4 Johan chun sanghawngsei hmula siem zakuo a hâk a, savun kawngchŭn a chûn a, a bu chu khauthrikthri le khuoizu a nih. 5 Chuong lai chun Jerusalem le Judai ram hmun tina umhai le Jordan vadung kam vela umhai chun ama chu an hung pan a, 6 an suolhai an inpuong a, Jordan vadungah a lo baptis tawl a.

7 Baptisma chang dinga hung tam tak lai chun Farisaihai le Sadukaihai khom a hmu ve a, an kuomah, “Rûl thlahai, lungsenna hung tlung ding chu tlansan dingin tuin am a’n fui chêu a? 8 In simzie ang peiin thilthawin ra insuo lem ro. 9 ‘Kan pa chu Abraham annawm’ tiin ngai sukthra el naw ro; ka hril chêu hi, Pathien chun hieng lunghai hi Abraham thlaah a’n din thei a nih. 10 Tuta inthok el khom hin thing bul tinah hreipui sie a ni tah, ra thraa ra naw thing taphot chu phûra meia ti el ding a nih. 11 Kei chun sim inentirna dingin tuiin ka baptis hlak chêu a; ka hnunga hung ding ruok chu keia nekin a ropui lem a, a pheikhok khaitua thrang tlâk khom ka ni nawh. Ama chun Thlarau Thienghlim le meiin a baptis ding cheu a nih. 12 Hrizawla buhai chu thlei faia bu ina hlu lut dingin a kutin sisêp a chawi a, a sihai po chu mei rêm thei loah raw hmang a tih” a ta.

13 Chuong lai chun Johan kuta baptisma chang dingin Galili rama inthokin Jordan vadungah Isu a hung a. 14 Johan ruok chun, “Kei hi i baptis ngai lem ka ni vei leh, ka kuomah i hung lem tlat a ni maw?” tiin a sêl a. 15 Nisienlakhom Isun, “Tu hin remti hrăm rawh, hieng ang felna thil po po hraw kim hi ei ta dingin thil mawihnâi a nih” a ta, Johan chun a remti ta a. 16 Isun baptisma a chang zo chun tuia inthokin a hung suok nghal a. Chuong lai tak chun vàn a hung inhong a, vàthru anga Pathien Thlarau hung trum le a chunga hung fu chu a hmu a. 17 Ngai ta, vana inthoka rawl chun, “Hi hi ka Naupa, ka Dittak chu a nih, a chungah ka lawm êm êm a nih” a ta.