Inneina ruoi tekhinthu
22
1 Isun an kuomah tekhinthu dang a hril nawk a. 2 Van ram chu lal tu amanih, a naupa mo lawmna ding ruoi buotsaitu leh chun tekhin thei a nih. 3 Ruoi kîl dinga a fielhai chu ko khawm dingin a siehlawhai a tir a, sienkhom fielhai chu an hung nuom naw a. 4 Ama chun siehlaw danghai a tir nawk a, ‘Ka fielhai kuoma khan, ruoi chu a’n pei ta a, ka bawngchal le ka ran chawm thauhai ka that a, iengkim inpei a ni tah, ruoi kîl dingin hung ta ro’ tiin hril ro’ a ta. 5 Nisienlakhom, an lo ngaisak naw a, an fesan a, a thren loah an fe a, a thren sumdawngnaah. 6 A danghai chun siehlawhai chu an man a, inzakum takin an soisak a, an lo sukhlum tawl ta a. 7 Lal chu a lungsen a, a sipaihai a tir a, chuong tuolthattuhai chu a sukbohmang a, an khuo khom a rawpek tah a.8 “Chuongchun, a siehlawhai kuomah, ‘Ruoi chu a’n pei ta a, ka fielhai kha chu thrang ve tlak an ni nawh. 9 Chuleiin, kotthlêr kilkhawra hai fe unla, mi in hmu taphot ruoi kîl dingin hung fiel ro’ a ta. 10 Chuongchun, siehlawhai chu an suok a, lampuia mi an hmu taphot, mi suol le mi thrahai khom, an hung thruoi khawm a, molawmna in chu ruoi kiltuhaiin an sip tah a.
11 “Chun, lal chu ruoi kîltuhai en dingin a hung lŭt a, inneina thuom inbel ve lo mi pakhat a hung hmu a; 12 ‘Ruolpa, iengti ziea inneina thuom inbel loa i hung lŭt am?” a ta, ama chu a to zing a. 13 Lal chun rongbawltuhai kuomah, ‘A kut le ke khuop unla, tuol thimah dêng dok ro, chu taka chun trapin ha rawt a tih. 14 Fielhai chu tam tak an na, thlanghai ruok chu tlawmte an nih” a ta.
Kaisar kuoma sie chawi thu
15 Chuong lai chun Farisaihai chu an suok a, Isu chu a tronga inthoka khal awk dan ding thu an phier a. 16 An thruoihruoihai le Heroda pawla mihai chu a kuomah an tir a, anni chun, “Zirtirtu, mi indik tak i na, Pathien thu khom indik takin i’n chuktir hlak a, poisak bik tu khom i nei naw a, tu khom inza bîk i nei bok nawh ti kan hriet 17 Chuleiin, Kaisar kuoma sie chawi hi a’n dik am a’n dik naw ti i ngaidan mi hril rawh” an ta.
18 Isun an thiltum suolzie a hriet a, an kuomah, “Nangni lêmderhai, ieng leia mi’n trong awktir in tum? 19 Sie in chawina tangka chu mi hang inentir ta um” a ta, chuongchun denari khat an hung lâk a. 20 Ama chun an kuomah, “tu lim le tu hming am a chuong a?” tiin a’n don a. 21 Anni chun, “Kaisar” an ta. Chuongchun, Isun an kuomah, “Kaisar thil chu Kaisar pe unla, Pathien thil chu Pathien pe ro” a ta.
22 Chu chu an hrietin mak an ti hle a, ama chu an zamsan a, an fe ta dai a.
Thonawkna thu
23 Chu ní bok chun Sadukaihai, thonawkna a um nawh ti pawl chu thu indon dingin a kuomah an hung a. 24 “Zirtirtu, Mosien, ‘Nau nei loin mi thi sien la, a nuhmei chu a unauin hluong a ta, chi a thlapek ding a nih’ a ta. 25 Keini lai hin unau sal sari an um a, a upa takin nuhmei a nei a, chi thla loin a thi a, a nuhmei chu a sang hluo dingin a maksan a. 26 Chuong ang bok chun a pahnihna khom, a pathumna khom, a pasari chenin an hluo vong a. 27 A tawpah nuhmei khom chu a thi tah a. 28 An leh, thonawknaah unau sal sari laia a tu nuhmei tak am ni tang a ta, an rêngin nuhmeiah an nei vong si a?” tiin an indon a.
29 Isun an kuomah, “Pathien thu le Pathien thilthawtheina in hriet naw leiin in fe suol hlak a nih. 30 Thonawknaa chun nuhmei pasal innei ta naw ni hai a, vana vantirkohai ang an ni ta lem ding a nih. 31 Mithi thonawkna thua ruok chu Pathienin, ‘Kei hi Abraham Pathien, Isak Pathien, Jakob Pathien ka nih’ tia in kuoma a hril kha in tiem ngai naw maw? 32 Ama chu mithi Pathien a ni naw a, mihring Pathien a ni lem” a ta. 33 Mipuiin chu chu an hrietin a thu inchuktir chu mak an ti hle a.
Thupêk ropui tak
34 Sadukaihai a sêl dong dêr ti an hrietin Farisaihai chu an pung khawm a. 35 Anni laia dan hre mi pakhatin Isu fiena dingin, 36 “Zirtirtu, Dana hin ieng thupêk am a ropui tak a?” tiin an don a. 37 Isun, “Lalpa i Pathien chu i lungril po poin, i thlarau po poin, i ngaituona po poin i hmangai ding a nih. 38 Chu chu thupek laia poimaw tak le ropui tak chu a nih. 39 A dota chun, ‘Nangma i’n hmangai angin i venghai hmangai rawh’ ti hi. 40 Hi thupek pahni hin Dan le Zawlneihai thu po po a fùn khawm vong a nih” a ta.
Mesia chungchang indonna
41 Farisaihai an inhawr khawm lai chun Isun, 42 “Krista chu ieng tin am in ngai a? Tu naupa am a na?” tiin a’n don tawl a. Anni chun, “Davida naupa” an ta. 43 Isun an kuomah, “Chuong a ni si chun iengti ziea Davidan,
44 ‘Lalpa chun ka Lalpaa kuomah,
Ka chang tieng inthrung rawh,
I hmêlmahai i kepha hnuoia,
Ka sie hmâ khat chu’
tia thlarau inhriettirnaa ama chu ‘Lalpa’ a ti tlat si am a na?