Samaria chungthu hrilna
28
1 Zurui ruol Efraimhai parthri suong,Phai hnienghnar tontira um khawpui,
Uoiin fak siethai chapopui khuo,
A ropuina par mawi chuoi mek chu,
A chung a va hang pik de aw!
2 Ngai ta, Asuria sipai hrat tak chu,
Ama bei din LALPAN hung tir a ta,
Thlipui le ruopui vanawn angin,
Anni chu hung nuoi hmât an ta,
3 Ruihmang Efraimhai parthri chu,
Hnuoiah hung sir sop an tih.
4 Phai tontira um khawpui mawi,
A par mawina chuoi mek chu,
Busik tawm nipui intran hlima,
Theichang hmin hmasa hmutuin,
Loa a beng zo nghal hlak angin,
Sawt nawteah bohmang a tih.
5 Chu ni chun hlaa la umhai din,
Iengkim LALPA chu an parthri,
An lallukhum ropui ning a tih.
6 Rorêltuhai ta dingin,
Indikna thlarau ning a ta,
Kotkhara ral vengtuhai ta din,
An hrătna thahrui ning a tih.
Zawlnei inruihmanghai le Isai
7 Zawlnei le thiempuhai khom,
Inhâi khopin uoiin an inrui a,
Pai tliei tlieiin an thle bĕr bêr a;
Uoiin le rakzuin a chok vĕt a,
Inlarna an hmu lai an pai a,
Ro rêl thei loin an pai tlu a,
8 An dawkan luokin a sip a,
Porchĕna ngota sip an nih.
9 “Tu am zirtir a tum hrim a?
Tu kuom am thu a hril fie tum?
Nu trănga inthoka làk thlâk,
Nene nghei hlimhai kuoma maw?
10 ‘Hi tiem rawh, a mal malin,
Tlar khat pei, tlar khat pei,
Hi lai tlawmte, kha lai tlawmte’
Tia mi zirtir an tum a nih” an tih.
11 Chuong ang chu a ni leiin,
Pathienin hi mihai kuoma hin,
Hnam dang hmŭr le trongin,
Thu a hril ta lem ding a nih.
12 “Hi hi chawlna hmun a na,
Chauhai chawl hadam raw se”
Tiin hril hlak sienla khom,
An ngaithlak nuom nawh.
13 Anni chun LALPA thu chu
“Hi tiem rawh, a mal malin,
Tlar khat pei, tlar khat pei,
Hi lai tlawmte, kha lai tlawmte”
Ti ang chaua an ngainĕp leiin,
Feng an ta, tlu thal dĕr an ta,
Hliem an ta, chângah âwk an ta,
Man khawmin um rip an tih.
14 Chuleiin, nangni cheksoltu,
Jerusalem chunga rorêltuhai,
LALPA thu hi lo ngaithla ro.
15 Nangni chun chapo takin,
“Thina leh thu kan thlung ta a,
Seol leh inremna kan siem tah.
Hremna tui hung lien sien khom,
Mi chim buoi thei teu naw nih,
Inbîknan khêl kan phĕn a,
Inhumnan hlĕmna kan ruoi” in tih.
16 Iengkim LALPA chun a hril:
“Ngai ta u Zion-ah lung ka phŭm,
Lung detdo, innghatna tlak,
A bulthrut lung poimaw,
A suknghettu lung ngei chu.
A ringsantu chu inhnîng naw nih.
17 Rorêlna fel chu inkhǐna hruiah,
Felna chu darmumkhaiah hmang ka tih.
Khêla in inhumhimna kul chu,
Rielin dêng se vong a ta,
In inbikrukna hmun khom,
Tuiin chǐm pil vong a tih.
18 Thina le in thuthlung sûtin,
Seol le in thutiem thriek ka tih.
Hremna tuipui a hung lien pha,
Hnuoiah chǐm hmât a ti cheu.
19 A lien zăta a thaw dan angin,
Fen hmang hlak an ti chêu a,
Zîng tin zîng tinin lien a ta,
Sŭn le zăn hrût ziel a ti chêu.
Hi thu umzie hi hre inla chu,
In pang inza nasa hleng a tih.
20 In khum siem a tawi taluo,
Hang inthluonna khop an nawh;
In puonthuo a chîn taluo,
Hang sil khop khom a ni nawh.
21 Perezim tlănga a thaw ang le,
Gibeon ruoma a thaw ang khan,
LALPA chu hung tho suok a ta,
A thaw tum mak tak tak le,
A thaw tum dangdai tak tak chu,
A la hung thaw ding a nih.
22 Chuleiin, mi nuizat ta naw ro,
In kol bun sukrik ting a tih;
Lalpa, Iengkim LALPA chun,
A ram pum sukse dingin,
A ruot fel tah ti ka hriet.
23 Chuleiin ka rawl ngai ro,
Ka hril chêu hi ngaisak ro.
24 Loneitun thlai chingna di’n,
A kei dŭr kumkhuo hlak maw?
25 A hnuoi a hrût ruol pha leh,
Pardi chi chu a the a,
Jira chi a thê bok a,
A tlarin huit a chîng a,
Barli khom a hmun dingah;
Hnawmah mîm a tû bok a,
An huong ding seng a ruotpek.
26 Indik taka lo nei dàn ding,
LALPAN a zirtir vong a nih.
27 Jira chu a khawng chăngin,
Hmolin a vuok ngai naw a,
Pardi an khawng chang khomin,
Tawlailirin an chil ngai nawh;
Hmol fiekin jira a vuok tril a,
Hmoltein pardi a khawng hlak.
28 A mal innawi khop hielin,
Huit hi an chǐl ngai naw a,
A mal koi naw tawk charin,
Sakor tawlailirin an chìl thiem.
29 Chuong po pohai zirtirtu chu,
Iengkim LALPA chu a na,
Ama chu thurawn petu ropui,
Varnaa mak chungchuong a nih.