Sabat thu
12
1 Chuong lai chun Sabat niin Isun huit bil a hraw tlang a, a zirtirhai phingtrâmin huit vuihai chu thliekin an fàk a. 2 Chu chu Farisaihaiin an hmuin, “En ta, i zirtirhaiin Sabat niah thaw thieng lo an thaw hi” an ta. 3 Ama ruok chun an kuomah, “A ruolhai leh an trămsawl truma Davida thilthaw kha in tiem naw’m a ni? 4 Pathien inah a lut a, ama le a ruolhai fak thieng lo, thiempuhai chauh fak thieng, hlanbei a fâk thu kha? 5 An leh, Sabat niin tempula thiempuhaiin sabat an sukporche a, sienkhom poi an tawk nawh ti thu khom kha Dan buah in tiem naw maw? 6 Ka hril cheu hi, tempul nêka ropui lem hi taka hin a um. 7 ‘Hlànbiekna nêkin lunginsietna ka thlang lem’ ti thu umzie hi hrie ni unla chu, mi poi hril lohai hi thiem naw in inchangtir naw ding bah. 8 Mihriem Naupa hi Sabat Lalpa a ni si a” a ta.Kut zeng sukdam
9 Chu taka inthok chun a suok a, Sunagog-ah a lut a. 10 Chu hmuna chun mi pakhat kut zeng hi a lo um a. Isu an hêk theina remchang zongin, “Sabat nia sukdam a thieng am?” tiin an lo indon a. 11 Isu chun an kuomah, “Nangni lai tu khomin beram pakhat nei unla, Sabat niin khurah tla ta sien, tuin am la suok nawng in ta? 12 Beram nêk chun mihriem chu a va hlu lem de! Chuleiin, Sabat niin thil thra thaw a thieng” a ta. 13 Chuongchun, zeng kuoma chun, “I kut phar rawh” a ta, a hang phar a, a kut khing tieng angin a dam ta var a.
14 Chuongchun, Farisaihai chu an suok a, Isu sukhlum thei dan ding phierin an inrawn khawm a.
Pathien siehlaw thlang
15 Chuong thu chu a hrietin chu hmun chu Isun a suoksan a. Mi tam takin ama chu an zui a, an natnahai a lo sukdam a. 16 Anni chu a chanchin hril lo dingin a ti tlat a, 17 zawlnei Isai hmanga a chanchin hrila um chu a hung tlung kim theina dingin:
18 “A hi a nih ka siehlaw thlang,
Ka hmangai le ka lawm êm êm chu;
A chungah ka Thlarau sieng ka ta,
Jentelhai chungah rorêlna puong a ta,
19 Kalin râu khêk tawl naw ni a,
Kotthlêrah tu khomin a rawl hre nawng an tih;
20 Hnèna changa ro a rĕl hmâ khat chun,
Luong por chu kei tan nawng a ta,
Mise ûta khom sukmit naw nih;
21 A hming chu Jentelhai beisei
Innghatna tak ning a tih” ti hi.
Isu le Belzebub
22 Chuong lai chun ramhuoi man pasal pakhat, mit indel le trong thei bok lo chu Isu kuomah an hung thruoi a, a lo sukdam a, a hung trong suok a, a hmu thei ta nghal bok a. 23 Mipui chun mak an ti hle a, “Hi pa hi Davida Naupa a ni thei el naw maw?” an ti tawl a. 24 Farisaihaiin chu chu an hrietin, “Hi pa hin ramhuoihai lal Belzebub leiin ramhuoihai a hnot suok a nih” an ta.
25 Isun an ngaituona a lo hriet a, an kuomah, “Khaw lai ram khom mani le mani indo chu an ram hlak; khaw lai khuo le insung khom mani le mani indo taphot chu an ngir suok ngai nawh. 26 Setanin Setan bok a hnot suok chun anni le anni an indo ning a ta, a ram chu ieng tin am ngir suok a ta? 27 Belzebub leia ramhuoi ka hnot suok a ni chun, in mihaib khan tu leiin am ramhuoi an hnot suok hlak a? Anni kha a’n sonnaw thiem naw inchangtirtu ding cheu chu. 28 Nisienlakhom, Pathien Thlarau leia ramhuoihai hnot suok ka ni si chun in kuomah Pathien ram chu a hung tlung tah tina a nih. 29 An naw leh, miin mi hrât chu a khuop hmasa zet naw chun, ieng tin am a inah hlù khumin a sumhai lapêk thei a ta? A khuop hnung ruok chun a in chu rok thei tang a tih. 30 Keima tienga thrang naw taphot chun a mi do a na, a mi lakkhawmpuitu naw taphot chun a sukdar a nih.
31 “Chuleiin, ka hril chêu hi, mihai suolna po po le Pathien an hrilsietna po po chu ngaidam ni’ng an ta, Thlarau Thienghlim hrilsetu ruok chu ngaidam ni naw nih. 32 Tu khom Mihriem Naupa soiseltu chu ngaidam ning a ta, Thlarau Thienghlim soiseltu ruok chu tuta dam sunga khom, hun la hung tlung dinga khom, ngaidam ni naw nih.
Thing le a ra
33 “‘Thing thra i phun chun a ra thrang a ta, thing sie i phun chun a ra sie’ng a tih; thing chu a raah a’n hriet’ in ti hlak si a. 34 Rûl thlahai, nangnin suol nei zingin iengtin am thil thra in hril thei ding? Lungrila sip liem hi a nih bauin a sâk suok hlak. 35 Mi thra chun a lungril robawm thraa inthokin thil thra a phor suok hlak a; mi rilo ruok chun rîtlona a khawl khawmhai chu a phor suok hlak. 36 Ka hril chêu hi, thu hmang lo hril taphot chun rorêl niah a maw an la phur ding a nih. 37 I bau suok thuin thiem inchangtir a ti che a, i bau suok thu bokin thiem naw inchangtir a ti che” a ta.
Inchikna thilmak an phŭt
38 Chu zoah Dan zirtirtuhai le Farisaihai laia threnkhat chun a kuomah, “Zirtirtu, nangmaa inthokin inchikna thilmak hmu kan nuom” an ta. 39 Isun a don a, “Tu lai ruolthar, suol tak le uire hmang tak hai hin inchikna thilmak an zong a, nisienlakhom zawlnei Jona inchikna chau naw kha chu inchikna thilmak hrim inentir ni naw ni hai. 40 Ni thum le zan thum ngapui phìng sungah Jona a um ang khan Mihriem Naupa khom hi ni thum le zan thum hnuoi sungah a um bok ding a nih. 41 Ninevi mihai chu rorêl nia chun tu lai ruoltharhai leh hin ngîr tlâng an ta, thiem naw inchangtir an tih; Jona thu hril leiin an sim si a. Ngai ta, Jona nêka ropui lem hi taka hin a um. 42 Sim tieng lalnu kha rorêl nia chun tu lai ruoltharhai ruol hin tho ve’ng a ta, thiem naw inchangtir a tih; Solomon varna ngaithla ding hmanin kawlkila inthokin a hung si a; ngai ta u, Solomon nĕka ropui lem hi taka hin a um.
Thlarau tirdakum kir nawk
43 “Thlarau tirdakum chu mi sunga inthoka a suokin chawl hadamna ding zongin ram trawla hai a’n vâk a’n vâk a, a hmu zo naw a. 44 Chuongchun, ‘Ka in, ka suoksan ta hnunga khan kir nawk el ka tih’ a ta, a va tlung chun hluo lo, phît fai le hre fel diemin a va hmu a. 45 Chuongchun a fe a, ama nêka suol ngot thlarau dang pasari a hung thruoi a, an lŭt a, chu taka chun umhmun an khuor tah a. Chu pa ngirhmun chu a hma nêkin a hung se ta lem dai a nih. Chuong ang bokin, tu lai ruolthar, mi suol takhai chunga hin la um a tih” a ta.
Isu nu le unauhai
46 Mipuihai kuomah Isun thu a hril lai chun biek tumin a nu le a unauhai chu tuolah an ngir a. 47 Mi pakhatin a kuomah, “I nu le i unauhaiin biek che nuomin tuola son an nghăk che” a ta. 48 Ama ruok chun, “Ka nu chu tu’m a na? Ka unauhai chu tuhai am an na?” a ta. 49 A zirtirhai tieng chu kuta kâwkin, “En ta u, ka nu le ka unauhai hi: 50 tu khom ka Pa vana mi ditzawng thawtu chu ka unau, ka farnu, ka nu an nih” a ta.