JOHAN
Thuhma
Chanchin Thra Johan ziek hi Baibula bu 43-na, bung 21 le chang 879 a sei, Zebedai naupa Johan, Hmangai Johan tia hriet lâr le Isu zirtir laia pakhatin a ziek a nih. Ama hi Kaisar Domitian inlal laiin Patmos thlierkarah an intângtir a, chu taka inthoka a hung suok hnungin Efesi khuoah a hung kir a, tar tak a ni chenin kohran lu takah a um a. Chuong lai chun Chanchin Thra chu Roman lalram le a sè vèlah hril darin a um tah a, Peter le Paula khom martar changin, zirtirhai le ringtu hmasa tam tak muol an liem tah bakah Thuthlung Thar bu dang po po khom ziek a ni vong tah a. Zirtirna indik lo a hung suok a, Isu Krista chu Pathien Naupa a ni thu le mihriem taksa puta a hung thu ringhla pawl an hung suok a. Chuleiin, Isu chu Pathien mi tirh, sandamtu, Pathien Naupa a nih ti mihaiin an hriet a, an ring leia chatuon hringna an nei theina dinga A.D 90-96 inkar vela Efesi khuoa a ziek a nih (20:31) A thu chabi chu RING a na, chu thumal chu voi 98 zet a hmang a nih.
Mi varhaiin khawvel le thilsiem chungchang hrilfie an tum changin ‘Pathien Thu’ (Gk. Logos) ti hi an hmang rop hlak a. Chu chu sirsan remchanga hmangin, Chatuon Pathien Thu chu Isu Krista, iengkim bul ni si, sienkhom mihriem taksa puta hung inlang a ni thuin a tran a. Isu chu Pathien Naupa, Pathien tir, Sandamtu, lampui le thutak le hringna a nizie le ama ringtuhai chun chatuon hringna an nei nghal danhai chu inchikna tam tak hmangin a’n entir a. Thil naran le mi hriet lâr tui, bei, var, beram le berampu, grep hrui, kotkhar le thil dang danghai chu mawl taka tekhinnaa hmangin Isu Krista nina inthuk tak chu fie takin a’n entir bok a nih.
A sung thu tlângpui
Thuhma (1:1-18)
Baptistu Johan le Isu zirtir hmasahai (1:19-51)
Isu rongbawlna (2:1-12:50)
Jerusalema Isu hun hnuhnung (13:1-19:40)
Isu thonawkna le inlârna (20:1-31)
Tlangkawmna (21:1-25)