Isu pieng thu
2
1 Chuong lai chun Kaisar Awgasta chun Roman lalram po poah intiempui nei dingin thu a pêk a. 2 Hi hi Suria ram lârsâpa Kuirini a thrang sunga intiempui hmasa tak a nih. 3 Chuongchun, mi tin chu mani trobul khuo sengah hming ziek lut dingin an fe a.4 Josefa khom Davida sungkuo le thlaa mi a ni leiin, Galili ram Nazaret khuoa inthokin Judai rama Davida khuo Bethlehemah a hang fe a. 5 A nuhmei huol Mari, naupai inhlà tak thruoia intiempuia an hming ziek lut dinga fe an nih. 6 Chu taka an um lai chun an nau nei a hung hun ta a, nau lutǐrah naupa an nei a. 7 Puonin an tuom a, khuolbûkah an inleng ve naw leiin ranthlĕngah an inzăltir a.
Berampuhai le vantirkohai
8 Chu lai ram khaw dâia chun berămpuhai an um a, zanah an beramhai vèngin an riek chil a. 9 Chun, Lalpa vantirko an kuomah a hung inlang a, Lalpa ropuinain an vêl a hung sunvar phŭt a, an tri ta ĕm êm a. 10 Vantirko chun, “Tri naw unla, ngai ro, mi tin ta ding chanchin thra lawmum bĕk bêk ka hung intlun chêu a nih. 11 Voisun hin in ta dingin Davida khuoah Sandamtu a pieng tah, Lal Krista chu. 12 Hi hi in ta dinga inchikna ni’ng a tih: naute, puona tuom, ranthlĕnga zâl hmung in tih” a ta. 13 Thawklekhatah vantirko bula chun van mipui tam tak an hung um ta hùk a, Pathien an inpàk a:
14 “Chunghnungtaka Pathien ropui raw se,
A ditsakna changtu hnuoia mihriemhaia kuomah,
Inremna thu inlêng raw se”
tiin.
15 Vantirkohaiin van tieng an fesan phingleh berampuhai chun, “Thaw ro, Bethlehemah feng ei ta, Lalpan thu a mi hril hung tlung chu va en ei tiu” an ta. 16 Chuongchun, inhmaw takin an fe a, Mari le Josefa le ranthlĕnga naute zâl chu an va hmu a. 17 An va hmu chun an kuoma vantirkoin naute chanchin a’n hriettir kha an hril a. 18 A hre taphotin berampuhai thu hril chu mak an ti hle a. 19 Mari chun chuong thu chu a lungrilah a khâwl khawm a, a ngaituo neu neu a. 20 Vantirko hril ang ngeia iengkim an hriet le hmu lei chun berampuhai chu Pathien chawimawi le inpâk pei pumin an kir nawk tah a.
Tempulah naute Isu an thruoi
21 A ni riet ni, a ser tan ni chun sŭla a’n sieng hmá daia vantirkoin a hming ding a lo hril tah angin a hmingah ISU an sak a.
22 Mosie Dan anga an inthien ni a hung tlung chun naute chu Lalpa kuoma inhlàn dingin Mari le Josefa chun Jerusalemah an thruoi a. 23 Lalpa Dan thuah “Nau lutîr pasal taphot chu Lalpa chanvo ding a nih” ti a ni si a. 24 Chun, Lalpa Dan angin, vàthrû pahni amanih parva tuoi pahni amanih hlanbiekna dingin an inhlàn ding a nih.
25 Jerusalema chun mi pakhat a hming Simeon a um a, ama chu mi fel le sakhaw mi tak a nih. Israel thlamuongtu ding chu a thlir zing a; a chungah Thlarau Thienghlim a um a. 26 Lalpa Kristab chu a hmu hmâ khat thi lo dingin Thlarau Thienghlimin a lo inhriettir ta hrim a. 27 Thlarau thruoiin Tempula chun a fe a, naute Isu chu a nu le pain Danin a phŭt ang thawpĕk dinga an hung thruoi lut lai chun 28 Simeon chun a lo pom a, Pathien a’n pàk a:
29 “Aw Laltak, tuhin chu i thu ang peiin,
I siehlaw hi thlamuong takin i’n fetir ding an ta hi,
30 I sandamna mi tin hmua i buotsai chu,
31 Ka mit ngeiin a hmu tah:
32 Jentelhai kuoma i var suklangtu ding le
I mi Israelhai ropuina ding chu”
tiin.
33 Naute chungchang a hril chu a nu le pa chun mak an ti hle a. 34 Simeon chun anni chu mal a sawm a, a nu Mari kuoma chun,
“Ngai ta, Israel laia mi tam tak,
Tlûkna ding le tungdingna dingin,
Hi naute hi ruot a nih,
Inchikna an kal hut hut ding chu.
35 Kawlhnâma sun tlang angin,
I lunglai la na’ng a ta,
Mi tam tak ngaituona rŭk,
Phor langin la um a tih”
a ta.
36 Zawlnei nu pakhat Anna, Aser hnama mi Fanuel naunu a um a. Tar tak a ni tah a; a pasal leh kum sarih an um hmunkhat hman a, 37 chu hnung chun kum sawmriet pali a ni chenin a hmeithai tah a nih. Ama chun Tempul maksan loin, bu ngheia trongtraiin sŭn-zăn zomin Pathien a biek hlak a. 38 Chuong lai chun ama chu a hung a, Pathien kuomah lawmthu a hril a, Jerusalemc sansuokna beiseitu taphot kuomah naute chanchin chu a hril a.
Nazaretah an kìr nawk
39 Lalpa Dan ang peia thil an thaw zo hnung chun Galili rama an khuo Nazareta chun an kîr nawk tah a. 40 Naute khom chu inthrang peiin a hung chakvak a, varnain a sip a, Pathien lunginsietna a chungah a um zing a.
Naupang Isu tempulah
41 Kum tinin a nu le pahai chu Fekân Kût hmang dingin Jerusalemah an fe hlak a. 42 Ama chu kum sawm le pahnih a niin dan pangngai anga kût hmang dingin an fepui a. 43 Kût trumtriek chun an kǐr a, naupang Isu ruok chu a nu le pa hriet loin Jerusalemah a la châm a. 44 An ruolhai lai a um an sawn a, ni khat an fe hnunga an laichin le hmêlhriethai lai an hang zong chun an hmu zo ta naw a. 45 Zong peiin Jerusalemah an kîr nawk a.
46 Ni thum ni chun Tempula zirtirtuhai bula lo inthrung chu an hang hmu tah a, an thu hril ngaithlain, thu dam a lo indon a. 47 A thil hrietzie le mi a don thiemzie hmu taphot chun mak an ti hle a. 48 A nu le pahaiin an hmu chun mak an ti ĕm êm a. A nu chun, “Bawi, ieng dinga hienga i mi thaw? I pa leh thlaphâng takin kan zong kan zong che an son naw” a ta. 49 Ama ruok chun, “Ieng dinga in mi zong? Ka Pa ina um ding ka nih ti in hriet naw maw?” a ta. 50 A hril umzie chu an hrietthiem si nawh.