Isu le Zakai
19
1 Isu chun Jeriko khuo a lût a, a sun pĕl ding a na. 2 Chu khuoa chun mi pakhat a hming Zakai a um a, ama chu siekhon hotu, mi hausa tak a nih. 3 Isu chu mi ieng ang hrim am a nih ti hmu a nuom a, a dung a tawi si leiin mipui lai chun a hmu phăk naw a. 4 Chuongchun, Isu hungna ding lampuia chun a lo tlăn khal a, en dingin theichang kŭngah a lâwn a. 5 Chu hmun Isun a tlung chun a hang en a, “Zakai, hung trum vat rawh, voisun i inah ka tlung ding a nih” a ta. 6 Chuongchun a hung trum nghăl a, hlim takin ama chu a’n tlungtir a. 7 Chu chu mipuiin an hmu chun an rêngin, “Mi suol ina tlung dingin a lût ta saw!” tiin an chier a.8 Zakai chu a ngîr a, Lalpa kuoma chun, “Ngai ta, Lalpa, tuta inthok chu ka sum zatve pasiehai sem ka ta, tu thil khom indik lo taka ka lakpek chun a let liin rul ka tih” a ta. 9 Isun a kuomah, “Voisun hi ina hin sandamna a hung tlung tah, ama khom Abraham naupa a ni si a. 10 Mihriem Naupa hi bohmanghai zonga sandam dinga hung a ni hrim a nih” a ta.
Rangkachak tangka tekhinthu
11 Chu thu chu an ngaithlak laiin, Jerusalem an hnai ta lei le Pathien ram chu hung tlung nghal dinga mipuiin an ngai leiin hi tekhinthu hi a hril ta pei a. 12 “Muolkîl mi thra pakhat chu a’n lal theina ding thu la ding le hung kîr nawk dingin ram hla takah a fe a.a 13 A fe tawmin a siehlaw sawmhai chu a ko a, rangkachak tangka sawmj seng a pêk a, an kuomah, ‘Ka thang hmang sungin hi hin lo sumdawng ro’ a ta. 14 A khuo le tuihai chun ama chu an theida leiin, ‘Hi pa hi kan lal dingin kan dit nawh’ ti dingin palai an tir zui ve nghal a.
15 “Lalna thu chu laa a hung kǐr nawkin a tangka pĕk chu an sukpung zăt indon dingin a siehlawhai chu ko tawl a. 16 A hmasa tak chu a hung a, ‘Pu, i rangkachak tangka kha a let sawmin a pung’ a ta. 17 A pu chun, ‘Ka siehlaw ditum, i thaw thra ie. Thil chiteah i ringum leiin khaw sawm chungah hotuah um rawh’ a ta. 18 A dottu chun, ‘Pu, i rangkachak tangka kha a let ngain a pung’ a ta. 19 Ama chun, ‘Nang khom khaw nga chungah hotuah um rawh’ a ta.
20 “Siehlaw dang chu a hung a, ‘Pu, hih, i rangkachak tangka kha, puona funin ka kol thra a. 21 Mi khir tak i ni leiin ka tri che a; i sie nawnaa khom i lak hlak a, i tu nawnaa khom i sîk hlak si a” a ta.
22 “A pu chun, ‘Siehlaw suol, i bau suok ngeiin thiem naw ka’n chang che. Mi khir tak ka na, ka sie nawnaa khom ka lâk a, ka tu naw khom ka sik hlak maw? 23 Chuong a ni sa chun ka tangka pĕk che kha a pung leh ka’n khawm theina dingin ieng dinga sumdawngna hmunah siein i lo sukhlawk naw?’ a ta. 24 Chun, a kawla ngirhai kuoma chun, ‘A rangkachak tangka kha lakpêk unla, rangkachak tangka sawm neitu kuomah pe ro’ a ta. 25 Anni chun, ‘Pu, ama chun sawm a nei annawm’ an ta. 26 Ka hril chêu hi, a nei taphot pe belsang an ta, a nei naw chu a nei sun khom lakpek ning a tih. 27 Chun, hieng ka hmêlma, lal dinga mi dit nawtuhai hi hung thruoi unla, ka hma bula ngei that ro’ a ta” tiin a hril tawl a.
Ropui takin Jerusalemah Isu a lût
28 Chuong thu a hril zo chun Jerusalem an pan tung a, hma a lo lăwk a. 29 Oliv tlanga um Bethphage le Bethani khuo an tlung tawmin zirtirhai laia mi pahnih a tir a. 30 “Ei hma zawna khuoa son va fe unla, in va lŭt chun sabengtung tuoi inthlung, tu khom la chuongna ngai lo chu va hmung in ta, sût inla, hung kei ro. 31 Chun, tu khomin, ‘Ieng dinga in sût?’ an ti chun ‘Lalpan a mamaw a nih’ ti ro” a ta. 32 Chuongchun, a tirhai chu an fe a, an kuoma a hril ang ngeiin an va hmu a. 33 Sabengtung an sût lai chun a neituhaiin. “Sabengtung kha iem a ta in sût el a?” an ta. 34 Anni chun, “Lalpan a mamaw a nih” an ta. 35 Isu kuom an hung kei tlung chun sabengtung chunga chun an puonhai an pha a, Isu an inchuongtir a. 36 A fena lampuia chun an puonhai an pha pei a.
37 Jerusalem an tlung tawm hnai, Oliv tlang an liem thlak lai chun a thilmak thaw tam tak hmutu a zuitu mipui tam tak chun hlim tak le inring takin Pathien an inpăk a,
38 “Lalpa hminga lal hung chu a hamthra,
Vanah rem thu inleng sien,
Chunghnungtak kuomah
Ropuina um raw se”
an ta.
39 Mipui laia Farisai threnkhat chun Isu kuomah “Zirtirtu, i zirtirhai hi hal tawl rawh” an ta. 40 Ama chun, “Ka hril cheu hi, anni hi an to chun hieng lunghai hi khêk suok an tih” a ta.
Isun Jerusalem a tră
41 Jerusalem a tlung tawma khawpui a hmu chun a tră khum a. 42 “Aw nang hin voisun dam bĕk hin muongna hung intluntu ding che hi hrie chu ni la aw! Nisienlakhom tuhin chu i hmu thei lo dinga thup a ni si. 43 I râlhaiin i vêla hnuoi kul siem a, sîr tina inthoka ruongchaiche thlak khuma an dang chĕp ni chè chu a la hung tlung ding a nih. 44 I sûnga chêng i nauhai leh hnuoi dĕngnain la hmang an ti chêu. I sunga lung inthuo rêng rĕng hlà nei nawng an ta, Pathienin a hung kan lai che i hriet naw leiin chuong chu i chungah a la hung tlung ding a nih” tiin.
Isu tempulah a lût
45 Tempula chun a va lût a, thil zortuhai chu a hnot suok a, 46 an kuomah, “‘Ka in chu trongtraina in ning a tih’ ti ziek a na, nangni ruok chun suohmanghai pûkah in siem lem si a” a ta.