Pathien hnam thlang Israel
9
1 Kristaa chun thudik ka hril a nih; thukhêl ka hril nawzie Thlarau Thienghlim zarin ka sie le thra hrietna khomin a hriet chieng. 2 Ka lungrilah rinumna nasa tak le lungngaina rè thei dĕr lo ka pâi a. 3 Ka unauhai, taksa thila ka chipuihai ai hin keiin trongsie phurin Krista kuoma inthoka sàt thlâk ni lem lang ka ti hiel hlak. 4 Israel mi an ni si a, nau nina hai, ropuina hai, thuthlung hai, Dan thu hai, rongbawlna sin hai le thutiem hai po po changtu an nih. 5 Thlatuhai chu an puhai an ni a, mihriem tienga sui chun Krista chu an chipui ngei a nih; iengkim chunga um Pathien chu chatuona inpakin um raw se, Amen.Pathien thutiem thlawn lo
6 Pathien thu chu a thlawn elin a’n chang ka tǐna a ni nawh. Israel thlahai po po chu Israel mi an ni vong chuong nawh. 7 Abraham thlahai po po khom a nauhai an ni vong chuong nawh; ‘Isaka hin i thlahai sui an tih’ ti a ni lem. 8 Chu umzie chu, taksa tienga nauhai chu Pathien nauhai an ni vong chuong naw a, thutiem leia Abraham nauhai chu a thla indik taka ngai an ni lem, tǐna a nih. 9 “Tuta hun anga hin hung ka ta, Sari chun naupa nei a tih” tiin a tiem a ni kha. 10 Chu chauh khom chu ni loin, Rebek khomin ei thlatu Isaka inthoka nau inphîr a von lai khan, 11 an pieng thlak hma, sie le thra an la hriet hmain, thilthaw lei ni loa a kotu dit ang lei lemin, pakhat lem chu thlang a nih ti a’n lang. 12 Pathien thu ruot chu namnghetna dingin Rebek kuomah, “A upa lemin a naupang lem rong bawl a tih” a ti a ni kha. 13 “Jakob chu ka hmangai a, Esau chu ka theida” ti ziek a ni bok.
14 Ieng am hril tang ei ta? Pathien chu a thu an lăi nawh ei ti dim a nih? 15 Teu lo e! Ama chun, “Ka lunginsiethai po lunginsiet ka ta, zà ka ngainahai po chungah zà ngai ka tih” tiin Mosie kuomah a hril a nih. 16 Chuleiin, mihriem dit dan le an thaw rakna lei ni loin Pathien lunginsietnaa innghat a ni lem. 17 Pathien Lekha thuin Faraw kuomah, “Hi lei ngot hin ka tungding chê a nih, nangmaa chun ka thilthawtheina ka’n entir theina ding le khawvel po poah ka hming puong dar a ni theina dingin” a ti si a 18 Chuongchun, Pathien chun a lunginsiet nuom po a lunginsiet a, a suklulul nuom po a suklulul el a nih.
Pathien lungsenna le lunginsietna
19 Chuong a ni si chun Pathienin ieng dinga mi a la mawsiet rop am a na? A ditzawng tuin am a kal thei a?” in ti khom a ni thei. 20 Aw mihriem, Pathien sêl ngamtu chu tu’m i na? Thilsiem chun a siemtu kuomah, “Ieng dinga hieng anga i mi siem am a na?” a ti thei am a ni? 21 Bepil tlang khata inthokin bêl hlu tak le bêl naran siem dingin bêlhemtu chun bêl chungah thu a nei naw am a nih? 22 Pathien chun a lungsenna le a thilthawtheizie suklang nuom hlak sien khom, sukbohmang ela um ding a lungsenna bĕl dongtu dinghai chunga chun zâi a daw hrăm hrâm a, 23 a lunginsietna bĕl, a ropuina changtu dinga a lo buotsai lawk, einihai kuomah a ropuina nasatzie chu a hung suklang tah thung a nih. 24 Chu lunginsietna bĕlhai chu Judahai laia inthok chauh ni loin Jentailhai laia inthoka kohai khom ei nih. 25 Hosea lekhabua,
“Ka mi ni ngai lohai chu,
Ka mihai ti’ng ka ta;
Hmangai ka ti nawhai chu,
Hmangai ti lem ta’ng ka tih;
26 ‘Ka mihai in ni nawh’
a tîna hmun ngeia chun,
‘Pathien hring nauhaia inbûkin um an tih”
27 Isai khoma Israelhai thu chu khĕkpuiin, “Israel mihai chu tuifinrieta phaiphin angin tamhai sien khom, tlawmte chauh sandamin um an tih. 28 Lalpa chun hnuoi chunga a rorêlna chu khauh tak le inrang takin a hlen ding a ni si a” a ti kha.
29 Isai bokin,
“Iengkim Lalpa chun chi thlatu,
Mi lo hlàpêk naw sien chu,
Sodom khuo angin um tâng ei ta,
Gomorra khuo ang ni tâng ei tih”
tiin a lo hrillawk bok kha. Isa 1:9
Israelhai le Chanchin Thra
30 Ieng am hril tâng ei ta? Thiemchang tuma bei ve nawtu Jentelhai chu ringna leia thiem inchangtir an lo ni tah. 31 Dan zawm leia thiem chang tum Israelhai ruok chun Danah thiemchangna an hmu zo ta nawh. 32 Ieng leiin am? Ringna thrang loa thilthawa thiemchang an tum lei a nih. Tlûkna lungah chun an insui thlu ta si a.
A’n sui taphot tlûkna ding lung chu;
Tu khom ama ringtu chu,
Muolpho ngai hrim hrim naw nih”