3 Tekhinthu hmangin an kuomah thu tam tak a hril a: “Ngai ta u, bu chi thetu chu bu chi thè dingin a fe a. 4 A hang thè chun a thren lampuiah a tla a, vatehaiin an tlân zo el tah a. 5 A thren pielthleng chung, pil inphănnaah a tla a, pil a sà naw leiin a hung tro nghal a. 6 Sienkhom nisa a hung insăng a, a em vuoi a, zung a thlâk naw leiin a hung rop tah a. 7 A thren chu hling buk lai a tla a, hling an hung inthrang a, an dîp hmang tah a. 8 A thren ruok chu hnuoi thraah a tla a, a lêt za dam, a lêt sawmruk dam, a lêt sawmthum dâmin a hung rà tah a. 9 Ngaithlâkna dinga na nei chun ngaithla ngun raw se” a ta.

10 Zirtirhai chu a kuomah an hung a, “Ieng dinga mipuihai kuomah tekhinthu hmangin i hril hlak am a na?” an ta.

11 Ama chun, “Van ram thu ril chu nangni hriet dinga ti a na, anni hriet dinga ti a ni ve nawh. 12 Tu khom a nei chu pe belsang an ta, hung hau nawk zuol a ta; a nei naw chu a nei sun khom lăkpêk an tih. 13 Chuong lei chun an kuomah tekhinthuin ka hril a nih, hmu zing sia hmu ngai loa, ngaithla zing sia hre ngai loa an umna ding le an hriet thiem bok nawna dingin. 14 Isai hrillawkna kha anni chungah a hung tlung tah a ni hi:

16 “Nangni mit ruok chu a vangnei ie, in hmu hlak leiin; in na khom a vangnei ie, in ngaithlak leiin. 17 Thu dik ka hril chêu hi, zawlneihai le mi fel tam tak khomin in thil hmuhai hi hmu an chăk hlak a, an hmu si nawh; in thu hriethai khom hi hriet ve an inhăwk a, an hriet si nawh.

18 “Bu chi thètu tekhinthu umzie chu ngaithla ro. 19 Tu khomin Pathien ram thu chu a ngaithlak a, a hriet thiem si naw chun, mi suol chu a hung a, a lungrila thè sa chu a hung lak hmangpek hlak a. Chuong mihai chu lam laia tlahai ang chu an nih. 20 Chun, pielthleng hmuna tla chu, thu ngaithla a, lawm taka pom nghâltu ang hi a nih. 21 Sienkhom zung a nei naw a, sawt naw te chauh a dai a, thu leia suknomnatna amanih a hung um pha leh a tlu nawk nghal hlak. 22 Hling buk laia tla chu, thu chu ngaithla a, sienkhom a thu dong chu khawvel lungkhamna le hausakna tienga hìpnain an dîp ral leia ra insuo ta lo ang chu a nih. 23 Hnuoi thraa tla chu, thu chu ngaithlaa hre thiem mi chu a nih; ama chu a lêt za dam, a lêt sawmruk dam, a lêt sawmthum damin a ra hlak” a ta.

24 Tekhinthu dang an kuomah a hril nawk a. “Van ram chu mi, a loa chi thra thètu ang chu a nih. 25 Nisienlakhom, zanah mi an in vong laiin a hmêlma a hung a, bu lai chun bu tehlèm a the a, a fe hmang tah a. 26 Bu chu a hung mawng a, a hung vui chun bu tehlĕm chu a hung inlang ve tah a. 27 Siehlawhai chu loneitu kuoma chun an hung a, ‘Pu, i loah bu chi thra ngot i thĕ an naw maw? Bu tehlĕm saw khaw laia inthoka hung suok am a na?’ an ta. 28 Ama chun, ‘Hmêlmain an lo thĕ a ni chu” a ta. Siehlawhai chun, “Chuong an leh, va phawi vong inla thra i ti naw maw?’ an ta 29 Ama ruok chun, ‘Ti lo e, bu tehlĕm in phawinaah bu tak phawi sa palh rawi in tih. 30 Bu sîk chenin um tlâng raw hai se. Bu sîk pha leh a sîktuhai kawlah: Bu tehlĕmhai^a chu lawr khawm hmasa zet unla, raw dingin intêl ro; chu zoah bu tak chu ka bu inah sêk lut ro, tiin hril ka tih’ a ti a” a ta.

31 Tekhinthu dang a hril nawk a. “Van ram chu antram chi miin a lâk a, a loa a thĕ ang hi a nih. 32 Thlai chi laia chîn tak ni sien khom a hung inthrang lien chun thlai danghai nêkin a hung lien a, thing a hung ni a, chuongchun chungleng vatehai an hung a, a zâra hai an riek hlak” a ta.

33 Tekhinthu dang a hril nawk a. “Van ram chu nuhmeiin chol a làk a, beiphit tekhawng thum, bei dinga a hmet hnâk chu a rênga chie tho vong dinga a phul ang hi a nih” a ta.

34 Chuong po po chu tekhinthu hmangin Isun mipui kuomah a hril a, tekhinthu hmang loin an kuomah ieng khom a hril nawh. 35 Zawlnei Isai hmanga hrila um chu a hung tlung kim tah a nih:

36 Chuongchun, mipuihai chu a fesan a, inah a lut a, a zirtirhai a kuomah an hung a, “Loa bu tehlĕm tekhinthu kha mi hrilfie rawh” an ta.

37 Ama chun a don a, “Chi thra thetu chu Mihriem Naupa hi a na; lo chu khawvel hi a nih. 38 Chi thra chu Ram nauhai an na, bu tehlêm ruok chu mi suol nauhai an nih. 39 Bu tehlĕm thĕtu hmêlma chu Diebol a nih. Bu sîk chu khawvel tawp hun^b ding a na, bu siktuhai chu vantirkohai an nih. 40 Bu tehlĕmhai chu la khawm a, meia an raw angin khawvel tawp pha chun la um a tih. 41 Mihriem Naupa hin vantirkohai tir suok a ta, suol inthawtirtu le thil suol thawtuhai po po chu a rama inthokin la suok vong an ta, 42 rawtuina meiah pei an ta, chu taka chun trapin hâ râwt an tih. 43 Chu huna chun mi felhai chu an Pa ramah nisa angin var tang an tih. Ngaithlâkna dinga na nei chun ngaithla ngun raw se.

45 “Chuong ang bokin, van ram chu sumdawngtuin tuikeplung hlu tak a zong a, 46 chu tuikeplung hlu tak chu a hmu phing leh a fe a, a nei po po a zor a, an chăwk tah ang hi a nih.

47 “Van ram chu lèn khang, tuipuiah kei a, nga chi tinrêng an fun khawmna ang chu a ni bok. 48 Lèn chu a sip pha leh nga mantuhai chun va kamah an hnŭk suok a, an inthrung a, a thra po bawmah an sie khawm a, a sie ruok chu an pei a. 49 Khawvel tawp pha khom chuong ang bok chun la um a tih. Vantirkohai hung an ta, mi fel laia inzep mi suolhai chu hung thlier an ta, 50 rawtuina meiah pei an ta, chu taka chun trapin hâ râwt an tih.”

51 Isun an kuomah “Chuong po po chu in hriet thiem am?” a ta. Anni chun “Hre thiem e” an ta. 52 Ama chun, “Chuleiin, Dan zirtirtu, van ram thu inchuktu taphot chu in neitu, a robawma inthoka rothil hlui le thar hung phor suoktu ang hi a nih” a ta.

53 Chuong tekhinthuhai chu Isun a hril zoin chu hmuna inthok chun a suok a. 54 An khuo a hung tlung a, sunagogah mihai a’n chuktir a, mak an ti hle a. “Hi pa hin varna le hieng thilmak thawtheina hi khaw laia inthoka a hmu am ning a ta? 55 Hi pa hi mistiri naupa kha a ni naw maw? A nu khom Mari an ti kha a ni naw’m a ni? A unauhai khom Jakob hai, Josefa hai, Simon hai, Juda hai kha an ni nawm a ni? 56 A farnuhai khom eini lai an um vong an nawm a ni? Hieng po po hi khaw laia inthoka a hriet am ning a ta?” an ta. 57 Ama chu an hmu thiem ta naw a. Isun an kuomah, “Zawlnei chun ama khuo tieng le a sunghai lai ti chauh naw chu hmun tinah chawimawi a hlaw hlak” a tisan a. 58 An ring naw leiin chu taka chun thilmak a thaw tam nawh.