Isu’n thlĕmna a tuok
4
1 Chu zoa chun Isu chu Diebol thlĕm dingin Thlarauin thlalĕrah a thruoi a. 2 Ni sawmli le zan sawmli bu a nghei hnung chun a phing a hung trăm ta a. 3 Thlĕmtu chu a kuomah a hung a, “Pathien Naupa i ni takzet chun hieng lunghai hi beia inchang dingin thu pe rawh” a ta 4 Isu ruok chun, “‘Mihriem hi bei chauh ringin a hring naw a, Pathien baua inthoka suok thu tinrêng ringin a hring ding a nih’ ti ziek a nih” tiin a don a.5 Diebol chun ama chu khaw thienghlimah a thruoi a, tempul sìp zumah a’n ngirtir a. 6 “Pathien Naupa i ni takzet chun inchawm thla rawh. I chungthua ziek a ni angin,
‘A vantirkohai chu thu pêng a ta,
An kutin dom an ti che a,
Lungah i ke sui naw ti nih’
ti a ni khah” a ta.
7 Isu chun a kuomah, “‘Lalpa i Pathien fie naw rawh’ ti khom ziek a nih” a ta.
8 Diebol chun tlang insâng takah a thruoi nawk a, khawvel lalram po po le an ropuina a’n entir a, 9 “Bokkhupin mi chawibiek la, hieng po po hi pe vong ka ti che” a ta. 10 Isu chun a kuomah, “Setan, fe hmang dai rawh! ‘Lalpa i Pathien chawibiek la, ama rong chauh bawl rawh’ ti ziek a nih” a ta. 11 Chuongchun, Diebol chun a maksan a, vantirkohai an hung a, a rong an bawlpek a.
Isun rong a bawl tran
12 Lung inah Johan an khum tah ti Isun a hriet chun Galili ram tieng a kîr nawk a. 13 Nazaret suoksanin Kapernaum-ah a um ta zing a, chu khuo chu Jebulun le Naftali biel, Galili dil kama um a nih. 14 Zawlnei Isai baua,
15 “Zebulun ram le Naftali ram,
Jordan ruoma tuipui panna lam,
Jentelhai chêngna Galili rama
16 Thim hnuoia thrunghai chun,
Var ropui tak an hmu a;
Thina hlim rama chênghai chunga chun,
Var a hung êng suok tah’
tia a lo hril kha a hung tlung kim theina ding a nih.
17 Chu taka inthok chun Isun, “Sim ro, van ram chu a hnâi tah” tiin a hril tran ta a.
Zirtir hmasa tak palihai a ko thu
18 Galili dil kama Isu a lêng laiin unau pahnih, Simon, Peter an ti bok le Andri hai lèn dèng lai chu a hmu a, nga mantu an ni hrim a. 19 An kuomah, “Mi zui ro, mihriem mantuah siem ka ti cheu” a ta, 20 an lĕnhai chu maksanin an zui ta nghal a. 21 Chu taka inthok chun an fe pei a, unau dang pahnih, Zebedai naupa Jakob le a unaupa Johan chu a hmu a, an pa Zebedai rawiin longah an lĕnhai an lo buotsai a. 22 Anni khom chu a ko a, chuongchun, an long le an pa chu maksanin an zui ve ta nghal a.
Isun damnaw a sukdam
23 Isu chun Galili ram pumpui a fang a, sunagoga hai inchuktirin Pathien ram Chanchin Thra a hril a, hri hrang hrang invoihai le natna chi hrang hranga nahai chu a sukdam a. 24 A chanchin chu Suria ram po poah a’n thang a, natna chi tum tuma na, damnaw inrik tak tak hai, ramhuoi zawl hai, hringol invoi hai le zeng hai chu a kuomah an hung thruoi a, a lo sukdam tawl a. 25 Galili rama inthok dam, Dekapolia rama inthok dam, Jerusalema inthok dam, Judai rama inthok dam le Jordan ral khing tienga inthoka hung dam mipui tam takin ama chu an zui a.