Zirtir sawmsarihai rongbawlna
10
1 Chu zo chun Lalpan mi dang sawmsaria a ruot a, a fèna ding khuo le hmun taphotah hma lo lawk dingin a kop peiin a’n fetir a. 2 An kuomah, “Bu sik ding tam tak a um, sienkhom sinthawtu an tlawm si. Chuleiin, a bu sîktu ding mi tir dingin lo neitu Lalpa hni ro. 3 “Fe suok unla, satene ruol laia beram khal lût ang elin ka tir suok cheu hi. 4 Tangka ip dam, mansa dam, pheikhok dam chawi naw ro, lampuiah tu khom chibai buk bok naw ro. 5 Chun, in lŭtna taphotah a hmasa takin, “Hi ina hin thlamuongna tlung raw se” ti pei ro. 6 Chu ina chun thlamuongna dit mi a lo um chun in thlamuongna thu chu a chungah um sien, a um naw ruok chun in kuomah hung kir nawk a tih. 7 In tlungna ngaiah tlung zing unla, an pêk taphot cheu chu fain dawn ro; sinthawtu chu hlaw hmu tlak a ni si a. In dang dangah tlung lăwr naw ro.8 “Chun, khuo in lutna taphotah an lo lawm cheu chun, an pĕk ang ang cheu chu fa unla, 9 damnaw umhai chu sukdam unla, ‘Pathien ram chu in kuomah a hung tlung tah’ ti pei ro. 10 In lŭtna khuohaiin an lo lawm naw cheu chun an khawlaiah fe unla, 11 “In khaw pilvut kan kea kai khom kan kephaa inthokin nangni chungah kan thin fai hi; Pathien ram in kuomah a hung tlung tah ti ruok chu lo hre ro’ in ti ding a nih. 12 Ka hril chêu hi, Rorêlna Nia chun chu khaw tuor ding nêk chun Sodom khaw tuor chu zie-um lem dai a tih.
Sim nuom lo khuohai
13 “Nang Korazin, i chung a pik. Nang Bethsaida, i chung a pik. Nangni laia ka thilmak thaw kha Tura le Sidona thaw chu ni sien, saiip puon sil a, pilvut lai inbuolin an simzie suklang daih tang an tih. 14 Rorêlnaa chun in tuor ding nekin Tura le Sidon tuor chu zie-um lem dai a tih. 15 Kapernaum, nang khom, van chena chawi sang i ni ding am a nih? Mithi khuo chena nam thlak i ni lem ding a ni si a.
16 “In thu awituhai chun ka thu khom awi an ta, a hnâwltu chun kei khom an mi hnăwl a nih; chun, kei mi hnawltu chun a mi tirtu khom a hnawl a nih” a ta.
Sawmsarihai hung kir
17 Sawmsarihai chu hlim takin an hung kîr a, “Lalpa, ramhuoihai khom i hming leiin kan thû thŭin an um” an ta. 18 Ama chun, “Vana inthoka trêk anga Setan hung tla kha ka hmu rĕng a nih. 19 Ngai ta u, rûl hai, ainuvêt hai, hmêlmapa hrâtna po po hai sir dè theina thu ka pek cheu hi, ieng khomin sukna naw top a ti cheu. 20 Nisienlakhom, ramhuoihai in thû thŭa an um leiin lawm naw ro, vana in hming ziek a ni leiin lawm lem ro” a ta.
Isu lawmna
21 Chuong lai tak chun Isu chu Thlarau Thienghlimah a lawm ta êm êm a, “Aw Pa, hnuoi le van Lalpa, nangin mi varhai le mi thiemhai lakah hieng thu hi i thup tlat a, mi mawlhai kuomah i puong leiin ka’n pâk che; a nih, Pa, chuong ang chu thra i ti zawng tak a nih. 22 Ka Pain iengkim a mi’n koltir tah; Pa chau naw chun tu khomin Naupa hi tu am a nih ti an hriet nawh; Pa khom chu tu am a nih ti Naupa le a kuoma Naupain a puong nuomnahai chauh naw chun tu khomin an hriet bok nawh” a ta. 23 Chun, a fâla an um laiin a zirtirhai kuomah, “In thil hmu ang hmu ve chu a hamthra. 24 Ka hril chêu hi, zawlnei le lal tam tak khomin in thil hmuhai hi hmu ve an lo nuom hlak a, an hmu si nawh; in ngaithlakhai hi ngaithlâk ve an nuom a, sienkhom an ngaithlâk si nawh” a ta.
Chatuon hringna nei dan
25 Chun, trum khat chu Dan zirtirtuhai laia pakhat a ngîr a, Isu fiena dingin “Zirtirtu, chatuon hringna nei dingin iem thawng ka ta?” tiin a’n don a. 26 Ama chun, “Dan buah iem a’n ziek a? Iem in inkawktir hlak a?” a ta. 27 Ama chun, “Lalpa i Pathien chu i lungril po poin, i thlarau po poin, i hrătna po poin, i ngaituona po poin i hmangai ding a nih; nangma i’n hmangai angin i venghai khom i hmangai ding a nih” a ta. 28 Isu chun, “I don indik, chuong ang chun thaw la, hring i tih” a ta.
29 Ama chun ama le ama thiem inchangtir nuomin Isu kuomah, “An leh ka venghai chu tuhai am an na?” a ta.
Samari mi thra tekhin thu
30 Isun a don a, “Mi pakhat, Jerusalema inthoka Jeriko pana fe thla chu lampuiah suomhmang ruolin an lo suom a, a silfĕnhai an hlippĕk a, an vuok hrep a, thidangin an fesan a. 31 Chu lampui chu thiempu pakhat hin a hraw hlau a, ama a hang hmu chun a hêl el tah a. 32 Chuong ang bokin Levi chia mi pakhat khomin chu hmun chu a hraw a, ama a hmu chun a hêl ve el tah a. 33 Samari mi pakhat inzinin a umna chu a hung tlung a, a hang hmu chun a lunginsiet ta ĕm êm a, 34 a va pan a, a hliemnahai chu hriek le uoiin nălin a tuompĕk a; ama sabengtunga chun an chuongtir a, khuolbûkah a fepui a, a enkol tah a. 35 A zingah a maksan tawm chun duli pahni a phor a, khuolbûk enkoltu chu a pêk a, “Lo enkol la, hi bak i sêng po po chu ka hung kir nawk pha rul ka ti che” a ta.
36 “Aw leh, chuong mi pathumhai lai chun a tu tak am suomhmang tuoktu venghai ni dingin i ring a?” a ta. 37 Ama chun, “A lunginsiettu chu” a ta. Isun, “Nang khom chuong ang tak chun va thaw ve rawh” a ta.
Martha le Mari
38 Isu le a zirtirhai chu lampuia khaw pakhatah an lŭt a, nuhmei pakhat Martha an ti chun a lo intlungtir a. 39 Ama chun zuorpui pakhat a hming Mari a nei a, ama chu Lalpa ke bulah thrungin a thu a ngaithlak a. 40 Martha ruok chu fak rong bawlin a buoi hle el a. Isu kuomah a hung a, “Lalpa, ka zuorpuinuin kei chauh rong bawl dinga a mi dande el hi thra i ti bik am a nih? Mi hung thrangpui dingin hril ta la” a ta. 41 Lalpa chun a don a, “Martha, Martha, ngaituo i hau a, i buoi hle rèng a nih; sienkhom thil trûl pakhat chauh a um. 42 Mari chun chan thra a thlang a, chu chu lakpek ding a ni nawh” a ta.