Zeng sukdam
2
1 Ni iemani zat hnunga Kapernaum a hung lut nawk chun mihaiin inah a um ti an hung hriet tah a. 2 Chuongchun, in keng lo khopa tam an hung pung khawm a, kotkhar bul chen khom an inhnaw sip vong a, an kuomah thu a hril a. 3 Mi paliin zeng an hung zawn a, a kuom tieng an hung panpui a. 4 Mipui an tam leiin Isu kuom an hung paw thei naw a, Isu umna zawn lai inchung chu an thriek a, zeng chu a khum pumin an zuk thlăk thla a. 5 An ringzie Isun a lo hmu chun zeng kuomah, “Ka naupa, i suolhai ngaidam a ni tah” a ta.6 Chu taka inthrung vehai lai chun Dan zirtirtu threnkhat an um a. 7 An lungrilin, “Hi pa hin ieng leia hieng thu hi a hril am a na? Pathien a hrilsiet a nih. Pathien chau naw chun tuin am suol a ngaidam thei a?” an ti a. 8 Chuong thil chu lungrilin an ngaituo ti Isun a hriet nghal a, an kuomah, “Ieng dinga lungrilin chuong thil chu in ngaituo am a na? 9 Zeng kuomah, ‘I suol ngaidam a ni tah’ ti le ‘Tho la, i puonpha chawi la, lawn ta rawh’ ti hi a ieng am a olsam lem a? 10 Amiruokchu, hi khawvela hin Mihriem Naupain suol ngaidam theina a nei ti in hrietna dingin” a ta, 11 Zeng kuoma chun, “Tho la, i puonpha la la, i inah fe rawh ka ti che” a ta. 12 Chuongchun, ama chu a tho a, a puonpha a lâk a, an mit hmua ngei chun a suok ta nghal a. An rêng chun makti êm ĕmin, “Hieng ang hrim hrim hi ei la hmu ngai nawh” an ta, Pathien an inpăk a.
Mathai a ko
13 Chun, Isu chu Galili dil kamah a lêng nawk a, mipui tam tak a kuomah an hung a, anni chu a lo inchuktir a. 14 A fe malamin Alfai naupa Levia chu siechawina hmuna inthrung a hmu a, a kuomah, “Mi zui rawh” a ta, ama chu a tho a, a zui ta nghal a. 15 Levi ina zanbu a fak laiin siekhontu le mi suol tam takin Isu le a zirtirhai chu thlaithleng an otpui a, a zuitu chu an thrahnem hle hrim a. 16 Siekhontu le mi suolhai lai bu a fak lai Farisaihai laia Dan zirtirtuhaiin an hmu chun a zirtirhai kuomah, “Ieng dinga siekhontu le mi suolhai lai bu a fâk am a na?” an ta. 17 Isun chu chu a hrietin an kuomah, “Mi hriselin daktor an mamaw naw a, mi borsawmhaiin a nih an mamaw lem. Mi felhai lam dinga hung ka ni naw a, mi suolhai lam dinga hung ka ni lem” a ta.
Bu nghei chungchang
18 Farisaihai le Johan zirtirhaiin bu an nghei ni chun mi tuhai amanih an hung a, Isu kuomah, “Johan zirtirhai le Farisai zuitu pawlin bu an nghei hlak a, ieng dinga i zirtirhaiin an nghei ve ngai naw?” tiin an hung indon a. 19 Isun an kuomah, “Anni lai moneitu a um sungin mo thruoituhaiin bu an nghei hlak am a ni? Moneitu an umpui sung chun bu an nghei ngai nawh. 20 Moneitu chu an kuoma inthoka thruoi hmang a ni hun la hung tlung a ta, chu pha ruok chun la nghei veng an tih.
21 “Tu khomin puon thar la rin loin puon hlui an phăwk ngai nawh, phâwk tah ang sien, puon thar chun puon hlui chu kei trâwm a ta, inek nasa zuol a tih. 22 Chun, tu khomin savun peng hluiah uoiin thar an thun ngai nawh, thun ta ang sien, uoiin thar chun savun peng hlui chu mor koi a ta, uoiin le a peng chu se vé vèng a tih; uoiin thar chu savun peng tharah an thun lem hlak” a ta.
Sabat inser thu
23 Sabat trum khat chu Isu le a zirtirhaiin huit bu bil an hraw laiin a zirtirhaiin bu vui an thliek a. 24 Farisaihai chun Isu kuomah, “En rawh, ieng leia Sabat nia thaw thieng lo an thaw am a na?” an ta. 25 Ama chun, “Phingtrâma Davida le a ruolhai an um laia an thil thaw kha in tiem ngai naw maw? 26 Thiempu laltaka Abiathar a thrang lai a na, Davida chu Pathien inah a lut a, thiempuhai chau fak thieng hlànbeib chu a fâk a, a ruolhai khom a pêk ve a ni kha” a ta. 27 Ama bok chun an kuomah, “Sabat hi mihriem ta dinga siem a na, mihriem hi Sabat ta dinga siem a ni nawh. 28 Chuleiin, Mihriem Naupa hi Sabat chunga chen khom Lalpa a nih” a ta.