Trongtrai dan ding a zirtir
11
1 Trum khat chu hmun pakhatah Isu a trongtrai a. A trongtrai zo chun a zirtirhai laia pakhat chun, “Lalpa, Johanin trongtrai dan a zirtirhai a’n chuktir ang bokin mi’n chuktir ve rawh” a ta. 2 Ama chun, “In trongtraiin hieng hin ti hlak ro:Pa, I hming inzaum sien,
I ram hung tlung raw se;
3 Ni tin kan fak khop bu mi pe la,
4 Kan chunga thil suol thawtuhai,
Kan ngaidam hlak ang bokin,
Kan suolnahai mi ngaidam la,
Thlĕmnaah mi thruoi lut naw rawh”a tiin.
5 Isun an kuomah, “Nangni lai tuin amani ruol nei sien, zàn rilah a inah fein, ‘Ruolpa, bei phèk pathum mi’n pŭktir rawh, 6 ka ruolpa inzinin a mi hung sir a, hang pek ding ieng khom ka nei dĕr nawh’ va ti sien, 7 in sunga mi chun, ‘Mi hung sukbuoi naw rawh, tuhin chu kot khom kan kal vong tah a, ka nauhai leh khumah kan zâl tah a, thoin ka hung pek thei naw che’ tisan sien khom, 8 ka hril cheu hi, a ruolpa a ni leiin thoin va pe el naw sien khom, a hni tlut tlut leiin tho a ta, a mamaw zât zăt peng a tih.
9 “Chuongchun, ka hril chêu hi, hni ro, peng an ti cheu; zong ro, hmung in tih; kik ro, hongpek an ti cheu. 10 Tu khom a hni phot chun a dong a; tu khom a zong chun a hmu a; tu khom a kik chu hongpek ni’ng a tih. 11 Nangni pahai lai tu khom a naupan bei hni sien, tuin am lung peng a ta? Nga hni sien, tuin am rûl a pêk ding? 12 Artui hni sien, tuin am ainuvĕt a pêk ding? 13 Nangni mi suolhai hmanin in nauhai thil thra pĕk nachang in hriet si chun in Pa vana mi chun a hnituhai chu tam nawk zuolin Thlarau Thienghlim a va pêk awm ngei chêu de!” a ta.
Isu le Belzebub
14 Ramhuoi man, trong thei lo mi pakhat sûnga inthokin Isun ramhuoi chu a hnot suok a, a hung suok hnung chun a hung trong suok el tah a, mipui chun mak an ti hle a. 15 Sienkhom, anni laia threnkhat chun, “Ramhuoi lal Belzebub lei annawm ramhuoi a hnot suok hi” an ta. 16 Mi threnkhat ruok chun ama fiena dingin vana inthoka inchikna thilmak inentir dingin an phŭt a. 17 Isun an ngaituohai a lo hriet a, an kuomah, “Khaw lai ram khom mani le mani indo taphot chu an ram hlak; insung khom mani le mani indo chu an tlu hlak. 18 Setan khom ama le ama indo sien, iengtin am ram inngìr a ta? Nangnin Belzebub leia ramhuoihai hnot suok dama in mi hril leiin hi thu hi ka hril a nih. 19 Kei hi Belzebub leia ramhuoihai hnot suok hlak ka ni chun, in mihaiin tu leiin am ramhuoi an hnot suok hlak a? Chuongchun, anni kha annawm in chungthu rêltu dinghai chu. 20 Amiruokchu, Pathien kut leia ramhuoi hnot suok ka ni si chun in kuomah Pathien ram chu a hung tlung tah tǐna a nih.
21 “Mi hrâtin hriemhrei kim leh in a vèng chun, a thil neihai chu a him hlak. 22 Nisienlakhom, a nêka hrât lemin a hung bei a, a hnè chun a ringsan tak ralthuom chu lăkpĕk a ta, a râllakhai chu a nuom nuomin sem dar a tih. 23 Keima tienga thrang naw taphot chu mi dotu a na, mi lakhâwmpuitu naw chun a sukdar a nih”, a ta.
Thlarau tirdakum kir nawk
24 Thlarau tirdakum a hnot suok chu mi sûnga inthoka a hung suok chun chawlna hmun zongin tui um nawna hmunah a’n vâk a’n vâk a, sienkhom umna ding hmun a hmu naw leiin ‘Ka in suoksana khan kir nawk el ka tih’ a ta. 25 A va tlung chun phìt faia chei diemin a hmu a. 26 Chuongchun, a fe a, a nêka suol lem ngot thlarau pasari a va thruoi a, an hung lŭt a, chu taka chun umhmun an khuor tah a. Chu mipa ngirhmun chu a hmaa nêkin a hung se lem dai tah a nih” a ta.
Hamthratna tak tak
27 Chuong thu chu Isun a hril lai mipui laia inthokin nu pakhat a hung khêk suok a, “A hringtu chè chu a hamthra, i nènè nêk ngei khom” a ta. 28 Isu ruok chun, “Pathien thu hrea zawmtuhai hi an hamthra lem ie” a ta.
Inchikna an phŭt
29 Mipui hung pung khawm pei lai chun Isun, “Tu lai ruoltharhai hi mi rilo tak an nih; inchikna thilmak an phŭt a, sienkhom Jona inchikna chauh naw chu inchikna thilmak hrim inentir ni naw ni hai; 30 Jona chu Ninevi khaw mihai ta dinga inchikna a ni ang khan, Mihriem Naupa hi tu lai ruoltharhai ta dinga inchikna ning a tih.
31 “Sim tieng lalnu kha Rorêlna nia chun tu lai ruoltharhai ruol hin tho ve’ng a ta, thiem naw inchangtir a tih; Solomon varna ngaithla dingin kawlkawdonga inthokin a hung si a; ngai ta u, Solomon nĕka ropui lem chu hi taka hin a um. 32 Ninevi mihai chu Rorêlna nia chun tu lai ruoltharhai leh hin ngir tlâng an ta, thiem naw inchangtir an tih, Jona thu hril leiin an sim si a. Ngai ta u, hi taka hin Jona nêka ropui lem chu a um.
Taksa khawnvar
33 “Tu khomin khawnvar sitin kilkhăwrah an sie ngai naw a, leikhâwrin an khup khum ngai bok nawh, a hung luthaiin a var an hmu theina dingin a sienaah an sie lem hlak. 34 I mit hi i taksa ta dinga khawnvar a nih. I mit a thra chun i taksa pumin var a ta, a thra naw ruok chun i pumin inthim a tih. 35 Chuleiin, fimkhur rawh, nangmaa var um chu thim lo ni pal hlauh rawi a tih. 36 I taksa pum a’n thimna lai um loa a var suok vong chun, khawnvar varin a sun var ang chein i pumin var suok i tih” a ta.
Farisaihai le Dan zirtirtuhai a soisel
37 Thu a hril zo chun Farisai pakhatin bu fa dingin a hung fiel a, ama chu a zui lŭt a, dawkana thlaithleng chu a ot nghal a. 38 Kut sawp loa thlaithleng a ot hmutu Farisai chun mak a ti hle a. 39 Lalpa chun an kuomah, “Nangni Farisaihai hin no le thlĕng puo tieng in sawp fai takluo a, in sŭng tieng ruok chu duâmna le rîtlonain a sip si a. 40 Mi intlawhai, a puo tieng siemtu chun a sûng tieng khom a siem nawm a nih? 41 No le thlĕng sûnga um chu mi retheihai pe unla, in ta dingin iengkim fâi el a tih.
42 “Nangni Farisaihai, in chung a pik ie! Pudina dam, lengmasĕr dam le huona thlai hna tinrêng sawmapakhat in pĕk hlak a, sienkhom indikna le Pathien hmangaina tieng ruok chu in ngaithâ si a; chu chu annawm in nuna in hmang hlak lem ding chu, a danghai khom ngaithă chuong loin. 43 Nangni Farisaihai, in chung a pik ie! Sunagogah thrungna hmatawng le dawr hmuna hai mi chibai bûk in ngaina hlak si a. 44 In chung a pik ie! Thlăn hmun inchik lo, hre loa mi’n an hraw hlak ang chu in nih” a ta.
45 Dan zirtirtu pakhat chun, “Zirtirtu, hieng thu i hril hin keini khom i mi khak sa ve a nih” tiin a suosal a. 46 Isun a don a, “Dan zirtirtuhai, nangni khom in chung a pik ie! Phurrik tak tak mi liengkoah in innghat a, nangni hlak chun phur chu in kut hmawr khomin in tawk nuom si nawh. 47 In chung a pik ie! Inthlatuhai that zawlneihai thlăn in dam in bawl a; 48 inthlatuhai thilthaw chu in hrietpui a, in remtipui tǐna a nih; annin a that an tum a, nangnin an thlăn in bawl in bitum thung a. 49 Chu lei chu annawm Pathien varnain, “An kuomah zawlnei le tirkohai tir ka ta, a thren that an ta, a thren sukbohmang an tih” tia a lo hril rĕng kha. 50 Chuongchun, leilung insieng tira inthoka zawlnei that ta po po hai thisen maw chu tu lai ruoltharhai hin phur an tih; 51 a nih, ka hril chêu hi, Abel an thata inthoka maicham le Hmun Thienghlim inkara Zakari an that chena thisen phuba chu tu lai ruoltharhai chunga hin lăk ning a tih.
52 “Nangni Dan zirtirtuhai, in chung a pik ie, Varna chabi chu in chawi hmang dai a, nangni lut nuom si loin mi dang lut ding hlak in dang bok si” a ta.