Ropui takin Isun Jerusalem a lut
11
1 Jerusalem an tlung tawm, Oliv tlanga Bethfage le Bethani an hung tlung ding chun a zirtirhai pahni a tir a. 2 “In hma zawn khuoa son va fe unla, khuo in lût charin tu la chuongna ngai lo sabengtung tuoi inthlung hmung in ta, sût unla, hung kei ro. 3 Tu khomin, ‘Ieng dinga sabengtung tuoi kha in sût am’ an ti chun, ‘Lalpan a mamaw a, hung thak kir nawk vak kan tih’ ti ro” a ta. 4 Chuongchun, an fe a, sabengtung tuoi, kotkhar bienga inthlung, tuol tieng kotthlĕra ngîr chu an va hmu a. 5 An sŭt lai chun chu taka ngirhaiin, ‘Sabengtung tuoi kha ieng dinga in sŭt am a na?” an ta. 6 Anni chun Isu hril ang tak khan an hril a, thruoi an phal tah a. 7 Sabengtung tuoi chu Isu kuomah an hung kei a, a chungah an puonhai an pha a, Isu chu a chuong a. 8 Mi tam takin lampuiah an puonhai an pha a, a threnin rama sawl an thliekhai chu an phâ bok a. 9 A hmaa fehai le a hnung zuituhai chun,“Hosana!
Lalpa hminga hung chu,
A hamthra;
10 Ram hung tlung ding,
Ei Pa Davida ram chu,
A hamthra;
Chunghnung taka khin
Hosana”a
tiin an khĕk a.
11 Isu chu Jerusalemah a lût a, tempulah a fe a. Iengkim a en vel hnung chun, khuo khom an hnu ta leiin, Bethani tieng zirtir sawmpahnihai leh an fe tah a.
Isun theichang kŭng a hal hlum
12 A zingah Bethani an suoksan hnungin a phing a hung trăm tah a. 13 Hla takah theichang, a hna inbuk hlûp el a hmu a, a ra a um takduoiin tiin a va pan a. A tlung chun a hna chau naw chu a hmu naw a, theichang ra hun a ni naw hrim a. 14 Thing kuoma chun Isun, “Tuta inthok chu kumkhuoin i ra tu khomin fa ta naw raw hai se” a ta. A zirtirhai khomin a hril chu an hriet a.
Tempul sukthienghlim
15 Jerusalem an hung tlung chun tempul huongah a lût a, chu taka thil zortuhai le inchawtuhai chu a hnot suok a, tangka thlengtuhai dawkan le parva zortuhai inthrungnahai chu a nam thlŭk a. 16 Tempul inhuonna sung chu tu khomin an thil zorhai chawia an hraw tlang a khap a. 17 Anni rawi chu inchuktirin, “‘Ka in chu hnam tin ta dinga trongtraina in tîng an tih’ ti ziek a ni naw am a ni? Nangni rawi ruok chun suomhmanghai pŭkah in siem ta lem a ni hi” a ta. 18 Thiempu lalhai le Dan zirtirtuhaiin an lo hriet chun ama sukhlum dan ding chu an zong zing a, sienkhom a zirtirna chu mipui po poin an ngaisang leiin ama chu an tri si a. 19 Zan tieng a hung ni chun Isu le a zirtirhai chu khawpuia inthokin an suok a.
Theichang kunga inthoka inchûk ding
20 Zing tieng an fe malamin theichang kung kha a zung chenin a lo thêm tah ti an hmu a. 21 Peter chun a hriet suok a, a kuomah, “Rabi, en ta, trongsie i’n phur theichang kha a lo thêm zo tah” a ta. 22 Isun a don a, “Pathienah ringna innghat ro. 23 Thu dik ka hril chêu hi, tu khomin hi tlâng kuoma hin, ‘Inson la, tuifinrietah indehawn rawh’ ti sien, a hril ang chun hung tlung ngei a tih ti lungrila a ringhla naw chun, a ti ang chun thawpêk ni’ng a tih. 24 Chuleiin ka hril chêu hi, in trongtraiin in thil hni taphot chu hmu taah inngai unla, thawpêk ni’ng in tih. 25 Trongtrai dinga in ngir huna khom tu chunga khom thu poi in nei chun ngaidam hmasa zet ro, vana in Pa khomin in bawsietnahai chu a ngaidam ve theina ding cheuin. 26 In ngaidam naw ruok chun vana in Pa khomin in suolhai ngaidam bǐk naw ni chêu.” a ta.b
Isu thuneina an kal
27 Jerusalem an hung tlung nawk a, tempul a fang vel laiin thiempu lalhai, Dan zirtirtuhai le upahai chu a kuomah an hung a. 28 Ieng thuneinain am hieng thil hi i thaw? Tuin am thu a pêk che a?” tiin an indon a. 29 Isun, “Zawna pakhat hang indon veng ka ti chêu; mi don inla, kei khomin tu thuin am hieng thil hi ka thaw ti hril ka ti cheu. 30 Johan baptisma kha vana mi thu a ni, an naw leh mihriem thu? Chu chu mi don ro leh” a ta. 31 Anni rawi chu an inrawn khawm a, “Vana mi thu ei ti chun ‘Ieng dinga a thu in awi naw?’ a mi ti ding a ni si a; 32 mihriem thu ei ti el dim a nih?” an inti a. Mi po poin Johan chu zawlnei ni ngêiah an pom tlat leiin mipui chu an tri bok si a. 33 Chuongchun, “Kan hriet nawh” tiin Isu chu an don a. Isu khom chun, “Kei khomin tu thuin am hieng thil hi ka thaw ti hril bik naw ning cheu” a ta.