Kana khuoa molawm
2
1 A ni thum ni chun Galili ram Kana khuoah inneina a um a, chu taka chun Isu nu khom a thrang ve a. 2 Isu le a zirtirhai khom molawma chun an fiel a. 3 Uoiin an indai ta naw leiin Isu nu chun a kuomah, “Uoiin an tlasam tah ie” a ta.4 Isu chun, “Nuhmei, chu chu nangma le keima lungkham ding am a ni? Ka hun a la tlung hri nawh” a ta.
5 A nu chun rongbawltuhai kuomah, “A hril taphot ang chun thaw pei ro” a ta.
6 Chu hmuna chun Judahai inthien dan anga insâwpna ding lung tuibĕl paruk, litar 75 le 117 inkar vel keng seng, an intung a. 7 Isu chun, “Tuibĕl po poa khan tui sung sip vong ro” a ta. A rêngin an sung sip hmar a. 8 Chuongchun an kuomah, “Thâl unla, fatu hotu kuomah chawi ro” a ta, a ti ang chun an thaw a. 9 Tui, uoiina inchang chu fatu hotu chun a hang intem a, khaw laia inthoka an hung lâk am ti a hriet naw a, tui thăltuhai ruok chun an hriet a. 10 Moneitu chu a ko a, “Mi tinin an uoiin nei thra an sem hmasa phot a, an dawn rawn deu pha uoiin naran an sem hlak kha a na, nang ruok chun tu chen hin uoiin thra tak i la nei ta rop a!” a ta.
11 Hi inchikna thilmak, Isun a thaw hmasa tak hi Galili ram Kana khuoa a thaw a na, a ropuizie a’n langtir a, a zirtirhai chun ama an ring tah a.
Isun Tempul an thiel fai
12 Chu hnung chun Isu chu a nu, a unauhai le a zirtirhai leh Kapernaum-ah an zu fe a, chu taka chun ni iemani zăt an chăm a.
13 Judahai Fekân Kŭt a hnai chun Jerusalemah Isu a hang fe a. 14 Tempul tuolzawla bawng, beram le parva zortuhai le dawkan kîla inthrung tangka thlengtuhai chu a hmu a. 15 Chuongchun, hruolin vuokna a siem a, beram le ranhai chu tempul huonga inthokin a hawl dok vong a; tangka thlengtuhai tangka thîr chu a thĕ dar a, an dawkanhai a nam thlŭk a. 16 Parva zortuhai kuoma chun, “Hieng thilhai hi la suok ro, ka Pa in hi sumdawngna hmunah siem naw ro” a ta. 17 A zirtirhai chun, “I in ta dinga thrahnem ka ngainan a mi lem zo” ti zieka lo um chu an hriet suok nawk tah a.
18 Chu phing leh Judahai chun, “Hieng thil hi thaw dingin thuneina i nei ti inchikna ieng am inentir thei i nei a?” tiin an indon a. 19 Isun, “Hi Tempul hi thriek unla, ni thum sungin indin nawk ka tih” tiin a don a. 20 Judahai chun, “Hi Tempul bawlna hin kum sawmli paruk zet a lâk a, nangin ni thum sungin i bawl ding maw?” an ta. 21 Aman tempul a hril chu a taksa a ni lem dai si a. 22 Thinaa inthoka a tho nawk hnung khan a zirtirhaiin a thu hril chu an hriet suok vong vong a, Pathien lekha thu le Isu thu hril chu an ring tah a.