LUKA
Thuhma
Luka ziek Chanchin Thra hi Baibul bu pumpuia bu 42-na, bung 24 le chang 1,151 a sei a na, A.D 70-75 inkar vela Grik tronga a ziek a nih. A ziektu Luka hi daktor, Suria mi le Antiokei khaw mi, Paula inzinpuihai laia pakhat a na, Baibul bu pumpuia Jentel mi ziektu um sun a ni el bâkah a lekha zieka hin ziektu dangin an ziek ve lo, Jentel mihai inlangna chanchin poimaw tak tak a’n thrangtir a nih.
Chîk taka a sui hnunga a ziek a ni leiin Isu hung pieng ding thu le a pieng laia thil tlunghai, a lampui buotsai dinga hung hmasa Baptistu Johan hmalakna hai a ziek hnungin Isu chu Mihriem naupa a ni ngeizie sukchiengna dingin a trobul Adama inthokin chipchier takin a ziek a. Pathienin Israelhai sandamtu pek a tiem chu Isu ngei a nizie le chu remruotna chun khawvel mi po po a huomzie dam, pasiehai kuoma Chanchin Thra hril dinga Lalpa Thlarau ruot a ni leia pasiehai le thrangpui ngaihai a’n voizie hai chu chieng takin a suklang bok.
Chanchin Thra bu danga thrang ve lo Isu pieng laia vantirkohai hla sak thu dam, berampuhai thu dam, Isu naupang laia tempula a fe thu dam, Samari mi thra thu dam, Naupa tlan hmang tekhinthu dam, Zakaiin Isu a’n tuokpui thu dam le thil dang dang a ziek a. Trongtrai poimaw thu dam, Thlarau Thienghlim thu dam, Isu rongbawlnaa nuhmei an thrang nasat thu dam le suol ngaidamna thu dam a hril uor hle.
A sûng thu tlangpui
Thuhma (1:1-4)
Johan le Isu pieng thu (1:5-2:52)
Baptistu Johan rongbawlna (3:1-20)
Isu baptisma chang thu le thlĕmna a tuok thu (3:21-4:13)
Galili rama Isu rongbawlna (4:14-9:50)
Galilia inthoka Jerusalem a pan thu (9:51-19:27)
Jerusalema Isu hun hnuhnung (19:28-23:16)
A thonawkna, inlărna, van lawnna (24:1-53)