Sabat nia invûng sukdam
14
1 Sabat ni trum khat chu Farisaihai laia mi challang pakhat inah bu fa dingin Isu a fe a, an lo enthlak nasa hle a. 2 Chun, ngai ta, a hmaa chun damnaw invûng pakhat a um a. 3 Isun Dan zirtirtuhai le Farisaihai chu a biek a, “Sabat nia sukdam a thieng am a thieng naw?” tiin a’n don tawl a. 4 Anni ruok chu an to zing a. Ama chun damnaw chu a chel a, a sukdam a, a’n fetir tah a. 5 Anni rawi chu a biek a, “Nangni lai in naupaa amanih in bawngchal amanih Sabat niin tuikulah tla ta ang sien, in lak suok nghal naw ding maw?” a ta. 6 Chu khom chu an don thei naw bok a.Inngaitlawmna le inphalna
7 Bu faa an fielhai chun thrungna thrá thrà an inchû pei ti a hmuin an kuomah tekhinthu a hril a. 8 “Tuin amanih inneina ruoi kîl dinga a fiel chê chun thrungna thra taka thrung inchŭ naw rawh, nang nĕka mi lien lem lo fiel pal hlauh rawi a tih. 9 A fieltu chein, ‘Hi pa thrungna ding hi inkien rawh’ a hung ti el chun hmai mâwk takin thrungna thra naw takah i’n son a ngai ding a ni si a. 10 Chuleiin, an fiel chăng che khom thrungna thra naw tak inchù lem la, chuongchun a fieltu chè chu hung a ta, ‘Ruolpa, thrungna thra lemah hung inson raw khai’ hung ti lem a ta, thlaithleng i kìlpuihai mithmuah chawimawiin um i tih. 11 Inngaihlu taphot chu tlawm an ta, inngaitlawm taphot chawimawiin um an tih” a ta.
12 Ama fieltu kuoma khom chun Isun, “Sŭn amanih zăn amania ruoi i thrè pha leh i ruolhai, i unauhai, i laibunghai le in venga hausahai chu fiel naw rawh; i fiel chun fiel vêng an ti che a, rul nawk hlauh an ti che. 13 Ruoi i thrè chun pasehai, piengsuolhai, kebaihai, mitdelhai fiel lem rawh. 14 Anni chun rulna ding che an nei naw leiin malsawmin um i ta, mifelhai thonawkna nia chun rulin i um ding a ni si a” a ta.
Ruoi ropui tekhinthu
15 A thlaithleng otpui laia mi pakhatin chu chu a hrietin, “Pathien rama ruoi kìltu ding chu a hamthra ie!” a ta. 16 Isu ruok chun, “Mi tuin amanih zanah ruoi ropui tak a buotsai a, mi tam tak a fiel a. 17 A fak huna chun a mi fielhai kuomah, ‘Hung ta ro leh, tuhin chu iengkim inpei a ni tah’ tia hril dingin a siehlaw a tir a. 18 Sienkhom, an rênga inthuruol ang elin suonlam an lo siem seng a. 19 A hmasa tak chun, ‘Lo ka’n chawk a, a ena fe a trûl a, lunginsiet takin mi hung inphapĕk el rawh’ a ta. 20 A dot chun, ‘Bawngchal sor ding tuok nga ka’n chawk a, va sor sin dingin ka fe ding a na, lunginsiet takin mi hung inphapĕk el rawh’ a ta. Mi dang chun, ‘Nuhmei nei hlim ka na, chuleiin ka hung thei naw a nih’ a ti bok a. 21 Siehlaw chu a kîr a, chuong thu chu a pu a hril a. Inneitupa lung chu a sen hle a, a siehlaw kuoma chun, ‘Suok nawk nghal la, kotthlĕr le kawmkâra hai fe la, pase hai, piengsuol hai, mitdel hai le kebai hai hi taka hin hung thruoi tawl rawh’ a ta. 22 Siehlaw chun, ‘Pu, i thupek ang khan ka thaw a, sienkhom hmun ruok a la um ta rop’ a ta. 23 A pu chun, ‘Suok nawk la, lamliena hai, khawhnâwma hai fe la, ka in sip ding mi hung thruoi khawm hrâm rawh. 24 Ka hril che hi, mi ka fielhai khan tu khomin ka ruoi kîl ve naw ni hai’ tiin” a ta.
Isu zui dan ding
25 Isu ruolin mipui tam tak an fe ve a, a hang ngha kir a, an kuomah, 26 “Ka kuoma hung taphot chun an pa hai, an nu hai, an nuhmei hai, an nau hai, an unau hai, an farnu hai, a nih, anni hringna chenin an theidab naw chun ka zirtir ni thei naw nih. 27 Mi zui nuom sia mani kraws put si lo chu ka zirtir ni thei bok naw nih. 28 “Nangni lai in ropui bawl tumtu chun thrung meua a seng zat ding le a bawl zona khop sum a nei le nei naw hisap hmasa phot lo tu’m um an ta? 29 A lungphum rem ta zet sia a bawl zo thei naw chun a hmu taphotin, 30 ‘Hi pa hin in a rel uoia chu a bawl zo thei si naw a’ tiin nuisan an tih. 31 Chun, lal tu khom lal dang do dinga inthok ding ni sien, sipai sing hni ama do dinga hung inthokhai chu sipai sing khat le chauh a lo bei ngam ding le ding naw thrung meua ngaituo hmasa zet lo tu’m um an ta? 32 A bei ngam naw ding a ni chun hla fea an um laiin inremna thu hril dingin palai tir a tih. 33 Chuong ang bokin nangni khom nei po po maksan vong nawtu chu ka zirtir ni thei naw nih.
Chi tekhinthu