Grep huon tekhinthu
12
1 Tekhinthuin an kuomah thu a hril tran a: “Mi tuin amanih grep huon a siem a, palin a’n huon a, uoiin sawrna khur a cho a, vèngbûk insang tak a bawl a, chu zoah a grep huon chu loneituhai a’n săntir a, a’n zinsan ta dai a. 2 A lo huna chun a chan-ai la dingin huon enkotuhai kuoma chun a siehlaw pakhat a tir a. 3 Anni chun an lo man a, an vuok a, kut ruokin an infetir a. 4 Siehlaw dang a tir nawk a, chu khom chu a lu-ah an lo vuok a, inzakum takin an lo soisak a. 5 Siehlaw dang a tir nawk a, chu pa lem chu an lo that a. Siehlaw dang tam tak a tirhai chu a thren an lo vuok naw leh an lo that pei a.6 “A naupa dittak chauh naw chu mi dang hang tir ding a nei ta naw a. ‘Ka naupa hi chu lo inzâ ĕm âwm tak’ tiin a nuhnung takah a tir a. 7 Nisienlakhom, huon enkoltuhai chun, ‘Hi pa hi ro hluotu ding chu a nih. Thaw ro, that ei tiu, a ro hluo ding chu ei ta a ni el ding a nih’ an ta. 8 Chuongchun, an man a, an that a, grep huona inthokin an pei suok a. 9 Huon neitu chun iengtin am hung thawng a ta? Hung a ta, huon enkoltuhai chu hung that a ta, a huon chu mi dang insăntir a tih. 10 Hi Pathien Lekha thu,
‘In bawltuhai lung hnawl ngei chu,
A bulthrut dotu tak a hung ni ta si.
11 Chu chu LALPA thilthaw a na,
Ei hmuin ropui ei ti hle,
ti hi in tiem ngai naw a ni maw?” a ta.
12 A tekhinthu hril chu anni a demna a nih ti an hriet leiin inmantir dan kong an dap a; amiruokchu mipui an tri si leiin ama chu an maksan a, an fe hmang tah a.
Kaisar kuoma siechawi thu
13 A thu hrila inthoka introng awktir dan a um raw’m tiin a kuomah Farisaihai le Heroda pawla mihai chu an tir a. 14 A kuom an hung tlung chun, “Zirtirtu, mi indik tak i na, tu khom poisak bik i nei naw leiin tu khomin an kei her thei naw che a, Pathien thu indik tak chu i zirtir hlak ti kan hriet. 15 An leh, Kaisar kuoma sie chawi hi an dik am an dik naw? Sie kan pek ding, kan pek naw ding?” an ta. Sienkhom, an vervekzie Isun a hriet a, “Ieng dinga mi khal âwk in tum? Denari tangka kha hung la ro, lo en ka tih” a ta. Anni chun an hung lak a. 16 Ama chun “Hi hi tu lim le tu hming am a na?” a ta. Anni chun, “Kaisar” an ta. 17 Isu chun, “Kaisar thil chu Kaisar pe unla, Pathien thil chu Pathien pe ro” tiin a don a. Ama chu mak an ti hle a.
Thonawkna thu
18 Thonawkna a um nawh ti pawl Sadukaihai khom a kuomah thu indon dingin an hung ve a. 19 “Zirtirtu, Mosien, ‘Tu khom nau nei loin a nuhmei thisan sien, a nuhmei chu a unaupain hluong a ta, a unaupa ta dingin chi thlapêk a tih’ tiin a mi ziekpĕk a. 20 Aw leh, unau sal sari an um a, a upa takin nuhmei a nei a, suonmongin a thi a. 21 A dottu chun a nuhmei chu a hluo a, chi thla loin a thi nawk a; a pathumna khom chuong ang bok chun. 22 Unau pasarihai chun nuhmeiin an nei vong a, sienkhom tu khomin chi thla loin suonmongin an thi vong a. A tawpah nuhmei khom chu a thi a. 23 An pasari chun an inneipui vong si leiin, thonawknaah a tu nuhmei tak am ning a ta?” tiin an indon a.
24 Isun an kuomah, “Pathien Lekha thu le Pathien thilthawtheina in hriet naw leia fe suol in ni hrim an naw maw? 25 Mithihai an tho nawk pha chun nuhmei pasalin innei tuo ta naw ni hai a, vana vantirkohai ang ni ta lem an tih. 26 Mosie lekhabua chîmbuk chok chanchina khan mithihai an tho nawkzie thu a um a, in tiem ngai naw maw? Pathienin Mosie kuomah, ‘Kei hi Abraham Pathien, Isak Pathien, Jakob Pathien chu ka nih’ a ti kha. 27 Ama chu mithi Pathien ni loin, mihring Pathien a ni lem. In hriet suol nasa hle a nih!” a ta.
Thupêk ropui tak
28 Dan zirtirtuhai laia pakhat a hung a, an thil hril chu a lo ngaithlak zing a. Isun a don thra hle ti a hriet chun a kuomah, “Thupêk po po lai a ieng hi’m a poimaw tak a?” tiin an don ve a. 29 Isun, “Aw Israel, ngai ta, Lalpa ei Pathien chau hi Lalpa chu a nih. 30 Lalpa i Pathien chu i lungril po poin, i thlarau po poin, i ngaituona po poin, i hratna po poin i hmangai ding a nih’ ti hi a poimaw tak a. 31 A pahnina chu, ‘Nangma i’n hmangai angin i venghai hmangai rawh’ ti hi. Hienghai nêka thupêk ropui lem a um nawh” a ta.
32 Dan zirtirtu chun, “Zirtirtu, a ni ngei. Lalpa chauh hi Pathien chu a ni a, ama naw chu Pathien dang an um naw a, 33 ama chauh chu lungril po po, hriet thiemna po po le hrâtna po poa hmangai ding a nizie le mani inhmangai anga venghai hmangai hi pumraw thilhlân le hlanbiekna po po nekin a poimaw lem ti i hril hi i hril indik khop el” a ta. 34 Var takin a don ti Isun a hriet chun a kuomah, “Pathien ram chu i hlat naw hi tie” a ta. Chu hnung chun tu khomin ieng khom an indon ngam ta nawh.
Mesia chungchang thu indonna
35 Tempula a zirtir malamin Isun a hril pei a, “Dan zirtirtuhaiin iengti ziea Krista chu Davida naupa nia an hril hlak am a na? 36 Davida ngeiin Thlarau Thienghlim hrilin,
“LALPAN ka Lalpa kuomah,
‘Ka chang tieng hin hung thrung rawh,
I hmêlmahai po po chu
I ke sirsana ka siem Hmâkhat chun’
a lo ti a.
37 David ngeiin ‘Lalpa’ a ti si chun ieng tin am a naupa ni thei a ta?” a ta. A ngaithlatu mipui tlim hmurhai chun an ngainuom hle a.
Dan zirtirtuhai laka fimkhur ding
38 Chuonga a zirtir lai chun Isun, “Dan zirtirtuhai lakah fimkhur ro. Zakaw fuol hâka lêng vêl a, bazar hmuna hai mi chibai an thlăkhla a, 39 sunagogah thrungna langsăr tak le ruoi thrèna hmunah thrungna poimaw tak an ngiet hlak. 40 Hienghai rawi, hmeithaihai insŭng fa tlarantu le a sieli khaw mawia sawt tak tak trongtrai chînghai hin hrem tuor nasa zuol an tih” a ta.
Hmeithai thilpêk
41 Chun, thawlawm bawm zawna chun a thrung a, mihaiin bawma thawlawm an thlak lai chu a thlîr zing a. Mi hausahai chun an thlak treu treu a. 42 Chun, hmeithai pase tak hi a hung ve a, dar tangka pahnia a hung thlăk a, chu chu poisa khat hŭ a nih. 43 Isun a zirtirhai chu a ko a, an kuomah, “Thu dik ka hril chêu hi, bawma thawlawm thlâktu dang po nêkin hi hmeithai rethei hin a thaw rawn lem. 44 Mi danghai chun an nei chuong liem an thlăk a, ama hin chu tlasam hle sien khom a nei po po, a hringna dinga a fak sik chu a thlâk a nih” a ta.