Thilpêk chungchang
6
1 “Felna thil in thawhai chu mi hmu dinga an hmaah thaw lo dingin fimkhur ro. Chuonga in thaw a ni chun in Pa vana mi-a inthokin lawmman hmu naw ti niu.2 “Chuongchun, retheihai kuomah thil i pêkin, lemderhaiin mi inpàk an hlaw theina dinga Sunagog le kotthlêra hai an thaw hlak ang hin mani tawtawrawt inmûtin hril dar naw rawh. Thu dik ka hril chêu hi, an lawmman chu arêngin an hmu dèr tah. 3 Nang ruok chun thil i pêkin, i kut chang tiengin a thaw chu i kut voi tieng inhriettir naw rawh, 4 Chuongchun, i thilpêk chu a rûk a ni theina ding le a rûka i thaw hmutu i Pa chun lawmman a pèk theina ding chein.
Trongtrai thu
5 “In trongtrai khomin lemderhai thaw dan angin thaw ve naw ro; mihaiin an hmu theina dingin sunagoga hai, kotthlêr sîra hai ngir puma trongtrai an ngaina hlak si a. Thu dik ka hril chêu hi, an lawmman an hmu dĕr tah. 6 Nang ruok chu i trongtrai ding pha leh i pindan rilah lut la, kot khâr la, a rûka hmutu che i Pa kuoma chun trongtrai rawh; chuongchun, a rûka i thilthaw hmutu i Pa chun lawmman pêng a ti che. 7 Chun, in trongtraiin Jentelhai angin hril ngai ngot samphuol naw ro, an insam rawn leiin ngaithlâk hlaw an inring hlak si a. 8 Anni angin um ve naw ro, in mamawhai chu in hni hma khomin in Pain a hriet si a. 9 Chuongchun, hieng ang hin trongtrai hlak ro:
Kan Pa, vana mi,
I hming inza um sien la,
10 I ram hung tlung raw se.
I ditzawng vana an thaw angin,
Hnuoiah thaw ve raw hai se.
11 Voisun hin fàk ding bu mi pe la,
12 Kan leibattuhai kan ngaidam angin,
Kan bathai mi ngaidam la.
13 Thlĕmnaah mi thruoi lut naw la,
Mi suol laka chun mi sanhim rawh,a tiin.
14 In chunga bawsetuhai in ngaidam chun in Pa vana mi khomin ngaidam vêng a ti cheu.
15 Nisienlakhom, mihai bawsietna in ngaidam si naw chun, in Pa vana mi khomin in bawsietnahai ngaidam bik naw nih.
Bu nghei chungchang
16 “Bu in nghei pha khom lemderhai angin ngŭi hmêl put ve naw ro; anni chun mi hmua bu ngheia an inlang theina dingin an hmĕl an sukpor hlak. Thu dik ka hril chêu hi, an lawmman chu an hmu zo tah. 17 Nangni ruok chu bu in nghei pha hmai phi fai unla, in lu sahriek nălin khûi nâm ro, 18 chuongchun in Pa, a rûka um hmaa chauh naw chu mi hmuah bu ngheiin inlang naw ti niu a, in Pa, a rûka hmutu chun rul a ti chêu.
Vana ro khawl
19 “Hângthîm le tuiĕkin an fàk siet theina, rûkruhaiin ver popa an inrùk theina hnuoia hin in ta dingin ro inkhâwl naw ro. 20 Hângthîm le tuiĕkin an fàk siet thei nawna, rûkruhaiin ver popa an inruk thei nawna vana chun in ta dingin ro inkhawl lem ro. 21 In ro umna taphotah in lungril khom a um hlak si a.
Taksa khawnvar
22 “Taksa khawnvar chu mit a nih. I mit a thra chun i taksa pumin var suok a tih. 23 I mit a thra naw ruok chun i pumin inthim a tih. I sunga var chu thim a ni chun, chu thim chu a va sà awm de aw!
Pathien le sum
24 Tu khomin hotu pahni rong a bawl kop thei nawh, pakhat theidain pakhat chu a ngaina amanih ni’ng a tih; annawleh pakhat chu inzàin pakhat dang chu a hmusit amanih ni’ng a tih. Pathien rong le sum rong bawl kop thei a ni nawh.
Pathiena innghat
25 Chuleiin ka hril chêu hi, in hringna thilah ieng am fain in dawn ding, in taksa thilah ieng am silin in bil ding ti lungkham naw ro. Fak ding nĕkin hringna, silfen nêkin taksa a poimaw lem an naw maw? 26 Chungleng vatehai hi en ta u, bu an tù naw a, an sìk naw a, bu inah an sĕk lût bok nawh; sienkhom in Pa vana mi chun a chawm tawl si a. Anni nêk daiin in hlu lem naw maw? 27 Nangni lai tu am lungkham leia mani hringna darkar khata sukseib thei?
28 Silfen thuah ieng dinga in lungkham am? Ram lili par inthrang dan hi ngaituo ta u, sin an thaw naw a, pat an kher bok nawh. 29 Nisienlakhom, ka hril cheu hi, Solomon meu khom a ropui thei ang taka a’n thuom khan hieng lili par pakhat tluk khom hin chei a ni nawh. 30 Chuongchun, ram hlohna, voisun chauh hring a, a zinga meia ti hmang nawk el ding hman Pathienin chuong ang lawma a chei si chun, aw nangni ringna tlawmhai, chuonghai nêk chun a’n thuom nasa zuol naw ding cheu am a ni?
31 Chuleiin, ieng am fain dawn ka ta, ieng am silin bil ka ta ti lungkham naw ro. 32 Jentelhai chun chuong chu an hnot tak a nih. In Pa vana mi chun hieng po po hi in mamaw ti a hriet. 33 A ram le a felna zong hmasa lem ro, chuongchun, hieng po po hi a pêk belsa ding cheu a nih. 34 Chuleiin, zînga ding lungkham naw ro, zîng chun ama ding lungkham a tih. Ni khat buoina hi ni khata dingin a huntawk.