ISAI
1
1 Amoz naupa Isaiin Judai rama lal Uzia hai, Jotham hai, Ahaz hai le Hezekia hai inlal laia Judahai le Jerusalem chungthua inlàrna a hmuhai chu:
Hnam helhmang
2 Aw vanhai, lo hre unla,
Aw leihnuoi, lo ngaithla rawh!
LALPA chun thu a hril ie:
“Nauhai chawmin ka keitlei a,
Sienkhom ka chungah an hel.
3 Bawngchalin a pu a hriet a,
Sabengtungin a ranthlĕng a hriet;
Israelhai ruok chun an hriet nawh,
Ka mihaiin an hriet nawh” tiin.
4 E khai! hnam suol ni telul e,
Khawlonain a del dè,
Suol thaw ringot ngaituo hnam,
Hlemhlĕ taka che hlak mi an nih.
LALPA chu an thlauthlăk a,
Israel Mi Thienghlim chu,
Hmusitin hnung an nghatsan.
5 Ieng leia vuok tuok zing chêu?
Ieng leia hel lui zing chêu?
In lu hliemin a sip zo ta a,
In lungril a na ngawi ngawi a.
6 Kephaa inthoka in lu sîp chen,
A damna lai hrim a um nawh-
A pop, vuok duk le pânna dâm,
Sawp lo, tuom lo, hriek năl lo-
Natnain a bawm sip vong.
7 In ram răusanin a um a,
In khawpuihai a kang ram zo a,
In lohai chu in mithmu ngeiah,
Ram dang mihan an rŭt fai a,
Hmêl hriet lohan suksein,
A lo ram zo tah a nih.
8 Grep huon vengtu tru trăwp,
Leipui bŭkthlâm răusan ang,
Khawpui inhuol bet tlat angin,
Zion naunu chu a lo inchang tah.
9 Iengkim LALPAN dam khawsuok,
Tlawma zawng mi hlà naw sien,
Sodom khuo ang ni’ng ei ta,
Gomora khuo ang ni’ng ei tih.
10 Sodom khuoa rorêltuhai,
LALPA thu hi lo ngaithla ro,
Gomora khaw mipuihai khomin,
LALPA dan chu ngaisak ro.
11 “In hlànbiek zozaihai hi,
Ka ta di’n iem a ni a?
Beramchal pumrawa inhlăn a,
Ran thâu in hung inhlăn hi,
Nghok khom ka nghok zozai tah.
Bawngchal, beram le kelchal
Thisenhai hi ka lawm nawh.
12 Ka hmaa in hung inlang hin,
Hieng thilhai hi thaw dingin,
Tu hrimin am a hril chêu a,
Ka tuol zawl in hung sirsop hlak?
13 Thil hlawk lo in thilhlànhai hi,
Hung inhlăn vet ta naw ro,
In rimtui rim ka tirdak.
Thla thar lawm, Sabat inkhawm,
Inkhawmpui hrang hrang in tih,
Inkhawm rilo ka ngai thei nawh.
14 Thla thar kût le kût danghai,
Hunbi neia hmang hlakhai hi,
Ka lungrilin ka theida a nih.
Ka ta di’n hnoksak a tling a,
Ka nghok put put a nih.
15 Trongtraia kut inphar pha,
Ka mit lo hup ta’ng ka ta,
Voi tam trongtrai inla khom,
Ngaithlapek ta naw ning cheu,
In kut thisenin a sip si a.
16 Insawpin insukthieng unla,
Thil thra lo in thawhai hi,
Ka hmû ngĕiah bănsan ro.
17 Thil thra thaw inchûk unla,
Rorêlna fel hnot unla,
Nêksawrhai tungding unla,
Fahrahai chu san unla,
Hmeithaihai thu hrilpui ro.
18 Lalpa chun hieng hin a tih:
“Hung ro, ngaituo tlâng ei tiu,
In suol chu senlâr angin,
Lo sen tah khom ni sien la,
Vûr angin hung vâr a ta;
Senduk angin sen sien khom,
Sahmul angin vâr a tih.
19 Ka thû awia in zăwm chun,
A ram tharsuok tlăn in tih.
20 Mi kala in hel ruok chun,
Kawlhnâmin lem a ti cheu”
Tiin LALPA chun a hril.
Khawpui suol
21 Khawpui ringum ni hlak kha,
En ta, nawchizor a lo ni ta hi!
Fel taka ro rêl hlak nu,
Indikna chêngna hlak nu kha,
Tuolthattu a lo inchang tah!
22 I tangkaruo a nghar-êk zo a,
I uoiin thra khom a da zo tah.
23 I rorêltuhai hlak helhmang,
Rûkruhai ruol an inchang zo.
Thamna an ngaina êm êm a,
Thilpêk a hnotin an hnot.
Fahrahai an san ta ngai naw a,
Hmeithaihai thu a lût ta nawh.
24 Chuleiin Lalpa, Iengkim LALPA,
Israelhai Mi Hrat chun a hril:
“Khai leh, mi dotuhai inthielin,
Ka hmêlmahai thungrul ka tih.
25 In chungah kut thlâk ka ta,
In ngharĕknahai sukfai var ka ta,
In inthieng nawnahai pei ka tih.
26 Kha hmaa in nei ang bok,
Rorêltu thra le remruot thiem,
Siepêk nawk ka ti chêu a,
Chu pha chun Indikna Khawpui,
Khawpui Ringum ti ta’ng in tih.
27 Rorêlna indik hmangin,
Zion chu intlan suok ka ta,
A sŭnga chêng suol simhai chu,
Felnain san suok ka tih.
28 Mi hel le suolhai ruok chu,
Suksiet ni vé vèng an ta,
LALPA nghatsantuhai khom,
Sukbohmangin um an tih.
29 Saisaw buk hnuoia milim,
Lawm taka in biek hlak kha,
Chu pha chun inzăpui in ta,
Huona fe in thlang hlak khan,
La sukmuolpho a ti cheu.
30 Saisaw thing vuoi ta hnung le
Tui hmu lo huon ang bokin,
Nangni khom la trawl in tih.
31 Mi hrât chu rawpon ang el,
A sinthaw khom meisi ang,
A la hung ni ding a ni si a;
An pahni chun kang a ta,
Tu khomin sukmit naw nih”.