Ropui takin Jerusalem a lût
21
1 Jerusalem an hnai tah a, Oliv tlanga Bethfage khuo an hang tlung chun Isun a zirtir pahni a tir a, an kuomah, 2 “In hma zawn khuoa son va fe unla, sabengtung le a bula inthlung a te tuoi chu hmung in ta; sût unla, ka kuomah hung kei ro. 3 Tu khomin ieng khom an hril chun, ‘Lalpa’n a mamaw a nih’ ting in ta, inhungtir nghal a ti chêu” a ta. 4 Zawlnei hmanga hrila lo um tah chu a hung tlung kimna dingin chuong chu a hung um a nih:5 “Zaiawn naunu chu hril rawh,
‘En ta, inngaitlawm takin,
I lal i kuom tieng a hung,
Sabengtung chungah chuongin,
6 Chuongchun, zirtirhai chu an va fe a, Isun thu a pek angin an thaw a. 7 Sabengtung le a te chu an hung kei a, an chungah an puonhai an pha a, Isu chu a chuong a. 8 Mi tam takin lampuiah an puonhai an pha a, a threnin sawlhna an thliek a, lampuia chun an phá bok a.
9 A hmaa fe le a hnunga zuitu mipui chun,
“Davida Naupa kuomah Hosana!
Lalpa hminga hung chu a hamthra,
Chunghnung taka khin Hosanaa” tiin an khĕk a.
10 Jerusalem a hung lut chun a khawnawtin, “Hi mi hi tu am a na?” tiin an inphu mur mur a. 11 Mipuihai chun, “Ama hi zawlnei Isu, Galili ram Nazaret khuoa mi a nih” tiin an don a.
Tempul a’n thiel fai
12 Isu chu tempul huong sungah a lut a, chu taka thil zortuhai le inchawtuhai chu a hnot suok vong a; tangka thlengtuhai dawkan le parva zortuhai thrungna chu a namthlukpek a; 13 an kuomah, “‘Ka in chu trongtraina in ti’ng an tih’ ti ziek a na, nangni ruok chun suomhmanghai pŭkah in siem lem hi” a ta. 14 Tempula chun mitdel le kebaihai a kuomah an hung a, a lo sukdam tawl a.
15 Nisienlakhom, thiempu lalhai le Dan zirtirtuhaiin thilmak a thawhai le naupang ruolin tempul sunga, “Davida Naupa kuomah Hosana” tia an khĕk an hmu chun an lung a sen êm ĕm a.
16 “Naupanghaiin an hril chu i hriet?” tiin Isu an indon a. Ama chun, “Hre e, hi thu ziek,
‘Naupangtè le nene ne laihai bauah,
Inpâkna kim chu i’n sam suoktir a’
ti hi in tiem ngai naw a ni?” a ta.
17 Anni chu a maksan a, khawpuia inthokin a suok a, Bethani-ah a fe a, chu taka chun a riek a.
Isun theichang a hal hlum
(Mk 11:12-14, 20-24)
18 Zingkâr khawpui pana a fe lai chun a phing a hung trăm tah a. 19 Lam sira chun theichang kung a hei hmu a, a va pan a, a hna chauh naw chu ieng khom a hmu naw a, “Ra ta naw kumkhuo rawh” a ta, theichang chu a thêm ta nghal a. 20 Zirtirhaiin chu chu an hmuin mak an ti hle a, “Ieng tin am theichang hi a zuk thêm nghal el chu!” an ta. 21 Isun a don a, “Thu dik ka hril chêu hi, ringna neia in ringhlel naw phot chun, theichang chunga thaw ang chau hi ni loin, hi tlang kuoma khom hin, ‘Inson la, tuifinrietah inpei hmang dai rawh’ in ti chun in ti angin tlung el a tih. 22 In ring phot chun, trongtraia in hni taphot chu hmung in tih” a ta.
Isu thuneina an cho
23 Isu chu tempulah a lût a, a zirtir lai chun thiempu lalhai le vantlang upahai chu a kuomah an hung a. “Ieng thuneinain am hieng thil hi i thaw a, tuin am thuneina a pêk che a?” tiin an indon a. 24 Isun, “Kei khomin thu indon veng ka ti chêu, chu chu in mi hril thei chun tu thuin am hieng thil hi ka thaw ti hril veng ka ti cheu. 25 Johan baptisma kha vana mi thu am mihriem thu?” a ta. An inrawn khawm a, “Vana mi thu ei ti chun ‘ieng dinga a thu inawi naw?’ mi ti ding a na, 26 mihriem thu ei ti hlak chun ei ta dingin mipui an tri-um si a, mi po poin Johan chu zawlneiah an ngai si a” an ta. 27 Chuongchun, “Kan hriet nawh” an ta. Isu khomin an kuomah, “Kei khomin tu thuin am hieng thil hi ka thaw hril bik naw ning cheu” a ta.
Naupa pahni tekhinthu
28 “Hi thu hi ieng tin am in ngai? Mi tuin amani naupa pahni a nei a. Pakhat kuoma chun, “Ka naupa, voisun chu grep huonah sin va thaw rawh” a ti a. 29 Ama chun, “Ka nuom nawh” tiin a lo don a. Sienkhom, a hnungah a lungril a thlâk a, a fe tah a. 30 Pakhat kuoma khom chun a va fe a, chuong ang bok chun a va ti a. Ama chun, “Aw leh pa” a ta, sienkhom a fe naw a.b 31 Chu mi pahnihai lai chun a tu lemin am a pa ditzawng a thaw a?” a ta. Anni chun, “A hmasa lem chun” an ta. Isun an kuomah, “Thu dik ka hril chêu hi, siekhontu le nawchizorhaiin Pathien ram an lut khal ta chêu a ni hi. 32 Johan chu felna lampui kawkhmu ding cheuin a hung a, ama chu in ring si naw a; siekhontu le nawchizorhai ruok chun ama chu an ring si a. Ama chu in hmu hnung khomin ring dingin in inlamlĕt nuom si nawh.
Grep huon tekhinthu
33 “Tekhinthu dang ngaithla ro. Huon neitu pakhatin grep huon a siem a, dâiin an huon a, grep sawrna ding khur a cho a, vĕngbûk insang tak a bawl bok a, grep huon chu loneitu threnkhat a’n săntir a, ram hla takah a’n zin ta dai a. 34 A ra lo huna chun a chanpuol la dingin a siehlawhai chu huon sântuhai kawla chun a tir a. 35 Huon enkoltuhai chun a siehlawhai chu an lo man a, pakhat an vuok hrep a, pakhat an that a, pakhat lungin an deng a. 36 Siehlaw dang, a hmasa nĕka tam a tir nawk a, anni khom chu a hmaa ang bokin an lo soisak a. 37 Chu hnung chun, ‘Ka naupa ĕm hi chu lo inzàng an tih” tiin a tawp takah a tir a. 38 Nisienlakhom, huon enkoltuhaiin a naupa an lo hmu chun, “Hi pa hi ro hluotu ding a na, thaw ro that ei ta, a ro hluo ding hi neipek ei tih’ an ti tawl a. 39 Chuongchun, ama chu an man a, grep huona inthok chun an thè suok a, an sukhlum tah a. 40 Grep huon neitu a hung pha chun, chuong huon enkoltuhai chu iem hung law tang a ta?” a ta. 41 Anni chun, “Chuong mi suolhai chu sukboral a ta, grep huon chu enkoltu dang, a lo hun taphota a rahai chu ama pe pei dinghai kuomah insăntir a tih” an ta.
42 Isun an kuomah, “Pathien Lekha thua,
‘In bawltuhai lung hnawl ngei kha,
A bulthrut tak a hung ni ta si;
Chu chu Lalpa thilthaw a na,
Ei hmuin ropui ei ti hle’
ti dam hi in tiem ngai naw a ni?
43 Chu lei chun ka hril chêu hi, Pathien ram chu lakpek ning in ta, ra insuotu dinghai kuomah pek lem ning a tih. 44 Ka hril chêu hi, tu khom chu lung chunga tlu chu koi dar a ta, a del lem chu râwt nawi a tih” a ta.