Mi sangli hrai
8
1 Chuong lai vêl bok chun mipui tam tak an hung pung khawm nawk a. Fak ding ieng khom an nei naw leiin Isun a zirtirhai chu a ko a, 2 “Mipuihai hi ka lunginsiet a nih; ni thum zet ka kuomah an um tah a, fak ding hlak an nei si nawh; 3 phingtrâma kan trǐntir chun lam lakah trămsawl rawi an tih, a thren lem chu an hungna a hla si a” a ta. 4 A zirtirhai chun, “Tuin am hieng ang ram pilrilah mi hieng zozai hraina khop bei an hmu zo ding?” tiin an don a. 5 Ama chun, “Bei phek ieng zat am in nei a?” a ta. Anni chun, “Phêk sarih” an ta. 6 Mipuihai chu hnuoiah inthrung dingin thu a pêk a. Bei phêk sari chu a lâk a, lawmthu a hril zoin a khoi a, mipui lai sem dingin a zirtirhai chu a pêk a, an sem a. 7 Ngate tlawmte an nei bok a, chuonghai khom chu lawmthu a hril zoin a zirtirhai chu a’n semtir a. 8 Mipui chun an fak a, an tlai ta seng a. An fak băng zirtirhaiin an rŭt khawm chu bawm sari a nih. 9 Anni rawi chu sangli lai an nih. 10 A’n trǐntir zo chun ama khom a zirtirhai leh longin Dalmanuthaa bielah an fe tah a.Inchikna an phŭt
11 A kuomah Farisaihai an hung a, an hung insĕlpui a. Ama fiena dingin vana inthoka inchikna thilmak inentir an phŭt a. 12 Lung intar taka inrûm suokin, “Ieng dinga tu lai ruoltharhai hin inchikna an zong am a na? Thu dik ka hril cheu hi, inchikna thilmak hrim hrim pek ni naw ni hai” a ta. 13 Chuongchun, anni chu a măksan a, longah a chuong a, răl khing tieng panin a fe tah a.
Farisaihai le Heroda chol
14 Zirtirhai chun bei an lo chawi theinghil a, longa chun bei phek pakhat chauh naw chu a dang hrim an nei nawh. 15 Isu chun, “Farisaihai chol le Heroda chol laka chun invêng unla, fimkhur hlè ro” tiin anni chu a’n fŭi a. 16 Anni rawi chun, “Bei ei nei dĕr naw leia a hril a nih” tiin an inhril tuo a. 17 Isun chu chu a lo hriet a, “Bei in nei naw thu ieng dinga in buoipui am a na? Tu chen khom hin hmu thei loin, in la man fûk thei naw zing a ni maw? Chuong lawm chun in lungril a lo chawlol a ni maw? 18 Mit nei siin in hmu thei naw a ni? Nâ nei siin in hriet thei naw rop maw? An leh, in theinghil hman el am an ta? 19 Bei phĕk pangaa mi sangnga ka hrai trum khan făk mahla bawm ieng zat am in rŭt sip a?” a ta. 20 Anni chun, “Bawm sawmpahnih” an ta. “An leh, bei phêk pasaria mi sangli ka hrai khan ieng zat am in rŭt a?” a ta. “Bawm sari” an ta. 21 Chuongchun, an kuomah, \wj “Chuong sa khom chun a ngaina in la hriet naw rop maw?” a ta.
Bethsaidaah mitdel a sukdam
22 Bethsaida an hung tlung a, mi threnkhatin mitdel pakhat an hung thruoi a, ama chu them dingin Isu an ngên a. 23 Isun mitdel chu a bânah a kei a, khaw puo tieng a thruoi suok a. A mitah chil a sâk a, a them zoin Isun, “Khuo i hmu thei am?” a ta. 24 Ama chu a hung dăk suok a, “Mi ka hmuh, thing lawn angin ka hmu tawl” a ta. 25 Isun a mit chu a hang thempek nawk a. Chuongchun a mit a hung meng a, a hung dam fel a, iengkim chieng takin a hmu thei tah a. 26 Isun a kuomah \wj “Khuoah lût ta loin in tieng fe nghâl rawh”b a ta.
Peterin Isu nina a puong
27 Isu le a zirtirhai chun Filip Kaisari sè vêla khuohai chu an fang a. Lampuia chun a zirtirhai kuomah, “Mihaiin tum a nih an mi ti a?” tiin an don a. 28 Anni chun, “Baptistu Johan ti che an um a; Elija ti che an um bok a; a thren ruok chun zawlnei tu amanih an ti che” an ta. 29 Ama chun, “An leh, nangnin tu am nia in mi hriet?” a ta. Peter chun, “Kristac chu i nih” tiin a don a. 30 Isu chun a nina chu tu khom hril lo dingin a ti tlat a.
Isun a thi ding thu a hril lawk
31 Chuongchun, Mihriem Naupan thil tam tak a tuor ngei ding thu dam, upahai, thiempu lalhai le Dan zirtirtuhaiin an hnawl ding thu dam, an sukhlum ding thu le a ni thumnaah a tho nawk ding thu dam chu a zirtirhai a hril tran tah a. 32 Tlang takin chuong thuhai chu a hril tawl leiin Peter chun ama chu a thruoi hrang a, a kâwk a. 33 Isu ruok chun naw tieng nghatsana a zirtir danghai tieng chu enin, “Setan, fe hmang dai rawh; Pathien thil ngaituo loin mihriem thil i ngaituo a ni hi” tiin Peter chu a kâwk lĕt a.
Isu zuitu hmasuon ding
34 Mipuihai chu a zirtirhai le chun a ko khawm a, an kuomah, “Tu khomin a mi zui nuom chun mani insie hmangin, mani kraws putin mi zui raw se. 35 Tu khom mani hringna hum tum chun chân a ta, tu khom keima le Chanchin Thra leia hringna chân chun hum a tih. 36 Min khawvel pumpui hi nei sien, a hringna chân si sien la, a ta dingin iem hlawkna a um a? 37 Miin a thlarau le inthleng dingin iem pêng a ta? 38 Tu lai ruolthar uire hmang le mi suolhai laia kei le ka thu inzăpui taphot chu, Mihriem Naupa hi a vantirko thienghlimhai le a Pa ropuinaa inthuoma a hung phà chun ama chu inzăpui vêng a tih” a ta.