei si loin, ieng dinga thil dang lem chu in lungkham am a na?

27 “Lili par dam hi ngaituo ro, an inthrang dân chenin. Sin an thaw naw a, pat an kher bok nawh. Nisienlakhom, ka hril chêu hi, Solomon meu khom a ropui thei ang tawpa a’n thuom khan hieng lili par pakhat tluk khom hin chei a ni nawh. 28 Hlo hna, voisun hringa a zinga meia raw hmang nawk el ding hman chuong ang lawma Pathienin a chei chun, aw nangni ringna tlawmhai, chuonghai nêk chun a va’n thuom nasa lem cheu awm de! 29 Nangni chu fak le dawn ding ngaituoin buoi rak rak naw unla, chuong thil chu lungkham bok naw ro. 30 Hieng hi khawvel mi po po buoipui tak a na, in Pain hieng thil hi in mamaw ve ti a hriet. 31 Pathien ram chu zong lem ro, chuong thil po po khom chu a pêk belsa ding chêu a nih. 32 Pawl tlawmhai, tri naw ro, a ram pĕk chêu hi in Pa lawmzawng tak a nih. 33 In neihai zor unla, pasiehai kuomah pe ro, rûkru an lut thei nawna, hângthîmin an fak siet thei nawna le tangka ip a phai thei nawna vana chun in ro ding khawl khawm ro. 34 In ro umna taphotah in lungril khom a um hlak si a.

35 “Rongbawl dinga inchei sa diemin, in khawnvarhai sita inpei zingin um ro. 36 Inneina ruoi kîla fe an pu hung inlawiin kotkhar a hung kik phaa hongpek nghal dinga lo nghaktu siehlawhai ang hin um ro. 37  An pu hung inlawiin ama lo nghâk zingtu siehlaw a hung hmuhai chu an hamthra ie. Thu dik tak ka hril chêu hi, ama chun rongbawl thuom inbel nghal a ta, anni chu dawkanah inthrungtir a ta, bu thurpek a tih. 38 Zan ril amanih, khaw var tieng amanih a hung inlawi a, chuong ang siehlaw a hung hmu chu a hamthra. 39 Hi hi hre ro: inneituin rûkru hung hun ding a hriet chun a in chu vêng thrâng a ta, rok thei naw nih. 40 Nangni khom inpei sa zingin um ro, Mihriem Naupa chu in beisei naw hunah hung palh rawi a tih” a ta.

41 Peter chun, “Lalpa, hi tekhinthu hi keini chau amanih i mi hril, an naw leh mi po po?” tiin a’n don a. 42 Lalpa chun “Sum enkoltu ringum le var tak, a puin ama siehlawhai inrawitu le a hun taka an chan ding bu sempektu dinga a ruot chu tu tak am ning a ta? 43 A pu a hung phaa chuong anga thaw siehlaw a hung hmu chu a hamthra. 44 Thu dik ka hril chêu hi, a nei po po chungah hotuah siem a tih. 45 Amiruokchu, chu siehlaw chun, ‘Ka pu hung vak naw nih’ ti lungril putin a siehlawhai chu vaw sien, faa dawnin inrui buoi sien, 46 a pu chu a’n ring naw niah, a hriet naw kar a hung chun, bong tam insuong a ta, mi ringum nawhai chan inchangtir a tih. 47 A pu ditzawng hre zing sia thaw lo le inpei loa um siehlaw chu na taka vuok ning a tih. 48 Amiruokchu, hriet naw leia hremna khop thil thawtu chu nêp deua vuok ning a tih. Tam tak pĕka um taphot laka chun tam tak phŭt ning a ta, tam tak an inkoltir taphot laka chun tam nawk zuol phût an tih.

49 “Hnuoia hin mei insuo dinga hung ka nih, tu khom hin chok ta sien ka va ti de! 50 Nisienlakhom, baptisma chang ding ka la nei a, chu chu ka hlen hma chun ka ning a va hang inîp ngei de! 51 Hnuoia hin remna inlengtir dinga hung in mi sawn maw? Teu lo e! Ka hril cheu hi, indo inlengtir dinga hung ka ni lem. 52 Tuta hnung chu sungkhata mi panga khom inthrè phok an ta, pathumhai chun pahnihai, pahnihai chun pathumhai chu do an tih. 53 Pain a naupa do a ta, naupain a pa; nuin a naunu do a ta, naunuin a nu; nuin a mo do a ta, moin a tarpi” a ta.

54 Mipuihai kuoma khom chun, “Tlâk tienga inthoka sûm hung suok in hmù chăngin, ‘Ruo a sûr ding a nih’ in ti nghal a, a sûr ngei bok hlak. 55 Sim thli a hung hrang hlakin, ‘Khuo a lum ding a nih’ in ti a, a lum ngei bok hlak. 56 Nangni lêmderhai, hnuoi le van chinchang hrilfie thei siin ieng dinga tu lai hun um dan hi in hriet fie thiem naw?

57 “Ieng dinga thil indik chu nangni khomin in man thiem el naw? 58 I khingpui leh rorêltu hmaa inhêk dinga in fe laiin ama chu lampuiah inrempui dan zong hrâm hrăm rawh, chuong naw chun rorêltu hmaah kei lût a ti che a, rorêltu chun pulis kutah inhlàn a ti che a, pulis chun lung inah khum hlauh rawi a ti che. 59 Ka hril chêu hi, poisa^e hlek tè khom in tlâk zo hmâ chu, chu taka inthok chun suok naw top in tih” a ta.