MATHAI
Thuhma
Mathai ziek hi Baibul Thuthlung Thara bu hmasa tak, Baibul pumpuia bu 40-na, bung 28 le chang 1071 a sei a nih. A ziektu Mathai, Levi tia hriet bok chu Isu Krista zirtirhai laia pakhat, Isu thi hnunga kum 15 lai Judai rama rong a bawl hnunga Ethiopia rama misawnaria fe niin an hril. Juda mi ringtharhaiin an hriet thiem thei zawng dinga Aramik tronga AD 50 laia a ziek nia hriet a na, tuta a bu an hmang tak Grik tronga ziek hi A.D 70-a Jerusalem siet hnung ela buotsai nia ring a nih.
Thuthlung hlui hun laia inthoka Pathienin a mihai sandamtu ding Mesia pek a tiem chu Isu Kristaah a hung sukpuitling ngei a nih ti chieng taka suklang dingin Isu thlatuhai chanchinah a tran a, a pieng thuin a sunzom a, baptisma a chang hnung le thlemna a tuok thu a hril zo hnungin Galilia a rongbawlnaah a lut a, Jerusalema kraws-a an hemde thu le a thonawknain a suktawp a nih.
Hi lekhabua hin Isu chu zirtirtu ropui tak, Mosie neka ropui lem, Pathien Danhai hrilfie dinga thuneina neitu le Pathien ram thu hung hriltu a ni thu chieng taka a suklang bakah, Isu Krista Pathien Naupa chu Lal a nizie a uor. Isu thu inchuktir hlawm ngaa a ziek khawmhai chu: 1. Tlanga a thuhrila Pathien ram mihai zie, thaw ding, chanvo le an la um pei dan ding a hrilhai (Bung 5-7); 2. Zirtir sawmpahnihai thaw ding (B.10); 3. Van ram umzie tekhinthu lawr khawm (B.13); 4. Zirtir ni umzie (B.18) 5. Hi khawvel la bo ding le khawvel thar la hung um ding thu hrilna (b.24-25).
A sung thu tlangpui:
Isu thlatuhai le a pieng thu (1:1-2:23)
Baptistu Johan rongbawlna (3:1-12)
Isu baptisma chang le thlĕma a um (3:13-4:11)
Galili rama Isu rongbawlna (4:12-18:35)
Galilia inthoka Jerusalem a pan thu (19:1-20:34)
Jerusalema Isu hun hnuhnung (21:1-27:66)
Isu thonawkna le inlar thu (28:1-20)