Fimkhur dinga infuina
23
1 Chuongchun, mipui le a zirtirhai kuoma chun Isun, 2 “Dan zirtirtuhai le Farisaihai chu Mosie Dan zirtirtua ruot an ni a; 3 chuleiin an thu awi unla, an hril cheu taphot chu thaw ro. Nisienlakhom, an thilthaw ang chu thaw ve naw ro, an hrilhai chu a takin an zawm ngai si nawh. 4 Phur rik tak tak an intĕl a, mi liengkoah an hnăwk a, anni ruok chun kut hmawr khomin an tawk nuom nawh. 5 An thaw taphot chu mi hmu dinga an thaw a nih. An băn le an bawka an hrèn dè thubawma chu an suklien a, an trongtraina puonb hmor inbawk khom an suksei bok a; 6 ruoi thrĕna hmunah thrungna thra tak le sunagoga hai thrungna langsâr dam, bazar hmuna mi chibai buk dam le 7 mihaiin ‘Rabi’ tia an ko chu an thlâkhla hlak si a.8 “Nangni ruok chu ‘Rabi’ tiin inko naw ro, zirtirtu pakhat chauh in nei a, inrêngin unau in ni si a. 9 Chun, hnuoia mi tu khom ‘pa’ ti naw ro, ‘Pa’ pakhat in nei, vana mi chu. 10 ‘Zirtirtu’ inti naw ro, Zirtirtu pakhat chauh in nei a, chu chu Krista a nih. 11 Nangni laia a ropui tak chu in rongbawltu a ni ding a nih. 12 Tu khom inngaihlu chu tlawm an ta, inngaitlawm taphot chu chawimawi ning an tih.
Isun lemderhai a dem
13 “Nangni Dan zirtirtuhai le Farisai lêmderhai, in chung a rik ie! Mihai lutna ding van ram kot in khàrpek a, nangni hlak lut si lo, a lut tumhai lut hlak in phal bok si nawh. 14 Nangni lêmderhai, hmeithaihai in le lo in fak tlaran a, mi hmuah sawt tak tak in trongtrai a. Chuleiin, nasa nawk zuola hrem ning in tih. 15 Nangni Dan zirtirtuhai le Farisai lêmderhai, in chung a rik ie! Saphunc pakhat siem dingin khawmuol le tuipuiah in inzin kuol a, saphuna in siem hnungin nangni let hnia hremhmun nauin in siem hlak si.
16 “Nangni thruoitu mitdelhai, ‘Tu khom tempul sâla an inkhâm chun ieng khom a ni naw a, tu khomin tempula rangkachak sâla an inkhâm ruok chun a hlen ngei ding a nih’ tituhai, in chung a rik ie! 17 Nangni mitdel invêthai, a ieng am a ropui lem, rangkachak am, annawleh rangkachak chu rangkachak thienghlima siemtu tempul chu? 18 Chun, ‘Miin maicham sâlin inkhâm sien ieng khom a ni nawh; maicham chunga thilpêk sâla inkhâm ruok chun a hlen ngei ding a nih’ in ti bok a. 19 Nangni mitdel intlawhai, thilpêk am, annawleh thilpêk sukthienghlimtu maicham chu a ropui lem? 20 Chuleiin, maicham sâla inkhâmtu chun maicham le a chunga um po po sâlin a’n khâm a nih. 21 Tempul sâla inkhâmtu chun tempul le a hluotu sâlin a’n khâm a nih. 22 Van sâla inkhâmtu chun Pathien thrungpha le a chunga inthrung sâlin a’n khâm a nih.
23 “Nangni Dan zirtirtuhai le Farisai lêmderhai, in chung a pik ie! Pudina dam, lêngmaser dam le pardi dam chenin sawma pakhat in pĕk hlak a; Dan thu poimaw lem indikna dam, zangaina dam, ringumna dam hi in ngàithá bok si a; nisienlakhom a nuhnung lem hi annawm in thaw ding chu, a danghai khom ngàithà chuong loin. 24 Thruoitu mitdelhai, thohmite dawn sa inlauin in thlit fai a, sanghawngsei in dol lem si hlak!
25 Nangni Dan zirtirtuhai le Farisai lemderhai, in chung a rik ie! No le thleng puo tieng in sawp fai hlak a, a sung tieng ruok chu duâmna le insûmnawnain a sip si a. 26 Nang Farisai mitdel, no le thleng sung tieng chu sawp fai hmasa rawh, a puo tieng khom hung fai el a tih.
27 Nangni Dan zirtirtuhai le Farisai lemderhai, in chung a rik ie! Thlăn năl vâr, a puo tienga mawi taka inlang, a sung ruok chu mithi ru le porchè tinrênga sip ang chu in nih. 28 Nangni khom chuong ang char chun a puo tieng chu mi hmuah mi indik angin in inlang a, in sung tieng ruok chu vervekna le rîtlonaa sip a ni si.
Hrem an ni ding thu Isun a hril
29 “Dan zirtirtuhai le Farisai lemderhai, in chung a pik ie! Zawlnei thlàn inhai in bawl a, mi felhai thlàn in cheimawi a. 30 ‘Ei pi le puhai huna khan lo um ve ni inla khom, zawlnei thisen insuonaa chu thrang ve nawng ei tih’ in ti hlak. 31 Chu chun zawlnei thattuhai thla in ni ngeizie in suklang. 32 In pi le puhaiin suol an lo thaw ang chu hlen ve law law ro. 33 Rûlhai! Rûlngân thlahai! Thiemnaw changa hremhmuna in fe ding hi ieng tin am pumpel thei in ta? 34 Hi lei hin a nih in kuomah zawlneihai, mi varhai le zirtirtuhai ka hung tir ding chu. A thren thatin hemdeng in ta; a thren sunagogah vuong in ta, khaw tinah hnot zui in tih. 35 Chuongchun, Abel, mi fel tak thisen insuo a nia inthoka hmun thienghlim le maicham inkara Baraki naupa Zakari thisen in insuo ni chen khan, hnuoi chunga mi fel thisen suok po po maw chu nangni chungah tlâng a tih. 36 Thu dik ka hril cheu hi, chuong po po chu tuta ruoltharhai chunga hin tlung a tih.
Isun Jerusalem a trà
37 “Aw Jerusalem, Jerusalem, zawlneihai thattu le a tirhai lo dĕng hlumtu! Arpuiin a têhai a thla hnuoia a op khawm angin i nauhai voi ieng zat am op khâwm ka tum ta a? Sienkhom i nuom si naw kha. 38 En ta, i in chu ram dèra maksan a ni ta hi. 39 Ka hril cheu hi, ‘Lalpa hminga hung chu a hamthra’ in ti hmâ khat chu mi hmu nawk ta ngai naw ti niu” a ta.