6 Pathien mi tir pakhat a um a, a hming chu Johan a nih. 7 Ama chu var thu inhriettir dingin a hung a, ama hmanga mi po poin an ring theina dingin. 8 Ama chu var chu a ni nawh, var thu inhriettir dinga hung a ni lem. 9 Chu var chu var tak tak, mi tin sunvartu dinga khawvela hung a nih.

10 Ama chu khawvela um tah le ama hmanga khawvel siem ni sien khom khawvelin ama chu a hriet si nawh. 11 Ama rama ngei a hung a, a mihaiin an lo lawm si nawh. 12 Nisienlakhom, ama lawmtu le a hming ringtu taphot chu Pathien nau ni theina a pêk. 13 Chuonghai chu chi inthla dan pangngaia pieng ni loin, tisa ditzawng le pasal ditzawnga pieng ni bok loin, Pathiena inthoka pieng suok an ni lem.

14 Thu chu taksain^c a hung inchang a, eini lai a hung chĕng a, a ropuizie khom ei hmuh, lunginsietna le thutaka sip, Pa Naupa nei sun ropuina chu.

15 A chanchin Johanin puong a, “Ka hnunga hung ding, keima nêka ropui lem ka ti kha ama hi a nih, ka um hmaa lo um ta zing a ni si a” tia a khĕkpui kha a nih.

16 A famkimnaa inthoka ei dong seng chu lunginsietna ngot lunginsietna ngot a nih. 17 Dan chu Mosie hmanga pĕk a na, lunginsietna le thutak ruok chu Isu Krista zara hung tlung a nih. 18 Tu khomin Pathien an hmu ngai nawh, Pa ângsunga chêng Pathien Naupa nei sun chun a chanchin an hriettir tah a nih.

19 Johan chu tu am a nih ti indon dingin Jerusalema Judahai chun thiempuhai le Levi chia mihai chu a kuomah an tir a. 20 Johan chun tlang takin, “Krista chu ka ni nawh” tiin a lo inpuong a.

21 “An leh tu am i ni leh ? Elija i ni?” an ta. “Ka ni nawh” tiin a don a. “Zawlnei chu i ni?” an ti nawk a, “Ni lo e” a ta.

22 “Anleh tu am i ni hrim leh? A mi tirtuhai kan don theina dingin mi hril rawh. Tu’m i nih i’n ti rêng rĕng a?” an ta. 23 Johan chun, “Zawlnei Isaiin a hril ang a, ‘Lalpa lampui sukruol ro’ tia thlalĕra khêktu rawl chu ka nih” a ta.

24,25 Mi an hung tir laia Farisai threnkhat chun, “Krista amanih, Elija amanih, Zawlnei amanih i’n ti si naw chun ieng leia i baptis am a na?” an ta.

26 Johan chun, “Keiin tuiin ka baptis a, sienkhom hi taka ngîr lai hin in hriet naw mi pakhat a um. 27 Ama chu ka hnunga hung ni sienkhom a pheikhok hrui sût tlăk khom ka ni nawh” tiin a don a.

28 Hieng thil hi Jordan ral Bethani khuoa Johanin baptisma an changtirna hmuna thil tlung a nih.

29 A zinga chun Johanin ama tieng pana hung Isu chu a hmu a, “En ta u, Pathien Beramte, khawvel suol phur hmangtu ding saw! 30 Ama hi a nih ka hnunga hung ding, ka nêka ropui lem, ka um hmaa um tah’ ka ti khah. 31 Ama chu lo hre naw lang khom, Israelhan ama an hriet theina dinga tuia baptis dinga hung ka nih” a ta.

32 Chu zoah Johanin, “Vàthrû anga vana inthoka Thlarau hung trum chu a chungah a fu zing ka hmu a. 33 Tuia baptis dinga mi tirtu khan, ‘A chunga Thlarau trum le fu zing i hmû ngei chu Thlarau Thienghlima baptistu ding chu ning a tih’ ti mi lo hril naw sien chu Ama chu hre lo ding ka ni a. 34 Chu thil chu ka hmu tah a, ama hi Pathien Naupa a nih ti ka puong” tiin a’n hriettir a.

35 A zinga chun Johan chu a zirtirhai pahni leh a ngir a. 36 Isun anni a hung fe khêl lai chun, “En ta u, Pathien Beramte saw!” a ta.

37 A zirtir pahnihai chun a thu hril chu an hriet a, Isu an zui tah a. 38 Isu chu a ngha vêl a, an hung zui a hmu chun, “Iem in zong a?” a ta. Anni chun, “Rabi (chu chu Zirtirtu tina a nih), khawlam i tlung a?” an ta.

39 “Hung unla, hmung in tih” a ta. Chuongchun an zui a, a tlungna chu an hmu a, chu ni chun a kuomah an um a, zantieng dar 4 vel a ni tâk leiin.

40 Johan thu hril hrea Isu zuitu pahnihai laia pakhat chu Simon Peter unaupa Andri a nih. 41 Ama chun ahmasatakin a unaupa Simon a zong suok a, “Mesia (chu chu Krista tina a nih) kan hmu tah” tiin a hril a.

42 Simon chu Isu kuomah a hung thruoi a, Isun ama chu a en a, “Nang hi Johan naupa Simon i nih. Kifa ti tâng an ti che” a ta (Kifa chu Peter tina a nih).

43 A zinga chun Isu chu Galili ram tieng fe a tum a. Filip a hmu a, “Mi zui rawh” a ta.

44 Andri le Peter ang bokin Filip chu Bethesaida khaw mi a nih. 45 Filip chun Nathanael a hmu a, “Mosien Dan lekhabua a chanchin a lo ziek le zawlneihaiin a chanchin an lo ziek, Nazaret Isu, Josefa naupa ngei chu kan hmu tah” tiin a hril a.

46 Nathanael chun, “Nazaret khuoah thil thra a suok thei am a ni?” a ta. Filip chun, “Hung la, hung hmu ve rawh” a ta.

47 Isun a kuom tienga hung Nathanael a hmu chun, “En ta u, Israel mi indik tak, hlĕmna dawha hrim hrim pai lo saw” tiin a chanchin a lo hril a.

48 Nathanael chun, “Nangin ieng tin am i mi hriet a?” a ta. Isu chun, “Filipin a ko hma chea theichang kŭng bula i um lai khan ka hmu che annawm” a ta.

49 Nathanael chun, “Zirtirtu, Pathien Naupa chu i nih; Israel Laltak chu i nih” tiin a puong a.

50 Isun, “Theichang bula i um lai ka hmu che ti ka hril lei elin i ring a ni maw? Hieng nĕka thil ropui lem hi la hmung i tih” a ta. 51 A hril zom pei a, “Thutak tak ka hril chêu hi. Van inhongah a suk a tunga Pathien vantirkohai Mihriem Naupa chunga inlon la hmung in tih” tiin.